Ang Seguro nga Gikinahanglan sa Tanan

NAGPUYO ka man sa dapit diin ang seguro maoy komon o diin kini wala maglungtad, dunay usa ka matang sa seguro nga mahimong mabatonan ug angayng mabatonan sa tanan. Sanglit ang “seguro” mahimong magtumong sa “usa ka paagi sa paggarantiya sa proteksiyon o kahilwas,” sa unsang paagi mabatonan nimo ang maong matang sa seguro?

Mahimo nimo kini pinaagi sa paghimog praktikal nga mga lakang nga mamenosan ang imong pagkaladlad sa mga risgo. Ang Bibliya nag-ingon nga “ang panahon ug ang wala damhang panghitabo” mag-apektar sa tanan. (Ecclesiastes 9:11) Bisan pa niana, pinaagi sa dili paghimog wala-kinahanglanang mga risgo, ang posibilidad nga makaagom sa kadaot o kapildihan mamenosan.

Hunahunaa ang Umaabot

Ang pagpakita ug praktikal nga kaalam maoy proteksiyon. Sa mga panahon nga medyo nag-uswag ang ekonomiya, posible tingali nga magtipig ug salapi para sa ting-ulan​—panahon sa panginahanglan. Sa karaang kapanahonan ang mahinadlokon-sa-Diyos nga si Jose nailhan ingong “usa ka tawong maayog pagsabot ug maalamon” pinaagi sa pagtigom ug mga pagkaon alang sa tibuok yuta sa Ehipto sa panahon sa kaabunda. Sa dihang ang yuta sa ulahi gihampak sa gutom, ang gibuhat ni Jose wala lamang magtaganag pagkaon sa mga Ehiptohanon kondili sa iyang pamilya usab.​—Genesis 41:​33-36.

Ang pagkamakasaranganon sa atong pagpamalit ug paggamit sa mga butang magsilbi usab nga proteksiyon. Makadaginot kita ug salapi ug makamenos sa kapit-os pinaagi sa dili kanunayng pagpangagpas sa kinaulahiang kasangkapan, estilo, o kalingawan​—usa ka dalan nga diyutay ra o walay ikadugang sa atong tinuod nga kasegurohan. Sa pagkatinuod, sumala sa giingon na, kon mas daghag materyal nga kabtangan ang usa ka tawo, mas dako ang posibilidad nga makawatan siya o makaagom sa kapildihan.​—Lucas 12:15.

Magmahunahunaon sa Kahilwas

Mamenosan nato ang kadaghanang risgo sa kinabuhi pinaagi lamang sa pagkamahunahunaon sa kahilwas. Pila kaha ka makapasubong mga aksidente sa sakyanan ang malikayan unta kon ang tanan mag-amping sa pagdrayb ug diha sa hilwas nga katulinon? Hunahunaa usab, kon pila ka kinabuhi ang maluwas unta kon walay tawong magdrayb nga lapoy kaayo o human makainom ug alkoholikong  ilimnon. Duna pay laing mga risgo sa pagdrayb nga makontrolar nato.

Pananglitan, sa ubay-ubayng kanasoran ang balaod nagdili sa paggamit ug cellular nga telepono samtang nagdrayb. Ang usa ka pagtuon nanghinapos nga ang maong paggamit sa telepono magpauswag sa risgo nga maaksidente sa upat ka pilo. Sama niana ka dako ang pag-uswag sa risgo nga maaksidente kon magdrayb nga dunay lebel sa alkohol diha sa dugo nga 0.1 porsiyento, ang kahimtang nga sa daghang dapit ang usa ka tawo, sumala sa balaod, giisip nga hubog kaayo nga dili mahimong magdrayb.

Ang kanunayng pagtaod ug mga bakos sa lingkoranan makapamenos usab sa risgo nga mamatay ang mga drayber ug ang mga pasahero. Apan ayaw gayod hunahunaa nga ang maong mga himan sa kahilwas sama sa mga bakos sa lingkoranan ug mga air bag o ang pagbaton ug seguro nagpasabot nga mahimo na nimong ipameligro ang imong kaugalingon. Ang panukiduki nagpakita nga ang maong panghunahuna mosangpot sa dugang pang mga aksidente.

Ang pagkamahunahunaon sa kahilwas maoy maayo usab nga seguro sa balay ug sa trabahoan. Ang imo bang balay ug trabahoan hinlo ug walay peligro? Susiha ang imong palibot. Duna bay bisan unsa diha sa pasilyo nga kapandolan sa mga tawo? Ang hait nga mga butang o init nga mga kasangkapan​—mga kosinilya, heater, plantsa​—nahimutang ba sa dapit diin ang mga tawo mahimong masamad o mapaso? Nagtipun-og ba ang papel o ubang daling masunog nga materyales? Magmaalisto ilabina sa mga kapeligrohan ngadto sa mga bata. Pananglitan, dili ba maabot sa gagmayng mga bata ang alkoholikong mga ilimnon ug ang tanang makahilo nga mga produktong panghinlo?

Ampingi ang Imong Panglawas

Pinaagi sa pagkamahunahunaon sa makataronganong paagi, mamenosan nimo ang risgo nga masakit. Bahin niini, ang kahibalo magsilbing usa ka matang sa seguro. Hibaloi kon unsay peligroso sa imong panglawas, ug himoa dayon ang angayng buhaton kon motungha ang mga suliran sa panglawas. Mas hinungdanon pa, kat-oni kon sa unsang paagi mamentinar ang imong panglawas ug nianang sa imong pamilya. Hinumdomi ang karaang panultihon: “Ang pagpanagana mas maayo pa kay sa pag-inom ug tambal.”

Ang Pagmata! dugay nang nagtagana ug impormasyon nga nagdasig sa mga tawo sa pagkinabuhi nga kaharmonya sa mga prinsipyo sa Bibliya ug busa malikayan ang mga batasan ug mga estilo sa kinabuhi nga makadaot sa panglawas. Pananglitan, lakip sa daghang ulohan nga gihisgotan sa Pagmata! mao ang kahinungdanon sa kahinlo, hustong pagkaon, igong pagkatulog, ug regular nga ehersisyo maingon man ang panginahanglan sa pagkontrolar sa kapit-os ug sa paso sa kinabuhi.

Usa ka Hinungdanong Matang sa Seguro

Niining dili-hingpit nga kalibotan, ang seguro mahimong usa ka praktikal kaayong galamiton, apan walay polisa sa seguro nga bug-os nga makapanalipod kanato o bug-os nga makabayad sa atong mga kapildihan. Bisan pa niana, mabatonan man nila ang seguro o dili, dunay mga tawo nga masaligon nga dili sila pasagdan. Ngano man?  Tungod kay sa dihang mahitabo ang katalagman, ang tinuod nga mga sumusunod ni Jesu-Kristo​—kadtong nag-alagad sa iyang Amahan, si Jehova nga Diyos​—mobuhat sa ilang maarangan sa pagpagaan sa mga palas-anon sa usag usa.​—Salmo 83:​18; Santiago 2:​15-17; 1 Juan 3:​16-18.

Dugang pa, si Jehova mismo nagsaad nga dili gayod biyaan ang iyang matinumanong mga alagad. Usa ka salmista sa Bibliya nagsulat: “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Salmo 27:10) Ingong Tuboran sa kinabuhi, si Jehova makabanhaw niadtong nangamatay, ug sumala sa Bibliya, gihatagan niyag gahom ang iyang Anak, si Jesu-Kristo, sa pagbanhaw sa mga patay. (Salmo 36:​9; Juan 6:​40, 44) Apan, ang Pulong sa Diyos nagpakita nga dili banhawon ang tanan. (Juan 17:12) Nan, sa unsang paagi makaseguro kita nga kita hinumdoman sa Diyos panahon sa pagkabanhaw?

Sa iyang nabantog nga Wali sa Bukid, si Jesus naghisgot, sa pagkatinuod, bahin sa labing kasaligan nga matang sa seguro. Siya miingon: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat. Hinunoa, pagtigom kamo ug mga bahandi alang kaninyo sa langit, diin walay tangkob ni taya nga magakutkot, ug diin walay mga kawatan nga magalungkab ug magapangawat. Kay kon hain gani ang imong bahandi, atua usab didto ang imong kasingkasing.”​—Mateo 6:​19-21.

Kasagaran ang mga tawo maghunahuna nga magtigom ug salapi sa paglaom nga maseguro niini nga mabatonan nila ang mas komportableng kinabuhi inigkatigulang na nila. Apan, gipaila ni Jesus ang mas kasaligang matang sa seguro. Bililhon kaayo kini, ug dili gayod kini mapakyas! Siya misaysay: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Pinaagi sa pagbaton ug tukmang kahibalo bahin sa Diyos ug sa iyang Anak ug pagpadapat sa atong nakat-onan diha sa atong kinabuhi, atong mahuptan ang maayong rekord uban sa Diyos. (Hebreohanon 6:10) Ang mga apostol nga si Pedro ug Juan, nagpasukad sa ilang mga pagtuo diha sa mga pagtulon-an sa ilang Agalon, si Jesu-Kristo, nga nagpasiugda nga ang presenteng sistema sa tawhanong pagmando matapos. Bisan pa niana, si Juan misaysay: “Siya nga nagabuhat sa kabubut-on sa Diyos magpabilin hangtod sa kahangtoran.”​—1 Juan 2:​17; Mateo 24:​3, 14; 2 Pedro 3:​7, 13.

Makasalig kita nga kon kita mag-alagad sa Diyos ug mamatay, kita iyang banhawon o kon kita buhi pa hangtod sa panahon nga taposon niya kining sistemaha sa mga butang, kita iyang tipigan nga buhi ngadto sa iyang matarong nga bag-ong kalibotan. Sa pagkatinuod, ang saad sa Diyos mao ang ‘pagpahid sa tanang luha gikan sa [atong] mga mata’ ug ang ‘pagbag-o sa tanang butang.’ (Pinadayag 21:​4, 5) Ang pag-alagad sa Diyos ug pagsalig sa iyang mga saad sa pagkatinuod mao ang kinamaayohang seguro sa tanan. Ug kini mabatonan sa tanan.

[Mga hulagway sa panid 8, 9]

Ang pagkamahunahunaon sa kahilwas ug sa panglawas maoy usa ka matang sa seguro

[Hulagway sa panid 10]

Ang pagkakat-on bahin sa Diyos ug sa pagtuman sa iyang kabubut-on mao ang kinamaayohang seguro alang sa umaabot