Gikan sa Among mga Magbabasa

Braille Mga pahalipay tungod sa artikulong “Si Louis Braille​—Naglamdag sa mga Binilanggo sa Kangitngit.” (Septiyembre 8, 2000) Ang prinsipal sa eskuylahan nga akong gitrabahoan may depekto sa panan-aw. Siya nakadayeg kaayo sa dihang gibasahan ko siya sa artikulo. Usa ka kopya sa magasin ang gibutang sa librarya sa eskuylahan.

M.A.S., Brazil

Pagpamalandong Buot kong pasalamatan kamo sa artikulong “Ang Hunahuna sa Bibliya: Ang Matang sa Pagpamalandong nga Mapuslanon.” (Septiyembre 8, 2000) Karon akong nasabtan nga nasaypan ko ang paghanduraw ingong pagpamalandong. Pinaagi sa pagpadapat sa Filipos 4:​8, karon nahibalo na ako sa hustong paagi sa pagpamalandong bahin sa akong mga problema. Daghan kaayong salamat!

W. P., Polandia

Mga “Beaver” Ako 15 anyos ug buot kong pasalamatan kamo sa artikulong “Ang Orihinal nga Mamumutol ug Kahoy Sige Gihapon ug Trabaho.” (Septiyembre 8, 2000) Malingaw ako pagbasa bahin sa mga hayop ug kon sa unsang paagi sila nabuhi. Apan wala gayod ako masayod nga makalingaw diay kaayo ang mga beaver! Nagtuo ako nga ang paagi sa ilang pag-atiman sa ilang kaugalingon ug sa ilang mga pamilya talagsaon kaayo!

S. J., Tinipong Bansa

Ako diyes anyos, ug gibasa ko ang artikulo samtang nagkamping kami duol sa sapa. Mahanduraw ko ang mga beaver didto nga nagsigeg trabaho. Malingaw ako sa mga artikulo bahin sa mga hayop tungod kay sila nagtabang kanako sa pagpabili sa tanang katingalahang mga butang nga gibuhat ni Jehova.

B. P., Tinipong Bansa

Dili Tin-awng Matematika? Buot kong ipaabot sa inyong pagtagad ang giisip kong gamayng sayop diha sa artikulong “Ang Pagtinguha ug Hingpit nga Katilingban.” (Septiyembre 22, 2000) Inyong giingon nga mokabat ug 26 ka tuig ang pagbasag 200 ka tagsa-ka-libong panid nga mga tomo. Sa akong pagkalkulo, mokabat lamang kini ug wala pay upat ka tuig.

P. I., Romania

Salamat sa imong obserbasyon. Bisag tinuod nga mas menos ang panahon nga gugolon sa pagbasag 200 ka tagsa-ka-libong panid nga mga tomo sa usa ka basahon sa mga asoy, ang impormasyong nahipos sa Human Genome Project naglangkit sa pagkasunodsunod sa DNA, nga mas makuti gayod ug makahurot ug panahon ang pagbasa niini.​—ED.

Nagtuo ako nga kamo nakahimog kasagarang sayop diha sa artikulong “Kon Unsay Dili Makita sa Ordinaryong Mata.” (Agosto 22, 2000) Didto naghisgot kamog mga mikroskopyo nga makapadako sa mga butang sa usa ka milyong beses, “nga katumbas sa pagpadako sa usa ka selyo sa koreyo sa gidak-on sa usa ka gamayng nasod.” Ang usa ka milyong selyo sa koreyo maigo kon han-ayon diha sa 1000 por 1000 ka selyo. Ingnon ta nga ang usa ka selyo maoy mga 2.5 sentimetros sa matag kilid, kini maigo lamang sa usa ka kuwadrado nga 25 metros ang matag kilid. Ambot lang kon makakaplag kamog bisan unsang nasod nga ingon niana ka gamay!

R. C., Tinipong Bansa

Imbes hunahunaon nga ang usa ka selyo mahimong han-ay sa 1,000 por 1,000 ka selyo, handurawa ang han-ay sa 1,000,000 por 1,000,000 ka selyo, sanglit ang pagpadako maoy usa ka dimensiyon lamang. Kana motumbas gayod sa usa ka gamayng pulo nga nasod.​—ED.

Biyahe sa Kahanginan nga Hilwas Usa lamang kini ka gamayng sulat sa pagpasalamat kaninyo sa artikulong “Paghimo sa Biyahe sa Kahanginan nga Mas Hilwas.” (Septiyembre 22, 2000) Ganahan kong mosakay sa ayroplano, apan human basaha kining artikuloha, naamgohan ko kon unsa ka dakong trabaho ug panahon ang gigamit sa pagbansay sa mga piloto, nga naghunahuna sa atong kahilwasan.

E. P., Virgin Islands

Kaniwang Sa dihang nakita ko ang ulohang “Mga Batan-on Nangutana . . . Nganong Niwang Man Ako Kaayo?” (Septiyembre 22, 2000), ang akong mga mata napuno sa mga luha. Ako 16 anyos ug motimbang ug 100 libras. Sanglit ako niwang kaayo, mibati ako nga bati ug dili madanihon. Sa dihang gibasa ko ang artikulo, gipabilhan ko ang mapuslanong sugyot nga gihatag niini. Ang konklusyon nakatandog gayod kanako tungod kay kini nagpaamgo kanako nga si Jehova nagatan-aw sa kasingkasing.

E. L., Italya