Gikan sa Among mga Magbabasa
Gikan sa Among mga Magbabasa
Laygay nga Balatian Kami adunay tulo ka anak—ang usa nasakit ug Down’s syndrome ug ang lain nasakit sa sickle-cell anemia. Karong bag-o, ang batang may sickle-cell giatake ug kinahanglang maospital, nga nalisdan kaayo kaming tanan. Gibati ko nga gitubag ni Jehova ang akong mga pag-ampo sa dihang nakadawat akog kopya sa Mayo 22, 2000, Pagmata! nga may seryeng “Laygay nga Balatian—Pagsagubang Ingong Usa ka Pamilya.” Kining mga artikuloha mihatag sa akong asawa ug kanako sa kaisog nga moantos. Kini nakapalig-on usab sa among paglaom nga sa dili madugay walay usa nga moingon: “Ako masakiton.”—Isaias 33:24.
E.J.M., Brazil
Kami adunay 19-anyos nga batang lalaki nga nasakit ug schizophrenia. Nakakita kamig daghang libro nga naghisgot sa sakit apan walay nabasa nga naghisgot sa sakit gikan sa panglantaw sa pamilya, sama sa gihisgotan niining mga artikuloha. Kini nagbatbat ug maayo sa pakigbisog sa akong kahiladman ug sa pag-antos, nga samag ang akong kinasingkasing nga kaguol gisulat.
H. T., Hapon
Sulod sa miaging napulo ka tuig, ako nasakit sa nagkagrabeng laygayng balatian, ug ang inyong paagi sa pagbatbat kon unsay pagbati sa usa ka tawo nakapatandog gayod kanako. Usahay sayon kaayo nga mawad-ag katimbang sa hunahuna ug sa espirituwal, apan ang mga igsoon sa akong kongregasyon nagpakitang buot nilang makasabot kon unsay akong ginaantos. Pinaagig mabinantayong mga pulong, sila naghatag kanako sa kusog aron magpadayon sa kinabuhi.
M. M., Italya
Gibasa namo ang mga artikulo ingong usa ka pamilya. Ang akong anak babaye nakaagom ug kadaot sa rinyon ug nag-dialysis na sulod ug lima ka tuig. Kini lisod kaayo nga masagubang namo. Siya sa makadaghan nag-ungaw sa kamatayon nga kami kanunayng anaa sa makuyawng kahimtang, nga nahibulong kon kanus-a mahitabo ang sunod nga suliran. Apan maayo kaayo ang inyong tambag. Ang matag adlaw kinahanglang pabilhan. Ang pag-ampo kinahanglanon usab. Ang pagkahibalo nga si Jehova nakasabot sa akong mga pagbati nakatabang kanako.
S. J., Tinipong Bansa
Ang akong kasingkasing mibukad sa kalipay samtang naamgohan ko nga may makasabot sa kasakit tungod sa pagkamay laygay nga balatian! Nga tinagsa, ako nakasud-ong sa tanan nga tulo ko ka anak babaye nga nagsugod sa pag-antos sa patol, sama kanako. Ang mga artikulong sama niini motabang kanamo sa pagkasabot ug sa pagpasundayag sa hunahuna ni Kristo.
G. L., Tinipong Bansa
Mga Anaconda Nagpuyo ako sa rehiyon nga adunay mga anaconda. Ang mga tawo sagad moestorya bahin niining mga halasa, apan lisod ang pagtino kon angay bang tuohan sila o dili. Ang inyong artikulong “Mga Anaconda—Nagbutyag ba Sila ug Pipila ka Tinagoan?” (Mayo 22, 2000) nakatabang nako sa pag-ila sa kamatuoran gikan sa tumotumo, ug kana nagtubag sa tanan kong pangutana bahin niining katingalahang linalang.
J.S.P., Brazil
Miikyas nga mga Amahan Nagbasa ako ug Pagmata! sulod na sa 25 ka tuig, ug nagtuo ako nga kining ulohana wala pa gayod mahisgoti. (“Mga Batan-on Nangutana . . . Miikyas nga mga Amahan—Makaikyas ba Gayod Sila?” Mayo 22, 2000) Dili-minyo nga mga inahan, oo, apan dili ang responsabilidad sa batan-ong lalaki. Dili ko hisabtan kon nganong kon magpakighilawas ang duha ka tawo, ang inahan ug bata lamang ang mag-antos sa mga sangpotanan. Namabdos ako sa dihang ako 19. Ang lalaki dili buot moabaga sa responsabilidad. Palihog pagpadayon sa pagsulti sa mga batan-on sa ‘pagkalagiw sa pakighilawas.’—1 Corinto 6:18.
C. C., Espanya
Gregong Teatro Gipabilhan ko pag-ayo ang artikulong “Ang Teatro sa Epidaurus—Wala Madaot Latas sa Kasiglohan.” (Hunyo 8, 2000) Gidahom ko nga ang artikulo mahimong makapapukaw sa hunahuna, nga mao gayod kana. Bisan pa niana, wala ako magdahom nga kini nasudlan ug daghan kaayong espirituwal nga mga impormasyon!
K. S., Tinipong Bansa