Gikan sa Among mga Magbabasa

Pamatuod sa Kalalangan Nagtrabaho kauban sa mga siyentipiko sa daghang tuig, kanunay akong maglagot sa mga pangangkon nila nga ang pagtuo sa paglalang maoy tuman ra ka yano. Ang seryeng “Pagtan-aw ug Labaw pa Kay sa Makita sa Imong mga Mata” (Agosto 22, 2000) maoy tukmang tubag sa maong mga pangangkon. Sa pipila lang ka panid, gitagana ninyo ang makapakombinsir nga pamatuod sa paglalang. Ang Pagmata! angayng dayegon tungod sa dekalibre nga pagsulat ug pagpanukiduki niini.

B. E., New Zealand

Ako nagtuon sa Bibliya uban sa mga Saksi ni Jehova, ug ang akong pagtuo sa paglungtad sa Diyos nalig-on gayod sa dihang akong gisusi ang impormasyon bahin sa mga atomo, selula, ug DNA.

T. K., Hapon

Makasaysay na ako karon kon nganong duna kitay mga balangaw, kon nganong berde ang mga sagbot, ug kon unsa ang atomo! Bisan tuod ang Pagmata! dili magasin sa siyensiya, nagpunting kini sa siyentipikanhong ebidensiya nga nagpaluyo sa pagtuo sa usa ka Maglalalang.

M. F., Tinipong Bansa

Pagkaayo nga Walay Pag-abono ug Dugo Ang artikulong “Tungod sa Tanlag” (Agosto 22, 2000) nakatukbil gayod kanako. Ingon gayod niini ang akong kahimtang sa dihang ako gidayagnos nga dunay grabeng promyelocytic leukemia. Ang nahitabo kanako human niadto halos ingon gayod sa nahitabo kang Darlene. Giingnan ako nga mabuhi na lang akog pipila ka adlaw. Kadto maoy tulo na ka tuig kanhi.

A. B., Alemanya

Seksuwal nga Panghasi Gusto kong apresyahon ang artikulong “Mga Batan-on Nangutana . . . Sa Unsang Paagi Masagubang Nako ang Seksuwal nga Panghasi?” (Agosto 22, 2000) Sa eskuylahan bisag unsa na lay ingalan kanako sa mga estudyante kay dili man lagi ako moapil-apil sa imoral nga panggawi. Human sa hayskul, abi nakog mahunong na ang panghasi, apan dihay daghang babaye nga maparaygong magpadungogdungog kanako. Ang pagpahibalo sa akong Kristohanong mga tinuohan nakatabang nako sa pagsagubang sa maong mga panental. Salamat sa paghatag kanamo niining espirituwal nga pagkaon.

H. C., Zambia

Nakatabang gayod ug dako ang artikulo. Ang akong klasmet nga batang lalaki sa tersero-grado magsigeg tutok nako. Karon nahibalo na ako kon unsay angay nakong buhaton.

H. K., Tinipong Bansa

Miabot kini sa hustong panahon! Nag-antos ako sa seksuwal nga panghasi sa akong trabahoan. Gisamokan na ako. Sa dihang halos dili na nako maagwanta, kining artikuloha miabot. Karon mahibalo na ako kon unsaon pagpakiglabot ang mga tawo sa akong trabahoan.

L. T., Tinipong Bansa

Rusong Siyudad Sanglit ang akong kompaniya dunay internasyonal nga negosyo, ganahan akong mobasag mga artikulo bahin sa nagkalainlaing nasod. Ang akong kauban sa trabaho dunay anak lalaki nga nagpuyo sa Rusya, busa gisultihan nako siya bahin sa artikulong “Pagduaw sa ‘Labing Karaang Siyudad sa Rusya.’” (Agosto 22, 2000) Nahinam siya pagdawat niana, ug human niyag basa niini nangayo siyag laing kopya sa Pagmata! Gihatag ko kaniya ang isyu sa Mayo 22, 2000, nga may artikulong “Usa ka Talagsaong Relo sa Prague.” Kadto misangpot nga midawat siyag suskrisyon sa Pagmata! Salamat sa pagtagana sa maong hinungdanong impormasyon.

S. O., Tinipong Bansa

Daghag-Sabaw nga Linat-an? Naghunahuna ko nga sulayan ang resipe nga Hungarianong linat-an sa artikulong “Ang Lamas nga Gikan sa Pikas nga Bahin sa Kalibotan.” (Septiyembre 8, 2000) Maayo kaayo ang akong pagpreparar hangtod nga kini nag-ingon nga tib-ogan ug duha ka litrong tubig. Ang akong linat-an morag sabaw na lang tan-awon imbes linat-an sumala sa gipakita sa hulagway. Nasayop ba ako sa pagsabot sa resipe?

L. P., Canada

Wala, kami ang nasayop sa pagtawag niini nga linat-an, kay ang resipe sa tinuoray maoy usa ka sabaw nga Hungariano. Ang ubang mga basahon sa pagluto nagsugyot nga mogamit lang ug diyutayng tubig kay sa among giingon. Apan, makapaikag, gisulayan sa ubang mga magbabasa ang resipe ug misulat nga gilamian gayod sila niini!​—ED.