Ang Paspas nga Paso Niining Kalibotana

MABUG-ATAN KA BA USAHAY SA PASO SA KINABUHI? MOPABATI BA KINI KANIMO SA KAPAKYASAN, KAKAPOY, NGA IGO RANG NAKAHIMO SA PAGSAGUBANG? KON MAO, WALA KA MAG-INUSARA.

MILYONMILYONG tawo, ilabina sa mga siyudad, nakadiskobre nga ang kinabuhi nahimong makapalipong, makapakapoy nga paspas nga paglihok. Tinuod kini ilabina sa mga nasod sa Kasadpan. Sa usa ka relihiyosong tigom sa Tinipong Bansa di pa dugay, ang usa ka mamumulong mihangyo sa iyang mamiminaw nga magpataas sa ilang mga kamot kon gikapoy sila sa kadaghanang panahon. Dihadiha, daghan kaayong kamot ang gipataas.

Ang librong Why Am I So Tired? nag-ingon: “Ang modernong kinabuhi napuno sa mga kapit-osan nga karong panahona lamang madungog​—apason nga mga ayroplano, mga tagal sa panahon nga pagasundon, mga batang ihatod ug kuhaon sa tunghaang kinder sa eksaktong oras—​dili matapos ang listahan.” Dili katingad-ang ang kakapoy gibatbat ingon nga tunglo sa atong kapanahonan. *

Sa nangaging katuigan, mas yano ang kinabuhi, ug mas hinay ang paso sa kinabuhi. Ang katawhan lagmit nagkinabuhing mas nahiuyon sa mga siklo sa kinaiyahan​—ang adlaw alang sa trabaho, ug ang gabii alang sa pamilya ug pagkatulog. Karong adlawa, adunay ubay-ubayng mga hinungdan nga ang mga tawo mobating mas gikapoy ug nahago.

Sa Kalit, Mas Taas nga mga Adlaw

Usa ka hinungdan tingali ang menos nga kinatulgan sa mga tawo. Ug usa sa mas importanteng mga kaugmaran nga nagdaot sa yugto sa pagkatulog mao ang pag-abot sa dekoryenteng suga. Pinaagi sa pagpalabtik sa swits, ang mga tawo makakontrolar sa gitas-on sa “adlaw,” ug sa wala madugay ang mga tawo nagsugod pagpulaw. Sa pagkatinuod, ang mga tawo walay kapilian kay gisugdan sa mga pabrika ang pagtrabaho sa tibuok adlaw ug gidugangan sa mga industriya sa serbisyo ang oras sa ilang trabaho. Usa ka magsusulat miingon: “Nahimugso ang 24-oras nga katilingban.”

Ang ubang mga kauswagan sa teknolohiya, sama sa radyo, TV, ug personal nga kompiyuter, may bahin usab sa paghikaw  sa gikinahanglang tulog sa mga tawo. Sa daghang kanasoran, ang mga programa sa TV isalida 24 oras kada adlaw. Kasagarang ang mga mahigugmaog sine o mga gustog esports motungha sa trabaho nga katulogon ug gikapoy human sa dugayng pagtan-aw sa gabii. Ang mga kompiyuter sa balay, ug ang way-kataposang mga kalingawan nga ilang ginatanyag, makadani usab sa minilyon nga magpulaw. Dayag na lang, kining mga produktoha sa kaugalingon dili mao ang sad-an; bisan pa niana, kini naghatag sa pipila ka tawo ug dugang panukmod nga dili tagdon ang panginahanglan sa pahulay.

Nahimong Paspas ang Kinabuhi

Dili lang nahimong mas taas ang atong mga adlaw kondili ang pagkinabuhi mismo daw mas paspas​—nga sa makausa pa gihimong sayon tungod sa teknolohiya. Ang ginuyod-sa-kabayong karwahe sa wala pay siglo kanhi lahi kaayo kay sa tuling mga kotse, mga bullet train, ug mga ayroplanong jet karon. Ngani, ang usa ka modernong-adlawng negosyante, kansang apohang lalaki tingali nagbaktas ra paingon sa trabaho o kaha nagsakayg kabayo o bisikleta, mahimong mosakayg ayroplano tabok sa Dagat Atlantiko tali sa duha ka tingkaon!

Ang opisina nakasinati usab sa way-timik nga dakong kausaban alang sa pagkatulin ug pagkaproduktibo. Ang mga makenilya ug ang naandang koreyo gipulihan sa mga kompiyuter, mga makinang fax, ug E-mail. Ang notbok nga mga kompiyuter, mga teleponong cellular, ug mga pager nakapahanap sa diperensiya tali sa balay ug opisina.

Dayag na lang, walay usa kanato ang makapahinay sa nagkakusog nga paso sa kalibotan. Bisan pa niana, sa personal nga paagi, makahimo kitag mga pagpasibo nga makapaarang nato sa pagkinabuhig mas malinawon, balanseng kinabuhi. Apan sa dili pa kita mohisgot niining butanga, susihon nato ang pipila sa mga epekto sa paspas nga paso karon nganhi kanato sa personal ug sa katilingban sa katibuk-an.

[Footnote]