Gikan sa Among mga Magbabasa

Pornograpiya sa Internet Akong nadawat ang Hunyo 8, 2000, nga isyu nga may seryeng “Pornograpiya sa Internet​—Unsang Kadaot ang Mahimo Niini?” Pagkadakog epekto niini kanako! Usa ka bulan o kapin una pa niana, akong nakit-an ang akong bana nga nagtan-aw ug pornograpiya diha sa kompiyuter; mao pa lamay iyang pagtaod sa kompiyuter niana mismong adlawa. Akong naablihan ang pultahan nga wala damha ug nakit-an siya nga nagtan-aw sa usa ka law-ayng letrato. Dili ko ikahubit ang epekto niini sa among relasyon. Siya nangayog pasaylo, apan iyang gidaot ang among kaminyoon.

L. K., Tinipong Bansa

Buot kong ipahayag ang akong pagpasalamat alang niining mga artikuloha. Ako nakigbugno sa problema sa pagtan-aw ug pornograpiya sulod na sa walo ka tuig. Di pa dugay ako miampo ug mihukom sa pag-undang sa akong pagkagiyan sa pornograpiya. Nianang adlawa mismo akong nadawat kining mga artikuloha.

L. M., Tinipong Bansa

Pipila ka bulang milabay, aksidente kong naablihan ang pornograpikong site sa Internet. Misugod ako sa pag-abli sa ubang mga site nga klarong naglarawan sa kalaw-ayan. Tungod niini, ako nahimong tig-inusara ug masulub-on ug nawad-an akog gugma sa espirituwal nga mga butang. Dali kaayong magiyan niini nga mga larawan. Apan karon panlimbasogan ko ang pag-undang niini nga pagkagiyan.

M. G., Tinipong Bansa

Mga Korbata Buot kong ipahayag ang akong pagpabili alang sa artikulong “Mga Korbata​—Karon ug Kaniadto.” (Hunyo 8, 2000) Ako maoy usa ka inahan sa tulo ka anak, ug ako nagtudlo kanila sa paghigugma kang Jehova. Ang akong kinamagulangang anak lalaki maoy 13 anyos, ug siya ug ako dili makamao sa paghigot ug korbata aron iyang mahimo ang mga asaynment diha sa Teokratikanhong Tunghaan sa Ministeryo. Ang akong bana, kinsa dili magtutuo, wala pa gayod makasul-ob ug korbata. Salamat sa pagpakita kanamo sa paghigot ug korbata sa yanong paagi.

M. B., Tinipong Bansa

Ako maoy 11 anyos, ug katingalahan man paminawon, ang mga ilustrasyon sa kataposan nagtudlo kanako kon unsaon paghigot sa akong korbata. Karon magamit ko na ang tanan kong mga korbata diha sa akong ilisan!

A. P., Italya

Ebolusyon Ang pipila ka babag sa matinud-anong panaglantugi bahin sa ulohang ebolusyon makita sa artikulong “Makataronganon ba ang Ebolusyon?” (Hunyo 8, 2000) Kamo miingon: “Nagpasabot ba kini nga ang lawalawa kinaiyanhon nga nakamugnag mga teknik sa paggama nga komplikado kaayo nga wala pa masabti sa tawo?” Nganong wala? Ang mga siyentipiko wala mahibalo sa tanan.

C. W., Australia

Ang paggama sa lawalawa ug seda naglangkit ug daghan kaayong komplikadong mga mekanismo nga wala pa gihapon masabti sa mga siyentipiko human sa mga dekadang pagpanukiduki. Apan, sila sa pagkadogmatiko moingon nga kini maoy bug-os produkto sa ebolusyon. Kami nagtuo nga kini ug daghan pang ubang mga pananglitan nag-ilustrar sa paninugdang pagkadili-makataronganon sa ebolusyon ug nagsugyot nga ang pagtuo niana nga teoriya mas susama sa pagtuo nga walay lig-ong pamatuod kay sa siyensiya.​—ED.

Wala pa gayod ako makabasa ug bisan unsa bahin sa usa ka punto nga kanunay kong gibating lig-ong katarongan batok sa lohika sa ebolusyon: Sa unsang paagi ang atong mga katigulangan (bisan unsa pay paghunahuna kanila sa pipila) nabahin ug nahimong duha ka magkalahing mga sekso? Ang pag-ingon nga kini nahitabo sulod sa minilyong katuigan dili gayod magpatin-aw sa mga butang, sanglit ang babaye dili mahimong magmabdos nga anam-anam.

H. R., Tinipong Bansa

Ang among magbabasa adunay makataronganong punto, usa nga among gikomentohan diha sa among Mayo 8, 1997 nga artikulong “Kulang ba ang Pundasyon sa Ebolusyon?” Kami misaysay: “Kita gidahom sa pagtuo nga pinaagi sa sulagma ang ebolusyon usab nagpatunghag lalaki ug babaye sa samang panahon aron ang bag-ong mga espisye magpadayon sa paglungtad sa walay kataposan. Labaw na nga imposible, kinahanglang motuo usab kita nga ang lalaki ug babaye wala lamang motungha sa samang panahon kondili sa sama pa nga dapit! Walay panagkita, walay panagsanay!”​—ED.