Ang “Pagpaniid sa Kalibotan” Gigamit sa Eskuylahan

SI Edelmira, usa ka 15-anyos nga dalagita sa Tinipong Bansa, epektibong naggamit sa magasing Pagmata! sa eskuylahan. Sa usa ka sulat ngadto sa mga magpapatik, siya miingon:

“Matag Biyernes duna mi asaynment sa pagtaho bahin sa kinaulahiang panghitabo. Akong nabasa ang Abril 22, 2000 nga Pagmata! ug mihukom nga ipasukad ang akong taho sa balita diha sa ‘Pagpaniid sa Kalibotan’ nga nag-ulohang ‘Kompaniya sa Tabako Midawat nga ang Pagtabako Moresulta sa Kanser.’ Misulat ako ug sumaryo ug gibasa kana sa klase. Ang magtutudlo ug ang mga estudyante naminaw pag-ayo. Sa dihang ako natapos, gipangutana ako sa usa ka klasmet​—sa atubangan mismo sa klase—​kon dugay ba nakong gipangita ang akong impormasyon. Gihatag ko kaniya ang Pagmata! Maikagon niyang gisugdan sa pagbasa kini, ug usa ka bayongbayong sa among kongregasyon nga klasmet niya sa iyang sunod nga klase miingon nga sa dihang iyang nakita ang dalagita, gibasa pa gihapon niya ang magasin. Karon ang dalagita nag-ingon nga buot niyang makadawat sa matag isyu sa Pagmata! ug sa kauban niini nga Ang Bantayanang Torre.

“Kini nga eksperyensiya naghimo kanakong mapasigarbohon nga ako usa sa mga Saksi ni Jehova. Kini nagtudlo kanako nga kita adunay daghan kaayong kahigayonan sa pagpakigsulti bahin kang Jehova.” Mihinapos si Edelmira sa iyang sulat: “Buot kong magpasalamat kaninyo tungod sa inyong paghago sa pagpatik niini nga mga magasin. Palihog padayona ang pagpatik sa ‘Pagpaniid sa Kalibotan’!”