Ang Honi sa Gugma sa Usa ka Mangloy

SA GITAS-ONG 50 milimetros o menos pa, ang usa ka mangloy maorag dili gayod madanihon. Bisan pa niana, ang honi niini nga mangloy nakadani sa pagtagad sa minilyong tawo sa tibuok kalibotan. Sa unsang paagi moawit kining gamay nga linalang, ug unsay katuyoan?

Makaiikag, taliwala sa gibanabanang 2,400 ka espisye sa mga mangloy, ang laki lamang ang moawit, o motuwit-tuwit. Imbes moawit gikan sa mga tutonlan niini, ang laki nga mga mangloy moawit pinaagi sa ilang mga pako. Ang usa ka ensiklopedia nag-ingon nga ang laki nga mga mangloy motuwit-tuwit pinaagi sa pagbagnos sa bahin sa usa ka pangunahang pako niini diha sa lumbay sa mga 50 ngadto sa 250 ka siwil sa pikas nga pangunahang pako. Ang gidaghanon sa mga tuwit-tuwit nag-agad sa gidaghanon sa mabagnos nga siwil matag segundo. Tungod sa pagkurog ang kahanginan mapuno sa linaing honi sa mangloy.

Apan sa pagkatinuod ang laki nga mangloy dili lamang moawit aron sa paglingaw sa iyang tawhanong mga tigpaminaw! Dili gayod! Ang gitinguha niini nga musikero nga mamati kaniya mao ang usa ka umaabot nga kapikas. Ang librong Exploring the Secrets of Nature mibatbat: “Sa iyang pagpangitag kapikas, ang laki nga mangloy, nga usa ka batid nga tigkomunikar, moawit ug tulo ka lainlaing mga honi: ang usa mao ang pagpahibalo sa iyang presensiya, ang usa mao ang pagpangulitawo ug ang usa mao ang pag-abog sa wala-kinahanglanang mga karibal.” Ang ubang mga mangloy magpadayon sa pag-awit aron ipahibalo ang ilang presensiya hangtod magpakitag interes ang baye nga mangloy. Namati sa honi pinaagi sa “mga dalunggan” diha sa iyang pangunahang mga tiil, ang baye nga mangloy dili kontento sa layog-distansiya nga pagpangulitawo. Samtang iyang duolon ang tinubdan sa tuwit-tuwit, ang laki nga mangloy mosugod sa pag-awit ug walay-bugtong honi, ang honi sa pagpangulitawo. Kini nga harana makadani sa baye ngadto sa nangulitawo kaniya, ug ang duha ka mangloy mag-upahay na.

Sa Sidlakang Asia ang pipila ka tawo nagbuhi ug laki nga mga mangloy tungod kay malingaw sila sa honi niini. Ang uban gustong mamati sa maong honi diha sa naandang puy-anan sa mangloy. Sa bisan unsang palibot, ang awit sa gaming nga mangloy nakadani sa tawhanong mga mamiminaw sa tibuok yuta ug naghatag ug pagdayeg sa Tigdisenyo niini.