Terorismo—Hapit Nang Matapos!

USA ka bus sa Jerusalem, usa ka pederal nga tinukod sa Oklahoma City, o usa ka apartment sa Moscow ngatanan mahimong target sa terorismo. Bisan tuod ang mga terorista dayag nga gustong mopasa ug puwersadong mensahe ngadto sa mga politiko, lider sa militar, o lider sa ekonomiya, kasagaran daw walay kalabotan ang ilang kawsa sa ilang target. Sa daghang kaso ang aktuwal nga mga target mao ang ordinaryong mga tawo​—mga tawo nga walay labot sa giangkon nga kawsa sa mga terorista. Nan, nganong ang mga ekstremista modangop sa terorismo?

Nganong Modangop sa Terorismo?

Ang terorismo sistematiko, gipalandong daan, ug gibanabana. Ang moresultang gidaghanon sa mangamatay ug mangaangol dili mao ang pangunang tumong. Ang maong pag-ula ug dugo mapuslanon sa ilang gitinguha nga sangpotanan, bahin sa kahimtang sa kakurat ug kahadlok nga gustong ipatungha sa terorista aron pahuyangon ang awtoridad ug paminawon ang iyang espesipikong kawsa. Tagda ang pipila ka hinungdan sa mapintas nga mga buhat sa mga terorista.

Pagdumot. “Ang terorismo . . . gisugniban sa pagdumot,” matod ni Louis J. Freeh, direktor sa Federal Bureau of Investigation sa T.B. “Kadtong naghambin sa maong pagdumot nagkinabuhi sa kalibotan nga naimpluwensiyahan sa pagkakortog-hunahuna, sa panagkunsabo, ug sa kawalay-alamag.”

Pagdaogdaog. “Sa pagkatinuod, dunay mga lider sa mga grupo sa mga nasod kansang dili-makataronganong mga tumong mao ang pagwagtang sa ubang mga kultura,” misulat si Stephen Bowman diha sa iyang librong When the Eagle Screams. “Apan tin-aw usab nga daghang terorismo ang gipahinabo sa kawalay-paglaom.”

Kahigawad. “Sa daghang kaso . . . ang pangunang nagtukmod sa usa ka terorista mao ang tinuod nga kahigawad sa morag dili mausab nga politikanhon, katilingbanon, ug ekonomikanhon nga mga puwersa,” matod sa editor sa librong Urban Terrorism.

Inhustisya. “Ang terorismo maoy simtoma sa usa ka problema, dili sa aktuwal nga hinungdan,” nag-ingon si Michael Shimoff sa iyang sinulat nga “Ang Polisa sa Terorismo.” Siya nagpadayon: “Ang atong layog-abot nga tumong kinahanglang mao ang pagwagtang sa nagpahiping katilingbanon ug politikanhon nga mga hinungdan sa terorismo. . . . Samtang gikontra nato ang terorismo, kinahanglang himoon nato ang samang panglimbasog sa pagpalambo sa kagawasan, dignidad, hustisya, ug makitawhanong mga prinsipyo. Sa diha lamang nga moepekto kanang maong mga panglimbasog, nga mahimong hunongon na nato ang atong supak-terorismo ug kontra-terorismo nga mga kalihokan.”

Ang mga hinungdan ug kasaysayan sa terorismo nagpamatuod sa giingon sa Bibliya: “Ang tawo nagmando sa tawo alang sa iyang kadaotan.” (Ecclesiastes 8:9) Gitagna gani sa Bibliya ang mga taras nga nagpalambo sa terorismo. Kini nag-ingon: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, . . . walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo.”​—2 Timoteo 3:1-4.

Ang tinuod mao nga ang mga paningkamot sa tawo sa pagpakigbisog sa terorismo, bisag unsa pa ka sinsero, dili molampos sa pagsulbad sa mga hinungdan niini. Ang Bibliya realistikanhong nag-ingon: “Dili iya sa yutan-ong tawo  ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Apan, bisan tuod ang solusyon sa problema sa terorismo dili masulbad sa gahom sa tawo, tinong masulbad kini pinaagi sa gahom sa Diyos.

Ang Sulbad

Kadtong nasaypan o gidaogdaog ug mibatig kahigawad mahupayan sa seguradong saad sa Bibliya: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”​—Proverbio 2:​21, 22.

Kini nga saad sa Diyos matuman na sa dili madugay. Tinoon kana sa iyang Magmamando, ang nagamando nga Haring Jesu-Kristo. Usa ka tagna sa Bibliya nag-ingon bahin kang Kristo: “Siya dili mohukom sumala sa makita lamang sa iyang mga mata, ni mobadlong sumala sa butang nga nadungog lamang sa iyang mga dalunggan. Ug uban sa pagkamatarong siya magahukom sa mga timawa, ug uban sa katul-id siya magabadlong sa mga maaghop sa yuta.”​—Isaias 11:​3, 4.

Oo, ang Anak sa Diyos, si Jesu-Kristo, sa dili madugay magwagtang sa inhustisya maingon man niadtong responsable niana. Sa matarong nga bag-ong sistema sa Diyos, ang tanang matang sa terorismo ug kapintasan mahimong mga butang sa nangagi. Dayon ang tanan dinhi sa yuta magpuyo sa kasegurohan, nga walay kahadlokan nga kadaot.​—Pinadayag 21:​3, 4.

[Hulagway sa panid 12]

Ang Bibliya nagsaad nga sa dili madugay wagtangon sa Diyos ang tanang pagdaogdaog ug inhustisya