Gikan sa Among mga Magbabasa

“Chemical Sensitivity” Ako 17 anyos, ug buot kong magpasalamat kaninyo sa seryeng “Komon nga mga Kemikal​—Kini ba Nakahatag Kanimog Sakit?” (Agosto 8, 2000) Bag-o lang akong nadayagnos nga may multiple chemical sensitivity (MCS), ug nakapahupay kaayo kanako ang pagkasayod nga dili lang kay ako ra ang nag-antos sa maong makauulaw nga mga simtoma.

S. C., Italya

Ang mga artikulo nga inyong gipatik kaniadto nga may ulohang “Nagamasakit Ka ba Tungod sa Polusyon?” (Nobyembre 8, 1983) naundan ug nagaluwas-ug-kinabuhi nga impormasyon. Tungod niining grabeng sakit dili kami makaapil sa makapadasig nga asosasyon uban sa atong espirituwal nga pamilya ug sa sosyal nga kalihokan. Apan, kini maoy sakit nga dili kaayo masabtan ug mapakitaag kamabination. Ang inyong kinaulahiang mga artikulo naghubit kon unsa gayoy gibati sa mga tawong nag-antos niini.

M. J., Pransiya

Nasakit ako ug kapin sa usa ka tuig una ako makakitag doktor nga makatabang nako. Nianang panahona, ang akong mga higala maluloton ug dili hinawayon, apan nahibalo ko nga sila wala gayod makasabot. Busa ako nagpasalamat kaninyo tungod niining mga artikuloha. Makapalipay kaayo nga ania sa usa ka organisasyon nga nalamdagan bahin sa daghang butang.

S. B., Tinipong Bansa

Ako nag-antos sa MCS ug wala pa sukad makabasa ug ingon ka detalyado, timbang kaayo nga paghisgot sa kahimtang ug sa mga sangpotanan niini. Giganahan ko sa “reseta” nga gugma ug katawa ingong tabang sa pagsagubang. Mapuslanon usab ang mga pahinumdom nga magmakataronganon sa akong mga panahom sa uban.

D. G., Tinipong Bansa

Ingong usa sa mga Saksi ni Jehova, nag-alagad ako ingong nagapanawng magtatan-aw sulod na sa napulo ka tuig ug nakahibalag ug ubay-ubay nga nag-antos sa MCS. Tataw kaayo nga tinuod kini nga balatian ug dili lamang tipik sa ilang handurawan. Ingon sa naandan, ang Pagmata! dili lamang naghubit sa balatian kondili naghatag usab ug praktikal nga mga sugyot kon sa unsang paagi ikapakita ang kalulot, gugma, ug kaluoy ngadto sa mga nag-antos niini.

T. M., Tinipong Bansa

Dayandayan sa Lawas Ako nagsulat agig balos sa inyong artikulong “Ang Hunahuna sa Bibliya: Dayandayan sa Lawas​—Kinahanglan nga Magmakataronganon.” (Agosto 8, 2000) Ang kahimut-anang dayandayan sa lawas maanindot​—usa ka tinuod nga buhat sa arte. Tingali ako hukman ug pinigon sa katilingban tungod sa akong hitsura, apan ako nasayod nga ako hiligugmaon sa panan-aw sa Diyos. Ako nanghinaot ug nag-ampo nga ang uban dili magtagad sa akong mga patik kondili sa kon unsa ako sa sulod nga pagkatawo.

K. M., Tinipong Bansa

Giadmitir sa artikulo nga usa ka personal nga desisyon kon himoon man o dili sa usa ka tawo ang pagpapatik ug dayandayan sa iyang lawas. Bisan pa niana, ang usa ka paagi nga ikapakita sa usa ka tawo nga siya matahom sa sulod maoy pinaagi sa ‘pagdayandayan sa iyang kaugalingon uban ang pagkamakasaranganon ug maayong panghunahuna.’ (1 Timoteo 2:9) Tin-aw usab nga gipakita sa Bibliya nga ang usa ka Kristohanon obligado sa pagkonsiderar dili lamang sa iyang tanlag kondili “nianang sa laing tawo.” (1 Corinto 10:29)​—ED.

Pinulongan Salamat sa artikulong “Mga Pinulongan​—Mga Tulay ug mga Paril sa Komunikasyon.” (Agosto 8, 2000) Ang mga pinulongan makalingaw gayod kanako, ug ako nakakat-on nag lima ka Uropanhong mga pinulongan. Ako nagtuon karon ug Sinhala. Hinunoa, ang nakapaikag kanako mao nga ang pagkat-on ug mga pinulongan makatukod ug tulay ngadto sa ubang mga kultura ug makapaambit sa “putling pinulongan” sa pagtulon-an sa Bibliya!​—Sofonias 3:9.

C. B., Italya

Kaguol Salamat sa artikulong “Ang Kaguol Angay Bang Ipakita?” (Agosto 8, 2000) Ang ulohan nakapatandog sa among mga kasingkasing tungod kay namatyan kamig anak nga lalaki tulo ka tuig ang milabay. Bisan tuod kami mohilak ug maguol gihapon, ang mga artikulong sama niini naghatag kanamog kusog nga makasugakod.

J. A ug L. A., Tinipong Bansa