Gikan sa Among mga Magbabasa

Mas Maayong Panglawas Ingong usa ka kiropraktor ug rehistradong physical therapist, 21 anyos na ako sa natad sa pagpanambal, nga naghatag ug tabang sa linibo ka pasyente. Ako nabalaka gayod nga daghan niadtong nakabasa sa serye sa hapin nga “Mas Maayong Panglawas​—Unsay mga Kapilian?” (Oktubre 22, 2000) tingali magduhaduhang magpatambal sa kiropraktor tungod kay mahadlok sa posibleng mga kadaot.

A. K., Tinipong Bansa

Inyong gihisgotan nga ang pagpahilot sa liog pinaagig kiropraktor makapaestrok sa pasyente. Usa ako ka kiropraktor kapin na sa 50 anyos, ug wala gayod ako makakita o makadungog bahin niini nga reaksiyon.

B.D.B., Tinipong Bansa

Dili namo tuyong paluyahon ang mga magbabasa nga magpatambal sa kiropraktor kon kini maoy ilang gusto. Ang “Pagmata!” mitaho: “Makahuloganon, diyutay ra ang mga kaso sa daotang mga epekto sa paghilot pinaagig batid nga kiropraktor.” Sa susama usab, ang “Archives of Internal Medicine,” Tomo 158, Nobyembre 9, 1998, nag-ingon bahin sa maong paghilot nga “ang gidaghanon sa grabeng mga komplikasyon gilantugian pa gihapon” ug kana nga “mga banabana anaa sa 1 sa matag 400,000 ngadto sa tali sa 3 ug 6 sa matag 10 ka milyon.” Angay unta namong giklaro nga ang mga komplikasyon tungod sa mga paghilot, nga giingong maglakip sa estrok, panagsa ra gayod nga mahitabo.​—ED.

Daghan kaayong salamat niining seryeha. Dili ako supak sa tradisyonal nga medisina, apan duna akoy makapameligro-sa-kinabuhi nga mga reaksiyon tungod sa mga antibiotiko. Usahay, ang naandang mga doktor maglisod sa pagdayagnos sa akong mga sakit, busa kinahanglan kong modangop sa kapuli nga medisina. Ang mga artikulo nagdasig gayod kanako tungod kay gibugalbugalan ako sa uban tungod sa akong gipili.

S. H., Antigua

Ang kahon sa panid 8 nagkutlo sa usa ka doktor nga nag-ingon nga ang mga tambal nga tanom nga ginkgo biloba ug ang feverfew makabalda sa pagtibug-ok sa dugo sa dihang idungan kini sa giresetang medisina. Parehong gitomar ko kining mga tambal nga tanom, dungan sa giresetang mga medisina. Akong gituohan nga ang tanang tambal nga tanom maoy hilwas kaayo! Kining impormasyona makatabang kanako nga malikayan ang mga suliran sa umaabot.

G. G., Tinipong Bansa

Kontrobersiya Bahin sa Kalendaryo Ang inyong mga artikulo maoy maayong pagkadukiduki ug awtoritatibo; talagsa ra ang mga sayop. Apan, sa pagbasa sa artikulong “Ang mga Viking​—Mga Konkistador ug mga Kolonyalisador” (Disyembre 8, 2000), akong namatikdan ang usa ka teknikal nga sayop. Giingon ninyo nga ang Ingles nga mga ngalan sa pipila ka adlaw gipasukad sa mitolohiya sa Norse. Bisan tuod ang mga Viking nagsimba kang Tyr, Odin, Thor, ug Frigga, ang mga Aleman nagsimba usab kanila nga may diyutay rang kalainan sa mga ngalan. Ilang gidala ang pagsimba niini nga mga diyos ngadto sa Britanya sa dihang ilang gisulong kini niadtong ikalima ug ikaunom nga mga siglo. Busa ang mga adlaw sa semana maoy gikan sa mga Anglo-Saxon.

A. C., Britanya

Ang “The World Book Encyclopedia” ug ang ubang mga tinubdan nag-ingon nga ang mga ngalan alang niining mga adlawa “gikuha gikan sa mga ngalan sa mga diyos sa Norse.” Apan, ang “The Encyclopædia Britannica” nag-ingon nga kining mga ngalana maoy “gikan sa Anglo-Saxon nga mga ngalan sa mga diyos sa Teutonikong mitolohiya.” Ang ubang mga eskolar nagtuo nga kining Anglo-Saxon nga mga ngalan nalangkit sa Karaang Norse nga pinulongan. Bisan unsa pa ang kahimtang, kini maoy butang nga padayon pang debatehan sa mga eskolar.​—ED.

Kasub-anan Daghan kaayong salamat sa artikulong “Mga Batan-on Nangutana . . . Angay Bang May Suginlan Ako nga Ako Masulub-on Kaayo?” (Oktubre 22, 2000) Miabot ang artikulo sa panahon nga ako nagmasulub-on kaayo ug wala masayod sa angayng buhaton. Samtang nagbasa sa artikulo nabati ko nga may nakasabot kanako. Nakigsulti ako sa akong mga ginikanan, sa akong suod nga higala, ug labaw sa tanan kang Jehova. Gitabangan gayod niya ako. Dili ko gayod wad-on ang akong suod nga personal nga relasyon kang Jehova.

A. P., Alemanya