Gikan sa Among mga Magbabasa

Uniberso Nalingaw kaayo ko sa seryeng “Ang Uniberso—Sulagma Lang ba nga Mitungha?” (Oktubre 8, 2000) Makaiikag kaayong masayran kon sa unsang paagi gilalang ni Jehova nga Diyos ang tanang butang diha sa organisado kaayong paagi. Tin-awng gipakita sa artikulo nga kita maoy produkto sa paglalang ug dili sa ebolusyon.

E. V., Tinipong Bansa

Pagbiyahe sa Kahanginan nga Hilwas Salamat sa artikulong “Paghimo sa Biyahe sa Kahanginan nga Mas Hilwas.” (Septiyembre 22, 2000) Apan, namatikdan ko nga ang kabin sa piloto nga gipakita dili kabin sa Boeing 747 sumala sa giingon kondili kabin sa Boeing 777.

M. R., Czechia

Wala kami makakuhag mga letrato sa simulator sa Boeing 747. Busa, ang artikulo nag-ingon nga ang simulator sa 747 maoy “susama nianang gipakita.”​—ED.

Stock Market Salamat sa balanseng artikulo nga “Maalamon Bang Mamuhonan sa ‘Stock Market’?” (Oktubre 8, 2000) Tungod sa akong nasinatian nakat-onan ko ang pag-amping bahin sa kaduhaduhaan nga sekretong mga impormasyon maylabot sa pagpalit ug mga aksiyones. Kasagarang motultol kini sa mas dagkong mga alkanse. Sa dili pa mopalit ug mga aksiyones, maalamong timbangtimbangon ang katibuk-ang kahimtang sa merkado.

N. B., Alemanya

Dili ko mouyon sa pangangkon nga ang pagpamuhonan sa stock market maoy dili pagbutang ug pagsalig “sa diyos sa Suwerte.” (Isaias 65:11) Ang pagpamuhonan sa usa ka tawo diha sa usa ka mabalhinong sistema nga naglihok nga dili piho sa katibuk-an maoy sugal.

P. B., Tinipong Bansa

Sa pagkatinuod, ang pagpamuhonan sa stock market dakog posibilidad nga maalkanse. Ug, sama sa ubang mga negosyo, ang dili pihong mga hinungdan nalangkit. Ugaling, dili tukma ang pag-ingon nga ang pagnegosyo ug mga aksiyones maoy sugal. Ang sugal naglakip sa pag-ilisay ug kuwarta nga walay bisan unsang pag-ilisay sa tinuod nga mga baligya. Apan, ang mga aksiyones naghawas sa aktuwal nga bahin sa pagpanag-iyag usa ka negosyo. Busa ang pagnegosyog mga aksiyones mahimong lantawon ingong pagpalit ug pagbaligyag lehitimong mga baligya.​—ED.

Pagkadestiyero sa Siberia Napalig-on ako sa pagkamaunongon ni Stepan ug sa ubang matinumanong Kristohanong mga igsoon nga gihisgotan sa sugilanon ni Alexei Davidjuk, “Akong Pangunang Kabalaka​—Ang Pagpabiling Maunongon.” (Oktubre 8, 2000) Naapektohan ako sa hinungdan sa dili pagkamaunongon sa usa ka igsoon​—“tungod kay siya wala na magbasa ug magtuo sa Bibliya.” Kining mga pulonga naghatag kanako ug bag-ong kusog sa pagpadayon sa regular nga pagtuon sa Balaang Kasulatan.

A. V., Georgia

Peligroso Kaayong mga Esport Niining bag-o lang gihatagan ako ug higayon nga moapil sa hang gliding. Ang tanyag matentalon, apan interesado kaayo ako kon unsay giingon sa Bibliya bahin niining butanga. Pipila ka adlaw sa ulahi, akong nadawat ang tubag pinaagi sa inyong artikulong “‘Peligroso Kaayong mga Esport’​—Angay Mo Bang Ipameligro ang Imong Kaugalingon?” (Oktubre 8, 2000) Ang hang gliding daw kulbahinam gayod nga kasinatian. Apan ang akong relasyon kang Jehova hinungdanon kaayo nga dili ko ipameligro ang akong kinabuhi pinaagi sa pagpakigbahin niana.

M.M.S., Brazil

Nag-ingon mo nga ang pagtental ni Satanas kang Jesus maoy “lagmit diha sa usa ka panan-awon.” Dili ba ang mga tentasyon maoy aktuwal nga mga kasinatian?

C.G.H., Tinipong Bansa

Ubay-ubayng mga bahin sa asoy sa Bibliya ang makapalibog kon sabton nga literal. Pananglitan, walay bukid nga habog kaayo nga ikapakita ni Satanas kang Jesus “ang tanang gingharian sa kalibotan ug ang ilang himaya.” Lagmit nga dili usab motugot si Jesus nga si Satanas literal nga ‘magdala kaniya ngadto sa balaang siyudad’ o magpahimutang kaniya sa ‘ibabawng bahin sa paril sa templo.’ (Mateo 4:5-8) Nan, dayag nga nalangkit ang usa ka matang sa panan-awon. Bisan giunsa pa kana paghimo, ang pagtental ni Satanas kang Jesu-Kristo maoy tinuod. Ang pagdumili ni Jesus sa pagpadaog sa maong tentasyon nagpakita sa iyang dili-mabungkag nga integridad.​—ED.