Naghimaya sa Pakigdait Inay sa Gubat

SUMALA SA GIASOY NI DOROTHY HORLE

Sa 1919, natawo ako sa usa ka pamilya nga Italyano Katoliko sa Wilmington, Delaware, T.B.A. Ang akong mga ginikanan dili hinimba, apan ako ug ang akong duha ka igsoong mga babaye ilang gipasimba. Nakadayeg ako sa dagkong mga simbahan ug sa ilang maanindot nga arkitektura, estatwa, ug pasundayag sa prosesyon.

SA MIDAGAN ang mga tuig, nawad-an ako ug interes sa Katolisismo. Wala ipasiugda sa simbahan ang Bibliya, nga gitamod pag-ayo ug regular nga ginabasa sa akong amahan. Natugaw ako sa mga pahibalo sa simbahan nga nagngalan sa mga nag-amot ug sa kantidad nga ilang giamot. Usab dihay hulungihong bahin sa badlongong mga pari. Sa edad nga 15, dili na ako aktibong Katoliko. Tungod niini daghan na akog panahon sa pagpadayon sa pagpahanas diha sa arte.

Usa ka Karera sa Arte

Sa 1940, sa nag-21 anyos ako, nagpakasal ako kang William Horle, usa ka batan-ong lalaki nga gusto kaayong modibuho ug bisan unsa may kalabotan sa militar​—mga ayroplano, sundalo, pusil, barko. Nalipay si Bill nga usa ako ka pintor, ug gipalitan niya ako sa akong unang mga oil paint. Nagsugod ako sa pagtuon ug mga teknik sa pagdibuho gikan sa iladong mga pintor.

Human sa duha ka tuig nga kaminyoon, gihimong pasatiempo ni Bill ang paggamag gagmayng mga pigurin sa militar gikan sa tingga. Dulaang mga sundalo ba? Dili gayod! Buot niyang maghimog tinuod nga mga obra maestra. Ang ubang mga artisano migamit ug plastik, kahoy, o eskayola, apan mas hanas si Bill sa paggamit ug tingga kay usa man siya ka makinista.

Magdisenyo siya ug pigurin, maghimog molde, ug dayon ang pigurin ihulma diha sa moldeng tingga. Sa ngadtongadto, siya nahanas sa pagtibuok sa iyang minoldeng mga bahin sa pigurin, pagsolda, paglimbas, ug pagpasinaw. Siya sa ulahi mibali sa paggamit ug moldeng gama sa sambog sa paghimog pustiso puli sa mga moldeng gama sa eskayola. Mas sayon maniobrahon ang moldeng gamiton sa pustiso sa pagdugang ug gagmayng detalye.

Inigkahuman sa matag tibuok nga metal nga piyesa, trabaho nako ang pagtibuok sa porma niini. Pinaagi sa maayong pagpanukiduki, nakakita kami ug mga hitsura sa mga uniporme sa militar nga gigamit kaniadto​—ngadto sa mga butones, mga sinapid nga dekorasyon, mga tsapa sa ranggo sa opisyal, ug mga kolor.

Pinaagi sa tabang sa lente, ako kining pintalag oil paint ug mga pintal nga motapot sa metal. Tungod niini ang among mga pigurin buhi tan-awon. Gikan sa among gamayng silong sa Philadelphia, Pennsylvania, nakagama kami ug Amerikanong mga Indian, mga sundalo sa Giyera Sibil, mga Marine sa T.B., mga kabayo ug mga magkakabayo sa panahon ni Napoleon, Ehiptohanong mga sundalong Sultan, taga-Algeria nga mga sundalong Pranses, ug uban pa.

Dayon si Bill nakadawat ug imbitasyon gikan sa Marine Corps sa T.B. aron sa paghimog pigurin sa unang tropa sa mga marino nga nagkabayo sa Peking (karon Beijing), Tsina, una pa sa 1939. Nagpadayon kami sa paggama niini, ug sa 1954 among gipresentar kini ngadto sa Smithsonian  Institution sa Washington, D.C. Unya sa milabay ang mga tuig, si Presidente Lyndon Johnson mihangyo kon mahimo ba kining ibalhin ngadto sa White House. Siyempre, misugot mi.

Wala gayod namo ipamaligya ang among mga pigurin, apan nanghatag si Bill ug ginatos. May pagdayeg nga gihisgotan kami diha sa daghang libro bahin sa pigurin nga mga sundalo. Ang among mga obra gidispley sa World’s Fair niadtong 1965 sa Flushing Meadow, sa Queens, New York. Ang mga museyo nanghangyo nga padad-an namo sila sa among mga pigurin. Si Bruce Catton, usa ka historyador sa Sibil nga Gubat sa T.B., migamit ug daghang diorama ug mga pigurin nga among ginama aron himoong ilustrasyon diha sa iyang mga libro.

Nagkadaghan ang mga Pangutana Bahin sa Kinabuhi

Apan, sa hapit na akong mag-40, ang mga butang nagsugod sa pagbag-o alang kanako. Nagsugod ako sa pagkalibog bahin sa Diyos. Sa usa ka Adlaw sa Pasko, lima ka Katolikong bata namatay sa sunog sa balay samtang nanimba ang ilang mga ginikanan. Ako nangutana, ‘Nganong itugot sa Diyos nga mahitabo kana panahon sa iyang adlawng-natawhan?’ Nakakita ako ug libro nga nag-asoy bahin sa mga kapintasan nga nahimo sa Holocaust sa Hudiyo. Kini ug ang ubang makalilisang nga mga hitabo sa kalibotan nakapukaw kanako sa pagpangutana, ‘Hain ang Diyos? Wala niya buhata ang angay niyang buhaton!’

Gikan sa panig-ingnan sa akong amahan sa miagi, nagtuo ako nga ang tubag tingali anaa sa Bibliya. Busa miadto ako sa kombento sa Katoliko duol sa among balay sa Philadelphia ug nakigsabot nga makigkita sa pari aron hisgotan ang Bibliya. Dugay akong naghulat, apan wala siya magpakita. Matag semana sa upat ka semana, miadto ako sa kombento apan wala gayod ako makaestorya sa pari.

Usa ka gabii, kay naguol gumikan sa kahigawad, mihangad ako sa langit ug miampo: “Wala ako makaila kon kinsa ka. Wala ako mahibalo kon unsang relihiyona ang imong gianiban, apan nahibalo ako nga anaa ka diha. Palihog pailha ako kon kinsa ka!” Wala magdugay, miabot sa akong pultahan ang mga Saksi ni Jehova.

Usahay, makakita ako ug mga Saksi nga magparking sa ilang mga sakyanan, manaog sa ilang sakyanan, ug mangadto sa lainlaing mga pultahan. Bisag wala akoy kasayoran bahin kanila o kon nganong sila moduaw, naikag ako sa ilang misyon.

Niadtong adlawa sa 1961 sa dihang miduaw ang mga Saksi, naguol pag-ayo ako tungod kay walay tubag ang akong pagpangita sa Diyos. Samtang naglampaso ako sa atubangang pultahan sa akong balay, usa ka edad-edarang babaye nga ginganlag Marge Brion misaka sa hagdanan sa balkon ug nangayog katahoran nako. Wala gayod ako moatubang. Apan samtang naghisgot siya bahin sa yuta nga himoon nga usa ka matahom nga paraiso, namati ako pag-ayo. Sa kataposan siya nangutana, “Namati ka ba nako?”

Akong gibalik ug sulti ang tanan niyang gisulti, apil ang bersikulo sa Bibliya nga iyang gikutlo gikan sa Isaias 55:11. Dayon miatubang ako, gikawhat ang iyang bukton, ug miingon, “Dali, dayon!” Iya akong gihatagan sa akong unang Bibliya ug ang giya sa pagtuon nga Gikan sa Paraisong  Nawala Ngadto sa Paraisong Nabatonan Pag-usab. Iya usab akong gitanyagan ug regular nga panaghisgot sa Bibliya​—ang mismong matang sa pagtuon nga akong gilaomang ihatag kanako sa Iglesya Katolika.

Sa duha ka sesyon matag semana, kusog ang akong pag-uswag sa akong pagtuon sa Bibliya. Wala madugay, matin-aw nga akong nakaplagan ang kamatuoran. Ang pagkahibalo sa ngalan sa Diyos, si Jehova, emosyonal kaayo nga kaagi alang kanako. (Salmo 83:18) Hunahunaa lang​—kini mao ang Diyos nga gipangandoy nakong mailhan sukad pa sa pagkabata! Akong nakat-onan usab nga ang iyang Anak, si Jesu-Kristo, dili maoy usa ka misteryosong bahin sa tulo ka persona nga diyos. (Juan 14:28) Wala madugay, nagsugod na ako sa pagtambong sa Kristohanong mga tigom sa mga Saksi ni Jehova ug nangandoy nga mahimong bug-os-panahong magwawali sa mensahe sa Bibliya.

Mihimog Hinungdanong mga Pagpili

Karon giatubang nako ang akong labing dakong pagsulay. Bungkagon ba nako ang tem sa tighimog obra maestra nga si William ug Dorothy Horle? Unsaon nako pag-alagad sa Diyos sa pakigdait ug sa iyang Anak, ang Prinsipe sa Pakigdait, samtang naghimaya sa gubat pinaagi sa arte? (Isaias 9:6) Dili ba si Jehova nagsaad nga iyang “pahunongon ang mga gubat hangtod sa kinatumyan sa yuta”? (Salmo 46:9) Busa nganong ipadayon ang usa ka butang nga pagataposon sa Diyos? Ug dili ba si Isaias nagtagna nga ang katawhan sa Diyos “magsalsal sa ilang mga espada nga mga punta sa daro” ug dili na makakat-on pa ug gubat? (Isaias 2:4) Dugay akong namalandong ug nag-ampo. “Dili na ako mahimong magpadayon sa pagpamintal niana!” midesisyon ako. Sa Abril 25, 1964, akong gipasimbolohan ang akong dedikasyon kang Jehova nga Diyos pinaagi sa bawtismo sa tubig.

Si Bill kanunayng maghisgot nga naguol kaayo siya nga moabot ra ang adlaw nga kami magbulag diha sa kamatayon. Sa nagsugod ako sa pagtuon sa Bibliya, ako siyang gisultihan: “Bill, kita mahimong mabuhi nga walay kataposan diha sa bag-ong kalibotan sa Diyos!” (Isaias 25:​8; Pinadayag 21:​4, 5) Abi niya ug nabuang na ako. Sa dihang akong gisaysay nga dili na motugot ang akong konsensiya nga mamintal pa ako ug mga pigurin sa militar, siya nasuko ug nanghulga nga iya akong biyaan. Sa ulahi iya gayod akong gibiyaan.

Si Bill naghimog mga pigurin sa militar nga siyasiya na lang sa daghang tuig. Apan wala siya mobalhin sa layo, ug mapaluyohon kanunay siya nako ug sa among anak nga si Craig, nga natawo sa 1942. Sa 1988, si Bill mibalik, ug kami nag-uban sulod sa napulo ka tuig hangtod siya namatay.

Kasamtangan, sa 1966, akong nakab-ot ang akong tumong nga mahimong payunir. Sukad niadto, wala gayod ako molingi ug balik. Nakapribilehiyo ako sa pagtuon sa Bibliya uban sa akong magulang nga babaye. Iyang gidawat ang mga pagtulon-an niini, ug siya nagpabiling aktibong Saksi hangtod niining adlawa. Ang akong amahan namati sa mensahe sa Bibliya ug sulod sa duha ka semana nagsugod sa pagtambong sa mga tigom sa Kingdom Hall. Sa edad nga 75, siya gibawtismohan, ug siya nagpadayong matinumanon sa Diyos hangtod nga siya namatay sa edad nga 81. Ang akong inahan usab midawat kang Jehova ingong iyang Diyos, bisan pag namatay siya una pa siya nakapahinungod. Siya hapit nang mag-94.

Sulod sa daghang tuig, gipanalangin akog dako ni Jehova, ang Diyos sa pakigdait. Karon sa edad nga 81, payunir gihapon ako, bisan tuod maglisod ako sa paglakaw. Sama ako ug gibati ni apostol Pablo, kinsa nagsulat: “Ako mapasalamaton kang Kristo Jesus nga atong Ginoo, nga naghatag ug gahom kanako, tungod kay siya nag-isip kanako nga kasaligan pinaagi sa pagtudlo kanako sa usa ka ministeryo.” (1 Timoteo 1:12) Pagkamahimayaong ministeryo ang akong nahimo! Daghan sa akong gitun-an sa Bibliya nagsakripisyo sa ilang kaugalingon aron makaalagad sa atong maluluy-ong Diyos.

Naguol gayod ako nga ang ubang membro sa akong pamilya wala mosanong sa kamatuoran sa Bibliya. Tingali sa ngadtongadto daghan pa ang mosanong. Apan sa akong bahin ang mga pulong ni Jesus nakitang tinuod nga ang iyang mga tinun-an “makabaton ug usa ka gatos ka pilo karon niining yugtoa, sa mga balay ug mga igsoong lalaki ug mga igsoong babaye ug mga inahan ug mga anak.” (Marcos 10:30) Tinuod nga gipadato gayod ako ni Jehova. Pagkadakong kadungganan ug kalipay ang pagbaylo sa dungog ug gubat alang sa Diyos ug pakigdait!

[Hulagway sa panid 22]

Uban kang Heneral L. C. Shepherd, Jr., sa 1954

[Credit Line]

Defense Dept. photo (Marine Corps)

[Hulagway sa panid 23]

(Aktuwal nga gidak-on)

[Hulagway sa panid 24]

Sa edad 81, payunir na ako kapin sa 30 ka tuig