Ang Akong Pagpakigbisog sa Usa ka Makapaluyang Sakit

SUMALA SA GIASOY NI TANYA SALAY

Pipila lang ka tuig kanhi, ako usa ka abtik kaayo nga inahan ug usa ka bug-os-panahon nga ministro sa gamayng lungsod sa Luverne, Alabama. Malinawon ug kalmado ang kinabuhi dinhi. Ang tanan daw maayo ra alang kanako ug sa akong bana, si Duke, ug sa akong batan-ong anak, si Daniel. Dayon ang usa ka yanong operasyon mitultol ngadto sa usa ka dakong kausaban sa among estilo sa kinabuhi.

 ANG among mga suliran nagsugod sa 1992 sa dihang gikuha ang akong matris pinaagi sa operasyon. Wala madugay human niadto, nagsugod ako pagsinati ug dili mawala nga hilabihang kasakit ug pag-ihiihi (50 ngadto sa 60 ka beses sa usa ka adlaw). Sa kataposan gipaadto ako sa akong espesyalista sa sakit sa mga babaye sa usa ka urologist (espesyalista sa rinyon ug pantog) aron matumbok kon unsay hinungdan sa sakit.

Miadto ako sa ospital aron magpaeksamin. Sa akong unang pag-adto, ang urologist nagdayagnos sa akong sakit nga​—interstitial cystitis (IC), o makapaluyang paghubag sa pantog. Dili sayon ang pagdayagnos tungod kay ang mga simtoma sa IC susama nianang sa ubang mga abnormalidad sa urinary system. Dugang pa, walay tinong pag-eksamin aron maila ang IC. Busa, kinahanglang seguroon una sa mga doktor nga dili laing mga sakit ang hinungdan sa maong mga simtoma una pa dawaton ang dayagnosis nga IC.

Ang among doktor pintok nga miingon nga sanglit ang pagtambal diyutay rag alibyo, ang sangpotanan mao unya ang pagkuha sa pantog pinaagi sa operasyon! Matod niya dihay ubang mga paagi sa pagtambal apan kining tanan wala molampos. Siyempre, nakurat mi. Medyo himsog ang akong panglawas hangtod niining panahona. Ingong mga Saksi ni Jehova, si Duke ug ako anaa sa bug-os-panahong ministeryo sulod na sa ubay-ubayng katuigan, ug karon giingnan ako nga kinahanglang kuhaon ang akong pantog. Nalipay ako nga gipaluyohan ako pag-ayo sa akong bana.

Nakahukom mi sa pagpangitag laing urologist. Gisulayan namo pagpahiling sa ubay-ubayng mga doktor. Ikasubo, nianang panahona daghang doktor ang diyutay rag nahibaloan bahin sa IC. Dugang pa, daghang urologist ang dunay kaugalingong mga teoriya bahin sa IC, busa lainlain ang gisugyot nga paagi sa pagtambal. Usa ka medikal nga tinubdan nag-ingon: “Ang sakit may purohan nga molaygay.” Ang lain nag-ingon: “Ang mga siyentipiko wala pa makakaplag ug tambal alang sa IC, ni makahibalo silang daan kon kinsay maayo dayon sa usa ka paagi sa pagtambal. . . . Tungod kay ang mga doktor wala mahibalo kon unsay hinungdan sa IC, ang mga paagi sa pagtambal gitumong diha sa paghupay sa mga simtoma.”

Gibati ko ang hilabihang kasakit tungod sa pagpaminhod ug pag-ihiihi nga ako andam mosulay sa bisan unsa nga gisugyot sa mga doktor. Nasulayan na nako ang kapin sa 40 ka lainlaing mga paagi sa pagtambal lakip sa mga hilba, acupuncture, pagsampong sa mga nerbiyos, epidural ug spinal nga mga ineksiyon, ug transcutaneous electrical nerve stimulation (TENS), nga niana ang hinay nga koryente mosulod sa lawas sulod sa pipila ka minuto o mga oras. Nanukiduki ako kutob sa akong maarangan, nga labing menos nakatabang nako sa pagkasabot ug diyutay bahin sa nagakahitabo.

Sa pagkakaron, nagtomar ako ug methadone, nga maoy usa ka panghupay sa kasakit, duyog sa unom pa ka laing mga tambal. Mag-adtoan usab ako sa usa ka pain clinic, o klinika sa panakit, diin hatagan ako ug epidural nga mga ineksiyon ug dapatan ug mga steroid aron maalibyohan ang kasakit. Aron makontrolar ang pag-ihiihi, moadto ako sa ospital halos matag tulo o upat ka bulan aron mailalom sa paagi sa pagtambal nga gitawag ug hydrodistension, nga niana gamiton ang likido aron paburoton ang pantog samag balon. Pipila ka beses na kining gihimo kanako. Kasagaran makapahupay kini kanako sulod sa pipila ka bulan. Nagsulod-gawas ako sa ospital kapin sa 30 ka beses sulod sa milabayng pipila ka tuig.

Komosta ang kataposang paagi sa pagtambal, ang pagkuha sa pantog pinaagi sa operasyon? Usa ka awtoridad nag-ingon: “Kadaghanang doktor magpanuko sa pag-opera tungod kay ang resulta dili mahibaloang daan diha sa tagsatagsa ka pasyente​—ang pipila ka tawo nagpaopera ug wala gihapon mawala ang mga simtoma.” Busa sa pagkakaron wala nako konsideraha ang maong kapilian.

Usahay ang kasakit grabe kaayo ug dili mawala nga dali rang mawad-ag paglaom. Ang hunahuna nga magpakamatay mosantop gani sa akong hunahuna. Apan dili ko makaako sa paghunahuna sa pasipala nga ihatag sa maong buhat nganha sa ngalan ni Jehova. Nakita nako ang kahinungdanon sa pag-ampo ug personal nga pagtuon maingon man ang pag-ugmad ug suod nga relasyon uban kang Jehova, kay dili ka gayod mahibalo kon unsay mahitabo nga mag-usab sa imong kinabuhi. Kini nga relasyon sa literal nakaluwas sa akong kinabuhi panahon sa akong pagmasakit, sanglit nahibalo ako nga kon wala kini naghikog na unta ko.

Samtang hinumdoman nako kining milabayng siyam ka tuig, nakita nako kon unsa ka tulin nga mausab ang kinabuhi. Nasabtan nako ang mga  pulong sa Ecclesiastes 12:​1, nga nag-ingon: “Hinumdomi, karon, ang imong Dakong Maglalalang sa mga adlaw sa imong pagkabatan-on, sa dili pa moabot ang malisod nga mga adlaw, o modangat ang mga tuig sa dihang ikaw moingon: ‘Ako walay kalipay niini.’” Mapasalamaton kaayo ko nga ako nagsugod sa bug-os-panahong ministeryo sa dihang ako 15 anyos pa ug nakapadayon sulod na sa duolan sa 20 ka tuig. Nianang panahona naugmad nako ang suod nga relasyon kang Jehova.

Mapasalamaton ako kang Jehova tungod sa akong bana ug sa akong anak, si Daniel, nga mapaluyohon kaayo. Dugang pa, makapadasig kaayo sa dihang ang mga kauban nako sa kongregasyon motelepono o moduaw nako. Malisdan ako sa paggawas sa tingtugnaw tungod kay ang kabugnaw mopagrabe sa mga pamikog. Nan magsangyaw ako pinaagi sa telepono, nga nakapahimo sa paglaom sa Paraiso nga lig-on ug tinuod alang kanako. Nagpaabot ako sa panahon sa dihang ang sakit ug pag-antos mao na unyay mga butang sa nangagi ug dili na pagahinumdoman pa.​—Isaias 33:24.