Ang Hunahuna sa Bibliya

Angay ba nga ang Kaminyoon Tibuok-Kinabuhing Panag-ipon?

NGANONG isukna pa kana? Dili ba ang kaminyoon, sa pagkutlo sa Kasadpanhong mga panaad sa kasal, maoy “sa kalipay o kasakit” ug “hangtod pagabulagon kita sa kamatayon”? Oo, ang mga panaad sa kasal sagad magpahayag nga ang pangasaw-onon ug pamanhonon mosulod sa tibuok-kinabuhing kasabotan. Apan wala isipa sa daghan nga obligado sila nianang ugdang nga mga panaad. Nagabulag ang makapakurat nga gidaghanon sa mga magtiayon​—ang pipila human sa pipila ka bulan, ug ang uban human sa daghang katuigan. Nganong nag-us-os ang pagtahod sa kaminyoon? Ang tubag gihatag sa Bibliya.

Palihog susiha ang 2 Timoteo 3:​1-3, ug itandi kana sa imong mapanid-an sa kalibotan karong adlawa. Sa bahin, ang maong mga bersikulo nag-ingon: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, magmahigugmaon sa salapi, . . . dili-mapasalamaton, dili-maunongon, walay kinaiyanhong pagbati, dili-ikasabot, . . . walay pagpugong-sa-kaugalingon.” Ang katukma nianang tagnaa makapahingangha. Ang maong mga tinamdan nakadaot ug nakapahuyang sa relasyon sa kaminyoon sa tibuok kalibotan, nga gipamatud-an sa daghang diborsiyo.

Tin-aw, daghang tawo ang nawad-ag pagtahod sa kaminyoon. Tungod niini, kita makasukna: Angay bang isipon nga seryoso kaayo ang kaminyoon? Anaa ba ang giingong pagkabalaan sa kaminyoon? Unsay angay nga pag-isip sa mga Kristohanon sa kaminyoon? Unsang tabang ang ginahatag sa Bibliya sa mga magtiayon karong adlawa?

Nausab ba ang Hunahuna sa Diyos?

Sa sinugdanan, wala hisgoti sa Diyos nga ang mga bugkos sa kaminyoon maoy temporaryo. Ang iyang pag-usa sa lalaki ug babaye giasoy sa Genesis 2:​21-24, ug walay paghisgot nga mapili ang pagdiborsiyo o pagbulag. Hinunoa, ang bersikulo 24 nag-ingon: “Ang lalaki mobiya sa iyang amahan ug sa iyang inahan ug siya moipon gayod sa iyang asawa ug sila mahimong usa ka unod.” Unsay kahulogan nianang kasulatana?

Tagda ang lawas sa tawo, kon giunsa pagkatagik ang nagkalainlaing mga tisyu nga walay tinahian aron masumpay ug kon giunsa pagkatakdo sa mga bukog diha sa lig-on, dili-magkabag-id nga mga lutahan. Talagsaong panag-usa! Pagkalig-on gayod! Apan pagkahilabihan ka sakit sa dihang grabeng masamdan kining walay-ingon nga lawas! Busa, sa Genesis 2:​24, ang terminong “usa ka unod” nagpasiugda sa pagkasuod ug pagkamalungtaron sa kaminyoon. Kini naghatag usab  ug tin-awng pasidaan sa dakong kagul-anan sa dihang mabugto ang maong bugkos.

Bisan pag ang mabalhinong mga uso sa nangaging mga milenyo nag-umol ug nag-umol pag-usab sa mga hunahuna sa tawo, ang Diyos nag-isip gihapon sa kaminyoon ingong tibuok-kinabuhing kasabotan. Mga 2,400 ka tuig kanhi, ang pipila ka Hudiyong lalaki nahilig nga biyaan ang ilang unang mga asawa ug magminyog batan-ong mga babaye. Gisaway sa Diyos ang maong batasan, nga nagpahayag pinaagi sa iyang manalagnang si Malaquias: “‘Bantayi ninyo ang inyong espiritu, ug hinaot walay usa nga magluib sa asawa sa iyang pagkabatan-on. Kay iyang gidumtan ang pagdiborsiyo,’ miingon si Jehova nga Diyos sa Israel.”​—Malaquias 2:​15, 16.

Kapig upat ka siglo sa ulahi, gipamatud-an ni Jesus ang orihinal nga hunahuna sa Diyos bahin sa kaminyoon sa gikutlo niya ang Genesis 2:24 ug unya nagsugo: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mateo 19:​5, 6) Katuigan sa ulahi si apostol Pablo nagtudlo nga “ang asawa dili gayod mobiya sa iyang bana” ug nga “ang bana dili gayod mobiya sa iyang asawa.” (1 Corinto 7:​10, 11) Kining mga kasulatana tukmang nagpahayag sa hunahuna sa Diyos bahin sa kaminyoon.

May panahon bang ang Bibliya nagtugot sa pagtapos sa usa ka kaminyoon? Oo, ang usa ka kaminyoon matapos sa dihang ang bisan haing kapikas mamatay. (1 Corinto 7:39) Ang pagpanapaw makabungkag usab sa kaminyoon kon kana ang desisyon sa inosenteng kapikas. (Mateo 19:9) Kon dili man, ang Bibliya nagdasig sa mga magtiayon nga magpabiling nahiusa.

Kon Unsaon Pagpalungtad ang Kaminyoon

Gusto sa Diyos nga ang kaminyoon molungtad, dili ingong pakigbisog sa paglahutay, kondili samag usa ka malipayong panaw. Buot niya nga ang bana ug asawa magsulbad sa ilang mga suliran ug dulot nga magkalipay sa pakig-uban sa usag usa. Ang iyang Pulong nagtaganag giya alang sa malipayon, malungtarong kaminyoon. Palihog matikdi ang mosunod nga mga teksto.

Efeso 4:26: “Ayaw pasalopi sa adlaw ang inyong kasuko.” * Usa ka malipayon nga minyong lalaki nagtuo nga kining kasulatana nagtabang kaniya ug sa iyang asawa sa paghusay dayon sa mga kabingkilan. “Kon dili ka makatulog human sa usa ka panagbingkil, may butang nga dili husto. Dili ka makatugot nga magpadayon ang suliran,” matod niya. May panahong siya ug ang iyang asawa nag-estoryahay bahin sa mga suliran hangtod sa gabii nang dako. Apan malamposon kini. Dugang pa niya: “Ang pagpadapat sa mga prinsipyo sa Bibliya adunay kahibulongang mga resulta.” Pinaagi sa pagbuhat niana, ang maong lalaki ug iyang asawa nagtagamtam ug malipayong kaminyoon sulod na sa 42 ka tuig.

Colosas 3:13: “Magpadayon sa pag-antos sa usag usa ug kinabubut-on nga magpasaylo sa usag usa.” Usa ka bana nagpatin-aw kon giunsa niya ug sa iyang asawa pagpadapat kini: “Ang mga kapikas sa kaminyoon makapalagot sa usag usa bisan wala gayoy daotan nga nahimo, sanglit ang tanan adunay mga kahuyangan ug mga batasan nga makatugaw sa ubang mga tawo. Kami nag-antosay sa usag usa pinaagi sa dili pagtugot nga kining mga butanga magpahilayo kanamo gikan sa usag usa.” Walay duhaduhang ang maong pagbati nakatabang niining magtiayona sulod sa 54 ka tuig sa ilang kaminyoon!

Ang pagpadapat sa maong Kasulatanhong mga prinsipyo mopalig-on sa bugkos nga nag-usa sa mga bana ug mga asawa. Sa ingon ang ilang kaminyoon mahimong malipayon, matagbawon, ug molungtad sa tibuok kinabuhi.

[Footnote]