“Ilang Pagasalsalon ang Ilang mga Espada nga mga Punta sa Daro”​—Kanus-a?

ANG usa ka iladong estatwa sa Hiniusang Kanasoran sa New York City naghulagway sa usa ka tawo nga nagsalsal sa espada nga punta sa daro. Gipasukad kini sa mga tagna sa Bibliya sa Isaias kapitulo 2, bersikulo 4, ug Miqueas kapitulo 4, bersikulo 3. Sa unsang paagi ug kanus-a kining mga pulonga matuman?

Ang dili pa dugayng taho sa The New York Times nagpatik sa pangunang ulohan nga “Pagbaligyag mga Armas sa Kalibotan Misulbong Ngadto sa $30 Bilyones”! Sa 1999 kinsa ang nangunang mga tigsuplay niining daghan kaayong armas? Ang Tinipong Bansa ang nanguna nga may halin nga $11.8 bilyones. Ang ikaduha mao ang Rusya nga kubos sa katunga niana nga kantidad. Bisan pa niana, ang Rusya nakabaligyag halos doble niana sa miaging tuig. Dayon misunod ang Alemanya, Tsina, Pransiya, Britanya, ug Italya. Ang samang taho nagpadayon: “Sama sa nangagi, duolan sa dos-tersiya sa tanang armas ang gibaligya ngadto sa nagakaugmad nga kanasoran.”

Human sa duha ka gubat sa kalibotan ug daghan pang ubang mga gubat sulod sa ika-20ng siglo, nga nagbilin ug gatosan ka milyong patay ug samdan, ang usa makapangutana, “Kanus-a kaha ang mga nasod makakat-on sa pakigdait inay kay sa pakiggubat?” Ang Bibliya nagpakita nga mahitabo kini nga pakigdait “sa kaulahiang bahin sa mga adlaw.” (Isaias 2:2) Sa pagkamatuod, kining tagnaa nagakatuman na, sanglit kapin sa unom ka milyong mga Saksi ni Jehova ang miuyon nga “mahimong mga tinudloan ni Jehova.” Ingong sangpotanan, ang ilang ‘pakigdait dagaya.’​—Isaias 54:13.

Sa dili madugay wagtangon ni Jehova ang tanang hinagiban ug mga gubat ug kadtong nagpasiugda niana, kay iyang ‘laglagon ang mga nagalaglag sa yuta.’ Kon buot nimong mahibalo pa ug dugang bahin niining kahibulongang kausaban, palihog ayaw pagpanuko sa pagkontak sa mga Saksi ni Jehova sa imong dapit o pagsulat sa nahiangayng adres nga gilista sa panid 5.​—Pinadayag 11:18.