Gikan sa Among mga Magbabasa

Santeria Inyong gisugdan ang inyong artikulo sa Pagmata! nga “Ang Panghaylo sa Santeria” (Hulyo 8, 2000) pinaagi sa pagpasabot nga ang Santeria may pagkainila sa Cuba ug maoy gikan sa Cuba nga ang Santeria inanayng gipaila ngadto sa ubang mga nasod. Ug ngani natago diha sa artikulo, atong masabtang ang Santeria gidala sa Aprikanong mga ulipon gikan sa Nigeria ngadto sa tanang kapuloan sa Caribbeano. Ang maong artikulo wala sulata sa usa ka Cubano kondili sa usa nga taga-Mexico. Kini mao ang gitawag ug yellow journalism, ug nagdaot kini sa inyong pagkakatuohan.

V. R., Tinipong Bansa

Wala kami tuyo sa pagpasabot nga ang Santeria “may pagkainila sa Cuba.” Sa kaatbang, gipakita namo nga ang Santeria kaylap nga gituman sa ubang mga bahin sa kalibotan, lakip ang Mexico ug Tinipong Bansa. Bahin sa pagkaylap sa Santeria, ang “Encyclopædia Britannica” nag-ingong ang Santeria maoy usa ka “relihiyosong kulto nga naggikan sa Cuba ug nakaylap ngadto sa nait nga kapuloan . . . Naugmad kini gikan sa mga tradisyon sa katawhang Yoruba (sa modernong Nigeria ug Benin).”​—ED.

Endometriosis Salamat gayod kaayo sa artikulong “Ang Akong Pagpakigbisog sa Endometriosis.” (Hulyo 22, 2000) Nadayagnos usab ako nga may endometriosis ug ako nalisdan gayod kaayo. Ang pipila sa akong Kristohanong mga igsoon wala gayod makasabot kon nganong ako kanunayng masakiton kaayo. Apan human mabasa ang artikulo, sila karon adunay lahing panghunahuna.

G. S., Jamaica

Ang pagbasa bahin kang Deborah Andreopoulos nahisama sa pagbasa sa sugilanon sa akong kinabuhi mismo! Sa daghang katuigan ako nag-antos, ug kining artikuloha maoy tubag sa akong mga pag-ampo. Kana mihatag kanako sa gikinahanglan kaayong pagpalig-on.

J.C.F., Irlandia

Duha ug tunga ka bulan nga miagi, gidayagnos ako nga may endometriosis. Ang labing gipasalamatan nako mao ang pagkahibalo nga wala ako mag-inusara ug daghang babaye ang nagaantos sa samang sakit.

A. W., Guatemala

Salamat sa paghisgot sa epekto sa maong balatian dili lamang diha sa pasyente kondili diha usab sa mga higala ug pamilya. Ang pagkakita sa inyong artikulo mipabati kanako nga si Jehova matinagdanon gayod ug nakasabot kon unsay among ginaantos.

N. A., Canada

Sa pila na lang ka adlaw, ako operahan, ug ang kasinatian ni Deborah Andreopoulos nakapalig-on kanako. Karon sa akong hunahuna maatubang ko ang akong suliran uban ang mas maayong tinamdan.

M. B., Italya

Antartika Ang artikulong “Antartika​—Ang Kataposang Dapit Alang sa Pagpanukiduki” (Hulyo 22, 2000) gibasa ug gibalikbalik pagbasa. Ang atong magsusulat sa Pagmata! sa Australia ug ang dibuhista nakahimog labing nindot nga trabaho! Kana nakapahinumdom sa mga butang sa kagahapon. Panahon sa International Geophysical Year mga 45 ka tuig kanhi, usa ka grupo sa mga siyentipikong taga-T.B. gitahasan nga tun-an ang Antartika. Gikinahanglan ang tulo ka dakong tomo aron isulat ang ilang pagtuon. Ingong usa ka independenteng graphic artist, ako maoy gisuholan aron sa paghimo sa trabaho sa pagdisenyo. Karon ako usa na ka Saksi ni Jehova, ug ako anaa na sa akong ika-16 ka tuig ingong bug-os-panahong ebanghelisador sa maayong balita. Sa gihapon, ako gilibotan sa Antartika, kay adunay daghang hulagway ug mga mapa sa Antartika nga nadispley sa akong estudio. Salamat kaayo tungod sa maong artikulo!

C. M., Tinipong Bansa