Ang Kalipayng Bation sa Pagtan-aw ug mga Langgam

PAGKABATI unta sa kalibotan kon walay mga langgam! Ang ilang pagtuwit-tuwit, ang ilang mga awit, ang ilang nagkalainlaing mga kolor ug paglupad​—tanan nakadugang sa katahom sa panagkadaiya sa kinabuhi. Apan unsa ka subsob nga kita mohunong aron sa pagpaminaw ug pagtan-aw kanila? Kon siyudadnon ka nga gilibotan sa kakisaw sa adlaw-adlaw nga kinabuhi ug sa banha nga trapiko, tingalig dili ka gani makamatikod sa mga langgam sa imong lugar. Bisag nagpuyo ka pa sa banika, dili ka seguro manumbaling niini. Apan gusto ba nimong makita sa duol ang mga langgam sa imong lugar?

Imong makita sila pinaagi sa usa lamang ka tuktokanan sa langgam diha sa imong lagwerta, nga ibutang sa hustong distansiya gikan sa bentana. Dayon, ang imo lamang gikinahanglan mao ang largabista ug kamera nga may maayong zoom lens​—ug gamayng pailob! Pag-andam ug high speed film ug daghag-impormasyong libro sa langgam nga daghag hulagway aron mailhan ang matang sa langgam. Dayon, kalingawi kinig tan-aw ug pamati!