Unsay Kaugmaon sa Relihiyon?

TALAGSAON ang pagtungha pag-usab sa relihiyon diha sa mga nasod sa kanhing Unyon Sobyet. Sa Rusya lamang, 50 porsiyento sa populasyon ang nagtawag karon sa ilang kaugalingon nga Ortodokso, ug minilyon ang dumadapig sa ubang mga relihiyon. Ang Islam, Judaismo, ug Budhismo nalakip sa dugay nang naestablisar, ug ang mga Saksi ni Jehova usab duna nay hataas nga kasaysayan didto.

Ingon ka sayo sa 1891, ang mga hawas sa mga Estudyante sa Bibliya, ingon sa pagtawag kaniadto sa mga Saksi ni Jehova sa wala pa ang 1931, mibisita sa Kishinev, Rusya (karon Chisinau, Moldova). Gihimo didto ang mga panagkatigom uban sa mga isigkamagtutuo. Sa 1928, si George Young, usa ka linaing hawas sa mga Estudyante sa Bibliya, nakigkita sa mga opisyal sa Sobyet sa Moscow, Rusya, sa pagkuhag permiso sa pagpatik ug literatura sa Bibliya sa Unyon Sobyet. Sa ulahi, nainila na ang mga Saksi tungod sa mga paninguha sa Sobyet sa pagpapha kanila.

Sa dihang kalit nga nabungkag ang Unyon Sobyet duolag napulo ka tuig kanhi, nagsugod sa paghunahuna ang mga tawo, ‘Ngano mang buot paphaon sa mga Sobyet ang relihiyon?’ Daghang nadoktrinahan kaniadto sa ateyismo sa daghang katuigan interesado nang magpakisayod kon unsa kahay ikatanyag sa relihiyon. Ang Bibliya, nga gipugngan ingong gidiling literatura, nasudlan ba gayod ug mga tubag sa mga problemang giatubang sa katawhan? Gisusi kini mismo sa mga Ruso.

Usa ka Lahi nga Relihiyosong Problema

Ang interes nga gipakita sa daghan kaayo nganha sa Bibliya nagpatunghag lahing matang sa relihiyosong problema sa kanhing Unyon Sobyet. Sa miaging tuig, ang mantalaang Guardian sa London, Inglaterra, nag-ingon: “Ang ‘gubat batok sa Diyos’ nahuman na tingali, apan usa lamang ka dekada human sa makauulawng kaparotan sa unang nag-angkon nga ateyistang nasod sa kalibotan, mao pa lang tingaliy pagsugod sa usa ka bag-ong relihiyosong panagbangi sa Rusya.” Unsa ba kining gitawag ug relihiyosong panagbangi nga gihisgotan sa mantalaan?

Sumala sa giingon sa among nag-unang artikulo, nakigtambayayong ang Ortodoksong Iglesya sa Rusya sa mga pangulo sa Sobyet aron makalahutay ug makadawat ug mga pribilehiyo. Gibatbat sa The Guardian ang pagpadayon sa maong kalambigitan, nga misaysay: “Sulod sa milabayng 10 ka tuig giugmad usab sa iglesya ang usa ka dili-angayng suod nga relasyon uban sa wala pa mareporma nga nasod nga nagpugong niini kanhi, nga kanunayng nagpaluyo sa gobyerno sa Rusya (pananglitan, ang pag-uyon sa Patriarka sa gubat sa Chechnya) ug sa baylo nagbaton ug dakong politikanhong impluwensiya.”

Ang Los Angeles Times sa Pebrero 10, 1999, nagdani sa pagtagad ngadto sa paggamit sa iglesya sa politikanhong impluwensiya sa mikomento kini bahin sa Balaod sa Kagawasan sa Konsensiya ug Relihiyosong mga Kapunongan. Miingon ang Los Angeles Times nga kining balaora, nga gipirmahan sa kanhi Presidente nga si Boris Yeltsin sa Septiyembre 1997, “gipasiugda sa Ortodoksong Iglesya sa Rusya.” Gipaboran sa maong balaod ang iglesya ingong usa ka “tradisyonal” nga relihiyon, apil sa Islam, Judaismo, ug Budhismo. Lakip sa uban pang mga butang, ang maong balaod nagsugo nga kinahanglang irehistro pag-usab ang relihiyosong mga organisasyon sa Rusya.

Gitaho sa The New York Times sa Pebrero 11, 1999, nga human gipasaka ang maong balaod, “giipit sa Ortodoksong Iglesya ang mga kaindig niini.” Midugang ang Times: “Sa miaging Agosto, si Aleksei II, Patriarka sa Ortodoksong  Iglesya sa Rusya, nagsugyot nga idili ang pagpangombertir sa mga relihiyon, ilabina kadtong misulay sa paghaylo sa mga tawo nga mobulag gikan sa ‘mga relihiyon sa ilang mga katigulangan.’” Sukad niadto, nagpadayon ang mga paningkamot nga idili ang gitawag nga pagpangombertir sa mga relihiyon, nga miresulta sa gihubit nga “relihiyosong panagbangi.”

Usa sa Gipuntirya

Ang mga Saksi ni Jehova usa sa pangunang gipuntirya sa pag-atake nga gipangunahan sa Ortodoksong Iglesya sa Rusya. Sa Hunyo 20, 1996, gihatagag pagtagad sa piskaliya sa Moscow ang usa ka kaso nga gipasaka sa kontra-kulto nga Komite Alang sa Pagpanalipod sa mga Batan-on Batok sa Bakak nga mga Relihiyon. Bisag sublisubling gisuspenso una ang maong kaso tungod kay walay ebidensiya nga may nahimong kriminal nga buhat ang mga Saksi, matag panahon gibuksan kini pag-usab.

Sa kasamtangan, ang mga Saksi maoy gipuntirya sa nagpungasi nga mga propaganda. Ang Komsomolskaya Pravda, usa ka mantalaan sa Rusya nga may sirkulasyon nga 1,200,000, miingon diha sa isyu niini sa Nobyembre 21, 1998: “Sulod lamang sa duha ka tuig, giluwatan sa Ortodoksong Iglesya sa Rusya ang kapin sa napulo ka libro, mga brosyur, ug mga manuwal nga ‘gipahinungod’ sa katilingban sa mga Jehovista.” Nganong determinado man ang iglesya sa pagsulay sa pagpakaulaw sa mga Saksi?

“Malagmit,” mipadayon ang Komsomolskaya Pravda, “kini sa panguna maoy tungod kay sa milabay lamang nga pito ka tuig kapin, midaghan ang mga membro sa maong organisasyon ug napulo ka pilo, ug ang Ortodoksong Iglesya sa Rusya, sama sa ubang herarkiyang organisasyon, dili gustong may mga kaindig.”

Sayo sa 1999 sa dihang gibuksan pag-usab ang kaso sa korte batok sa mga Saksi, nakadani kini sa pagtagad sa tibuok kalibotan. Kini ang mabasa sa usa ka ulohang balita sa New York Times sa Pebrero 11: “Gitimbangtimbang sa Korte sa Moscow ang Pagdili sa mga Saksi ni Jehova.” Nag-ingon ang artikulo: “Ang kaso nga gipasaka karon sa korte sibil sa Moscow, nga gihusay diha sa usa ka gamayng sala sa korte, gibantayan pag-ayo sa mga grupong relihiyoso ug tigpaluyo sa tawhanong mga katungod nga mao ang unang dayag nga pagsulay sa paggamit sa [Balaod sa Kagawasan sa Konsiyensiya ug Relihiyosong mga Kapunongan] sa pagpugong sa pagsimba.”

Si Lyudmila Alekseyeva, presidente sa International Helsinki Federation, nagpatin-aw kon nganong gibantayan pag-ayo ang paghusay sa mga Saksi. Siya nag-ingon nga kon “magmalamposon niining kasoha” kadtong mosulay sa pagsumpo sa mga Saksi ni Jehova, nan “sayon na lang unya alang kanila ang pag-atake sa uban pang mga grupo” nga gihubit usab ingong dili-tradisyonal nga mga relihiyon. Hinuon, ang husay gisuspenso una hangtod sa Marso 12, 1999. Apan sa pagkasunod bulan, sa Abril 29, ang Ministri sa Hustisya sa Rusya mihatag ug usa ka sertipiko sa pagrehistro alang sa “Administratibong Sentro sa mga Saksi ni Jehova sa Rusya.”

Bisan pa niining pagtugot gikan sa gobyerno, ang mga pag-atake batok sa mga Saksi ug sa uban pang gagmayng relihiyosong pundok nagpadayon gihapon sa Rusya ug sa uban pang kanhing mga republika sa Sobyet. Si Lawrence Uzzell, direktor sa Keston Institute sa Oxford, Inglaterra, miingon nga “takos gayong bantayan ang mga Saksi ni Jehova” tungod kay ang mahitabo kanila magsilbing “usa ka unang timailhan.” Sa pagkatinuod, ang hinungdanong mga kagawasan sa relihiyon alang sa tinagpulo ka milyong tawo mao ang nameligro!

Dili-Makataronganong Pag-atake

Sa unang siglo, gilutos sa mga pangulong saserdote ug sa uban pang relihiyosong mga lider ang mga sumusunod ni Jesus. (Juan 19:15; Buhat 5:27-33) Ingong resulta, gikaingon kini mahitungod sa Kristiyanidad: “Sa pagkatinuod mahitungod niining sektaha nahibaloan namo nga kini ginasupak bisan diin.” (Buhat 28:22) Busa, dili gayod ikatingala nga ang matuod nga mga Kristohanon karon ginadaot usab, sama sa gibuhat ngadto sa mga Saksi ni Jehova kaniadto.

Apan, human masusi ang ebidensiya batok sa unang mga Kristohanon, si Gamaliel, ang inila nga Pariseo ug magtutudlo sa Balaod, mitambag: “Ayaw panghilabot niining mga tawhana, hinunoa pasagdi lang sila; (tungod kay, kon kining larawa o kining buhata gikan man sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila;) kay kon dili, basin baya hinuon nga makaplagan  kamo nga mga kaaway diay sa Diyos.”​—Buhat 5:​38, 39.

Gihimo usab sa mga kritiko karong adlawa ang mainampingong mga pagsusi sa mga Saksi ni Jehova. Uban sa unsang mga resulta? Si Sergey Blagodarov, nga nag-angkong Ortodokso, miingon diha sa Komsomolskaya Pravda: “Sulod sa yugto nga kapin sa usa ka gatos ka tuig, walay bisan usa ka nasod sa kalibotan ang nakapamatuod sa kriminal nga mga buhat sa bahin sa mga membro sa katilingban niini, o sa pagkailegal sa paglungtad niini.”

Unsay Kaugmaon sa Relihiyon?

Naghisgot ang Bibliya ug “putli nga relihiyon,” o “pagsimba nga hinlo ug wala mahugawi.” (Santiago 1:27a; tan-awa usab ang King James Version.) Sumala sa giingon sa nag-unang artikulo, gihulagway sa Bibliya ang tibuok-kalibotang imperyo sa bakak nga relihiyon ingong usa ka “dakong bigaon . . . kang kinsa nakighilawas ang mga hari sa yuta.” Kining simboliko nga relihiyosong bigaon​—ang “Dakong Babilonya”​—gikaingong “nahubog sa dugo sa mga balaan ug sa dugo sa mga saksi ni Jesus.”​—Pinadayag 17:1-6.

Pagkahaom gayod niini nga paghulagway sa relihiyon nga nakigtambayayong pag-ayo sa politikanhong mga lider sa kalibotan aron mapatunhay ang kaugalingon niining pribilehiyadong kahimtang! Apan, gitino na ang kaugmaon niining dakong simboliko nga relihiyosong bigaon. “Sa usa ka adlaw,” miingon ang Bibliya, “moabot ang iyang mga hampak, kamatayon ug pagbangotan ug gutom, ug pagaugdawon siya sa kalayo, kay kusgan man si Jehova nga Diyos nga maoy naghukom kaniya.” Walay duhaduha nga dinalian ang pasidaan sa manulonda: “Gumula kamo kaniya . . . kon dili kamo buot makadawat ug bahin sa iyang mga hampak”!​—Pinadayag 18:​4, 7, 8.

Sa dihang gibatbat sa tinun-ang si Santiago ang “putli nga relihiyon,” gipaila niya kini ingong ‘wala mahugawi sa kalibotan.’ (Santiago 1:27b) Dugang pa, si Jesu-Kristo miingon mahitungod sa matuod niyang mga sumusunod: “Sila dili bahin sa kalibotan, ingon nga ako dili bahin sa kalibotan.” (Juan 17:16) Busa, nasabtan ba nimo kon nganong nagpabiling bulag ang mga Saksi ni Jehova gikan sa dunot nga mga impluwensiya sa politikanhong mga kalihokan niining kalibotana? Gihimo nila kini tungod sa ilang bug-os nga pagsalig sa saad sa Bibliya: “Ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”​—1 Juan 2:17.

[Mga hulagway sa panid 15]

Ang husay nga gihimo sa Moscow niadtong Pebrero 1999. Ang depensa (wala), ang huwes (tunga), ug ang nagdemanda (tuo)

[Hulagway sa panid 15]

Gibatbat sa Bibliya ang kaugmaon sa tanang relihiyon