Ang mga Damgo ba mga Mensahe Gikan sa Diyos?
Ang Hunahuna sa Bibliya
Ang mga Damgo ba mga Mensahe Gikan sa Diyos?
GIKATAHO nga ang ideya bahin sa disenyo sa makina sa panahi sa imbentor nga si Elias Howe gipasukad sa usa ka damgo. Ang tigkomposo nga si Mozart nag-ingon nga daghang tema sa iyang musika nagsumikad sa mga damgo. Ang kemiko nga si Friedrich August Kekule von Stradonitz miangkon usab nga nakakaplag sa gambalay sa molekulang benzene pinaagi sa usa ka damgo. Kanang mga hitaboa dili man gyod talagsaon. Latas sa kasaysayan daghang kultura nag-isip nga ang mga damgo adunay labaw-tawhanong tinubdan. Ang ubang kultura nagtuo nga walay kalainan sa tawo nga nagmata ug sa tawo nga nagdamgo.
Ang Bibliya naundan sa nagkalainlaing asoy diin ang mga damgo gihubit ingong hinungdanong tinubdan sa impormasyon—usa ka matang sa pagpakigkomunikar sa Diyos. (Maghuhukom 7:13, 14; 1 Hari 3:5) Pananglitan, ang Diyos nakigkomunikar kang Abraham, Jacob, ug Jose pinaagig mga damgo. (Genesis 28:10-19; 31:10-13; 37:5-11) Ang Babilonyanhong Haring Nabukodonosor nakadawat ug matagnaong mga damgo gikan sa Diyos. (Daniel 2:1, 28-45) Busa duna bay maayong katarongan sa pagtuo nga bisan karon ang pipila ka damgo maoy mga mensahe nga gikan sa Diyos?
Mga Damgo nga Gikan sa Diyos
Sa Bibliya, ang dinasig-sa-Diyos nga mga damgo kanunayng nahitabo gumikan sa espesipikong rason. Tinuod, ang nagdamgo usahay dili dayon makasabot sa kahulogan sa damgo. Apan, sa daghang kahimtang ang “Tigpadayag sa mga tinago” mismo maoy nagpatin-aw aron dili kaduhaduhaan ang kahulogan sa damgo. (Daniel 2:28, 29; Amos 3:7) Ang mga damgo nga gikan sa Diyos dili kay makalibog ug pinataka nga maoy kasagarang kahimtang sa normal nga mga damgo.
Usahay, ang mga damgo gigamit sa Diyos aron panalipdan ang mga indibiduwal nga maoy nagdulag hinungdanong papel sa katumanan sa iyang katuyoan. Ang mga tawong padamgohon dili kinahanglang mga alagad sa Diyos. Pananglitan, ang mga astrologo nga miduaw sa batang si Jesus wala mobalik aron makigkita sa mamumunong si Herodes segun sa iyang gihangyo. Ngano man? Nakadawat silag pasidaan pinaagi sa usa ka damgo. (Mateo 2:7-12) Kini naghatag sa amaama ni Jesus, si Jose, ug igong panahon sa pagkalagiw ngadto sa Ehipto uban sa iyang pamilya, isip sanong sa pagtultol nga nadawat usab niya pinaagi sa usa ka damgo. Nakaluwas kini sa kinabuhi sa bata nga si Jesus.—Mateo 2:13-15.
Kasiglohan nga sayosayo niana, usa ka paraon sa Ehipto nagdamgo ug pito ka bus-ok nga mga puso sa mais ug pito ka himsog nga mga baka nga gitandi sa pito ka nanguyos nga mga puso sa mais ug pito ka niwang nga mga baka. Si Jose, nga gitabangan sa Diyos, nagbadbad sa mga damgo sa hustong paagi: ang Ehipto makatagamtam ug pito ka tuig nga kadagaya nga sundan sa pito ka tuig nga kagutom. Kay abanteng nahibalo niini, ang mga Ehiptohanon nakapangandam ug nakapondo ug pagkaon. Kini nakatabang sa pagpreserbar sa mga kaliwat ni Abraham ug sa pagdala kanila ngadto sa Ehipto.—Genesis, kapitulo 41; Gen 45:5-8.
Si Haring Nabukodonosor sa Babilonya nagdamgo usab. Nagtagna kadto sa paggahom ug pagkapukan sa umaabot nga mga gahom sa kalibotan nga dunay direktang epekto sa katawhan sa Diyos. (Daniel 2:31-43) Sa ulahi, nagdamgo siyag lain nga nagtagna sa iyang pagkabuang ug pagkanaulian human niana. Kining matagnaong damgo dunay mas dakong katumanan, nga nagpunting sa pagkatukod sa Mesiyanikong Gingharian, nga pinaagi niana ang Diyos magpalampos sa iyang kabubut-on.—Daniel 4:10-37.
Komosta Karong Adlawa?
Oo, ang Diyos nakigkomunikar sa pipila ka tawo pinaagig mga damgo. Apan gipakita sa Bibliya nga kadto maoy talagsaon ra kaayo. Ang mga damgo dili gayod maoy pangunang paagi sa pagpakigkomunikar sa Diyos. Dihay daghang matinumanong mga alagad sa Diyos nga wala sukad makadawat ug mga mensahe gikan sa Diyos pinaagi sa mga damgo. Ang paggamit sa Diyos sa mga damgo aron makigkomunikar sa tawo ikapanig-ingon sa pagbahin Niya sa Pulang Dagat. Nasayod kita nga gihimo niya kadto kas-a, apan dili gayod kadto mao ang iyang naandang paagi sa pagpakiglabot sa iyang katawhan.—Exodo 14:21.
Giila ni apostol Pablo nga sa iyang panahon ang espiritu sa Diyos naglihok diha sa iyang mga alagad sa daghang talagsaong mga paagi. Si Pablo miingon: “Pinaagi sa espiritu gihatag ngadto sa usa ang pulong sa kaalam, ngadto sa lain ang pulong sa kahibalo sumala sa mao ra nga espiritu, ngadto sa lain pagtuo pinaagi sa mao ra nga espiritu, ngadto sa lain mga gasa sa pagpang-ayo pinaagi sa maong usa ra ka espiritu, ngadto sa lain pa mga pagpalihok sa gamhanang mga buhat, ngadto sa lain pagpanagna, ngadto sa lain katakos sa pag-ila sa inspiradong mga pulong, ngadto sa lain pagsultig lainlaing mga pinulongan, ug ngadto sa lain paghubad sa mga pinulongan.” (1 Corinto 12:8-10) Bisan tuod ang inspirado sa Diyos nga mga damgo wala hisgoti nga espesipiko, daghang Kristohanon dayag nga nakadawat ug inspirado sa Diyos nga mga damgo ingong usa sa mga gasa sa espiritu isip katumanan sa Joel 2:28.—Buhat 16:9, 10.
Bisan pa niana, ang apostol miingon bahin niining espesyal nga mga gasa: “Kon aduna may mga gasa sa pagpanagna, kini sila wagtangon ra; kon aduna may pagsultig lainlaing mga pinulongan, kini sila mohunong; kon aduna may kahibalo, kini wagtangon ra.” (1 Corinto 13:8) Sumala sa mabatonang ebidensiya, lakip sa mga gasa nga “wagtangon ra” mao ang nagkadaiyang matang sa pagpakigkomunikar sa Diyos. Human sa kamatayon sa mga apostoles, ang Diyos mihunong na sa pagpasa niining espesyal nga mga gasa ngadto sa iyang mga alagad.
Karon ang mga eksperto naningkamot gihapon sa pagbadbad sa proseso sa pagdamgo ug kon kini mapuslan ba o dili. Ang Bibliya wala magpatin-aw sa maong mga isyu. Bisan pa niana, ngadto kanilang moinsistir nga makigkomunikar sa Diyos pinaagi sa ilang mga damgo, ang Bibliya nagpasidaan. Sa Zacarias 10:2, kini nag-ingon: “Ang mga tigpanag-an, . . . nagsultig mga damgo nga walay kapuslanan.” Nagpasidaan usab ang Diyos batok sa pagpangitag mga tilimad-on. (Deuteronomio 18:10-12) Sa kahayag niining mga pasidaana, ang mga Kristohanon karon dili magdahom nga makadawat ug diyosnong paggiya pinaagi sa ilang mga damgo. Hinunoa, yanong isipon nila ang mga damgo ingon nga butang nga masinati sa pagkatulog.