Gikan sa Among mga Magbabasa

Mga Patakpatak Ang artikulong “Mga Patakpatak Atubangan sa Imong mga Mata?” (Hunyo 8, 2000) nakatandog pag-ayo sa akong kinabuhi. Nadawat nako ang magasin tulo ka adlaw lang gayod sa wala pa nako maagomi ang pagkaukang sa bahin sa retina sa akong tuong mata. Ang mga simtoma nga gihubit diha sa artikulo nagpalihok kanako nga kinahanglang mangitag dinaliang medikal nga pag-atiman. Ang pagtambal pinaagi sa laser gigamit sa pag-alim sa nadaot nga bahin, mao nga ang akong panan-aw wala madaot. Salamat sa maong maayo-kaayong pagkatuki, mapuslanong mga artikulo.

C. V., Habagatang Aprika

Propaganda Mao pay akong pagkahuman sa pagbasa sa Hunyo 22, 2000, nga isyu, ug ako nagpasalamat kaninyo sa seryeng “Angay ba Nimong Tuohan ang Tanang Butang nga Imong Madungog?” Sa lugar nga akong gipuy-an, naandan na nga yagayagaan ang mga Romany (mga Gypsy). Ang mga tawo mangomedya kon sa unsang paagi sila gikaingong mangawat. Uban sa tabang sa mga artikulo, akong naamgohan nga kanang mga komedyaha maoy dili angay, ug ako mihukom nga dili moapil.

K. M., Czech Republic

Pagpuyo sa Laing Nasod Salamat sa artikulong “Mga Batan-on Nangutana . . . Angay ba Akong Mopuyo sa Laing Nasod?” (Hunyo 22, 2000) Regular akong nagabasa niini nga serye, apan sagad kong gibati nga ang pipila sa mga kapeligrohan nga inyong gihubit maoy paghingapin. Sa miaging tuig mibiyahe ako sa laing nasod alang sa usa ka pagbayloanay ug kultura tali sa akong eskuylahan ug sa laing unibersidad. Bisan tuod makaiikag kadto nga kasinatian, dili kadto mapuslanon pinasukad sa espirituwal nga punto de bista.

M. P., Italya

Kini nga artikulo ug ang artikulong “Mga Batan-on Nangutana . . . Sa Unsang Paagi Akong Mapalampos ang Akong Pagpuyo sa Laing Nasod?” (Hulyo 22, 2000) maoy “pagkaon sa hustong panahon” alang kanako. (Mateo 24:45) Nakahukom na ako sa paggugol ug usa ka tuig sa laing nasod aron makakat-on ug langyawng pinulongan. Busa mapasalamaton gayod ako sa mga sugyot ug praktikal nga mga impormasyon.

I. Z., Switzerland

Easter Island Ang artikulong “Usa ka Dakong Leksiyon Gikan sa Gamayng Isla” (Hunyo 22, 2000) nagpahayag sa mga kabalaka sa daghang tawo kinsa nahangawa bahin sa kalikopan. Apan akong gibati nga diyutay ra kadtong nagmatikod sa mga kapeligrohan nga atong giatubang. Sa dihang ako maghunahuna bahin sa pagkadili-maayong modumala sa mga tawo niining yutaa, manglugmaw ang akong mga luha.

K. M., Hapon

“Daylight Saving Time” Maylabot sa artikulong “DST​—Usa ka Ideya sa Dili pa ang Panahon Niini?” (Hulyo 8, 2000), ang DST takos ba gayod nga dayegon? Ang atong dakong Maglalalang mao ang nagmugna sa mga panahon. Kinsa ang may katungod sa pag-usab niana? Ang gitawag nga daylight saving time maoy usa ka butang nga dili-normal!

I. L., Alemanya

Ang among artikulo wala magdayeg ni magsaway sa DST. Gitaho lamang namo ang makaiikag nga kasaysayan niini. Ang Diyos wala maghatag ug espesipikong mga instruksiyon kon sa unsang paagi angayng iphon ang oras. Busa ang mga sistema sa orasan karon binuotbuot lamang ug dili tinudlo sa Diyos. Ang DST wala mag-usab sa mga yugto sa panahon. Tungod niini nga mga butang, mopatim-aw nga kini dili supak sa bisan unsang prinsipyo sa Diyos kon atong iadyas ang atong relo kaduha sa usa ka tuig.​—ED.

Pahiyom Salamat sa pagpatik sa hinungdanong artikulo nga “Pahiyom​—Makaayo Kana Kanimo!” (Hulyo 8, 2000) Ako bug-os miuyon sa gisaysay niini. Nagpahinumdom kini kanako sa paghunahuna nga positibo sa tanang panahon aron ang akong pahiyom mahimong tim-os. Oo, ang pagpahiyom motabang kanato sa pagpakighigala sa uban. Motabang usab kini sa pagwagtang sa mga tensiyon.

P. C., Tsina