Mga Batan-on Nangutana . . .

Patalinghogan ba sa Diyos ang Akong mga Pag-ampo?

“Mag-ampo ako bahin sa bisan unsang butang tungod kay si Jehova akong higala, ug nahibalo ako nga tabangan niya ako kon aduna akoy problema.”—Andrea.

NAKASEGURO ang batan-ong si Andrea nga patalinghogan sa Diyos ang iyang mga pag-ampo. Apan dili tanang batan-on may samang pagsalig. Gibati sa pipila nga halayo ra kaayo sila sa Diyos aron makaduol kaniya. Basin naghunahuna pa gani sila kon may igo bang pagtagad ang Diyos kanila aron takos nga makaampo.

Unsa ang sekreto sa pag-ampo? Sa yanong pagkasulti, kini maoy pagbaton ug tinuod nga panaghigalaay uban sa Diyos. Ang salmista miampo: “Kadtong nakaila sa imong ngalan mosalig kanimo.” (Salmo 9:​10) Komosta ang bahin kanimo? Nailhan ba nimo pag-ayo ang Diyos aron moampo kaniya ug mosalig nga siya magpatalinghog sa imong mga pag-ampo? Sa dili ka pa mopadayog basa, palihog sulayi sa pagtubag ang mga pangutana sa kahon nga nag-ulohag “Nakaila Ka ba Gayod sa Diyos?” Pila ang imong matubag?

NAKAILA KA BA GAYOD SA DIYOS? Mga tubag atua sa panid 27

1.Unsa ang ngalan sa Diyos, ug unsay kahulogan niini?

2.Unsa ang upat ka pangunang mga hiyas sa Diyos nga gibutyag sa Bibliya?

3.Unsa ang kinadak-ang kapahayagan sa gugma sa Diyos alang sa katawhan?

4.Sa unsang paagi matagamtam nato ang panaghigalaay uban sa Diyos?

5.Unsay angay natong tinamdan sa dihang kita moampo?

Makatubag ka ba ug labing menos pipila sa mga pangutana karon, bisan dili pa nimo tiwasog basa kining artikuloha? Nan mas daghan ka na ug nahibaloan mahitungod sa Diyos kay sa kadaghanang tawo. Hinuon, tingali gipaila sa imong mga tubag nga kinahanglan ka pang mokuhag dugang kahibalo mahitungod kaniya, aron masuod pa nimo siyag maayo. (Juan 17:3) Uban sa maong tumong sa hunahuna, tagda ang pipila lang ka butang nga ginatudlo kanato sa Bibliya mahitungod sa “Tigpatalinghog sa pag-ampo.”​—Salmo 65:2.

Ang Diyos Usa ka Tinuod nga Persona

Una, ang Bibliya nagatabang kanato sa pagsabot nga ang Diyos dili kay usa ka dili-persona nga puwersa. Siya maoy usa ka persona nga may ngalang Jehova. (Salmo 83:18) Sa Hebreohanon kanang ngalana nagkahulogang “Siya Maoy Nagpahinabo.” Siya mahimo sa buot niya nga siya mahimo aron matuman ang iyang katuyoan. Ang usa ka dili-persona nga hugpong sa enerhiya dili makahimo niana! Busa kon ikaw mag-ampo, makaseguro ka nga wala ka makigsulti sa hinanduraw lang nga puwersa o  makigsulti sa hangin. Nakigsulti ka sa usa ka persona, sa usa nga makapatalinghog ug makatubag sa imong mga pag-ampo.​—Efeso 3:​20.

Busa ang batan-ong si Diana nakaingon: “Nahibalo ako nga bisan asa ako, si Jehova magapatalinghog kanako.” Aron mabatonan ang maong pagsalig, kinahanglang tinuod ang Diyos alang kanimo! “Siya nga moduol sa Diyos angay nga motuo nga siya mao,” nag-ingon ang Bibliya.​—Hebreohanon 11:6.

Usa ka Tuboran sa Kaalam ug Gahom

Ang Diyos makatabang gayod kanato tungod kay aduna siyay talagsaong gahom. Walay kinutoban ang maong gahom, ingon sa makita sa kadako ug kakomplikado sa materyal nga uniberso. Ang Bibliya nag-ingon nga nahibalo si Jehova sa ngalan sa matag bituon​—bisag binilyon ang gidaghanon niini! Labaw pa niana, siya mao ang tuboran sa tanang enerhiya nga anaa sa sulod nianang mga bituona. (Isaias 40:​25, 26) Dili ba kana makapahingangha? Apan bisan unsa pa tingali ka makapahingangha kining mga kamatuorana, ang Bibliya nag-ingon nga “kini maoy tipik lamang sa iyang gahom”!​—Job 26:​14, Today’s English Version.

Palandonga, usab, ang walay-kinutobang kaalam ni Jehova. Ang Bibliya nag-ingon nga ang iyang mga hunahuna ‘halawom kaayo.’ (Salmo 92:5) Gihimo niya ang katawhan, ug busa mas nakasabot siya kanato kay sa atong pagkasabot sa atong kaugalingon. (Salmo 100:3) Tungod kay siya naglungtad “gikan sa panahong walay tino hangtod sa panahong walay tino,” siya adunay walay-kinutobang kasinatian. (Salmo 90:​1, 2) Walay bisan unsa nga dili niya masabtan.​—Isaias 40:​13, 14.

Sa unsang paagi si Jehova naggamit nianang tanang gahom ug kaalam? Ang 2 Cronicas 16:9 nag-ingon: “Kon mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” Mao nga wala gayoy problema nimo nga ang Diyos dili makasulbad o makatabang kanimo sa pagsagubang niini. Ang batan-ong si Kayla nahinumdom: “Di pa dugay, sa dihang nagkalisod ang among pamilya, ako miampo kang Jehova, ug gibati kong mitabang siya kanamo nga makalahutay ug makalabang sa mga kalisdanan, mga problema, ug sa mga pagbati nga dili unta maagwanta.” Sa dihang makigsulti ka sa Diyos, ikaw midangop sa tinubdan sa kaalam. Wala nay molabaw pa niana!

Usa ka Diyos sa Hustisya ug Gugma

Apan sa unsang paagi imong mahibaloan nga ang Diyos buot motabang kanimo? Tungod kay gipili ni Jehova nga mailhan siya, dili lamang pinaagi sa iyang dakong gahom o pinaagi sa iyang halawom nga kaalam o bisan pinaagi sa iyang malig-ong hustisya. Hinunoa, si Jehova nailhan gayod tungod sa iyang hiyas nga gugma. “Ang Diyos [maoy] gugma,” nag-ingon ang 1 Juan 4:8. Ug ang maong dakong gugma ang naghatag ug gahom sa pag-ampo. Ang kinadak-ang kapahayagan sa iyang gugma mao ang paghatag sa iyang Anak ingong halad lukat aron nga kita makatagamtam sa kinabuhing walay kataposan.​—Juan 3:​16; 1 Juan 4:​9, 10.

Tungod kay ang Diyos gugma, wala kay angayng kahadlokan nga dili ka niya panumbalingon o tagdon ka niya nga mapihigon. “Ang tanan niyang dalan hustisya,” nag-ingon ang Deuteronomio 32:4. Ang gugma sa Diyos alang kanimo nagapasalig kanimo nga patalinghogan ka gayod niya. Kini ang mopabati kanatong masaligon nga isugid ang atong labing pribadong mga hunahuna ug mga pagbati kaniya.​—Filipos 4:​6, 7.

 Pagpakighigala sa Diyos

Sa pagkatinuod, si Jehova nagdapit kanato nga makigsulti kaniya. Dili niya buot nga mahimo siyang estranyo alang kanato. Sa kasukwahi, sa tibuok nga kasaysayan sa tawo gidapit ni Jehova ang katawhan nga mahimo niyang mga higala. Lakip niadtong nakatagamtam sa pagpakighigala uban sa Diyos, kinsa nakapahimuot sa iyang kasingkasing, mao ang mga lalaki ug mga babaye, mga bata ug tigulang. Apil sa maong mga tawo ang sama ni Abraham, Haring David, ug Maria, ang inahan ni Jesus.​—Isaias 41:8; Lucas 1:​26-​38; Buhat 13:22.

Mahimo ka usab nga usa sa mga higala ni Jehova. Siyempre, ang maong panaghigalaay wala magkahulogan nga lantawon nimo ang Diyos nga samag abyan nga imong masangpit kon duna ka lamay pangayoon o may problema. Ang atong mga pag-ampo dili mahimong isentro sa atong kaugalingong mga panginahanglan lamang. Kon buot nato nga mahimong higala sa Diyos, kinahanglang interesado kita sa iyang kabubut-on​—dili sa atong kaugalingon lamang​—ug kinahanglang buhaton gayod nato ang kabubut-on sa Diyos. (Mateo 7:​21) Busa, si Jesus nagtudlo sa iyang mga tinun-an sa pagsentro sa ilang mga pag-ampo diha sa mga butang nga hinungdanon sa Diyos. Siya miingon: “Busa, mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan. Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’” (Mateo 6:​9, 10) Ang atong mga pag-ampo kinahanglang puno usab sa pagdayeg ug pagpasalamat ngadto sa Diyos!​—Salmo 56:12; 150:6.

Bisan pa niana, kita dili angayng maghunahuna nga ang atong mga panginahanglan o mga kabalaka dili-hinungdanon o gamay ra kaayo nga iapil sa pag-ampo. “Bisag gipaningkamotan kong magmatinud-anon kaniya,” si Steve nag-ingon, “usahay bation ko nga dili ko kinahanglang samokon ang Diyos sa pipila ka gagmayng mga butang.” Kon mosugod ka sa pagbatig sama niana, sulayi sa paghinumdom kon unsay gitudlo ni Jesus sa iyang mga tinun-an: “Ang lima ka goryon ginabaligya sa duha ka sensilyong gamayg bili, dili ba? Bisan pa niana walay usa kanila nga mahikalimtan atubangan sa Diyos. . . . Ayaw kahadlok; kamo labaw pa ug bili kay sa daghang goryon.” (Lucas 12:​6, 7) Dili ba kana makapahupay?

Nan, dali rang hisabtan nga kon labi pa nimong mailhan si Jehova, labi ka pang matukmod nga moampo kaniya ug labi ka pang masaligon nga si Jehova may katakos ug motabang kanimo. Busa, unsa ang angay nimong tinamdan sa hunahuna sa dihang moampo ka sa Diyos? Kinahanglan ka nga matinahoron, mapaubsanon, ug dili-mahakogon. Nagtuo ka bang may taas-ug-ranggong opisyal dinhi sa yuta nga maminaw kanimo kon mohangyo ka sa magarbohon o sa dili-matinahorong paagi? Nan dili ka angayng matingala nga dahomon usab ni Jehova nga tahoron nimo siya ug ang iyang mga sukdanan sa dili pa niya tubagon ang imong mga pag-ampo.​—Proverbio 15:29.

Libolibo ka mahinadlokon-sa-Diyos nga mga batan-on ang nakakat-on sa pagbutyag sa kon unsay anaa sa ilang mga kasingkasing ngadto sa Diyos. (Salmo 62:8) “Sa dihang tubagon ni Jehova ang akong mga pag-ampo,” nag-ingon si Brett, “nagdasig kini kanako nga siya anaa kanunay ingong akong higala.” Komosta ang bahin kanimo? Sa unsang paagi matagamtam nimo ang samang matang sa panaghigalaay uban sa Diyos? Duha ka batan-ong Kristohanon mitanyag sa mosunod nga mga komento:

Rachel: “Aron masuod kang Jehova, gibati ko nga kinahanglang tun-an pag-ayo ang iyang Pulong, ug gipaningkamotan ko nga ugmaron ang pagpangandoy alang sa maong pagtuon.”​—1 Pedro 2:2.

Jenny: “Nagtuo ako nga kon mas puliki ka sa iyang buluhaton, mas masuod ka kang Jehova.”​—Santiago 4:8.

Nahanduraw na ba nimo kon unsa ka mapuslanon ang pag-ampo? Usa ka batan-ong Kristohanon nag-ingon: “Bation ko nga mas suod sa Diyos kon makigsulti siya kanako o magpadala kanakog usa ka mensahe.” Sanglit si Jehova dili man binabang motubag kanato sa dihang moampo kita, sa unsang paagi makatabang gayod kanato ang pag-ampo? Kini ang pagahisgotan sa umaabot nga gula.

[Kahon sa panid 27]

Mga tubag sa mga pangutana sa panid 25

1. Jehova. Kini nagkahulogang “Siya Maoy Nagpahinabo.”

2. Gugma, gahom, hustisya, ug kaalam.

3. Gipadala niya ang iyang bugtong Anak, si Jesus, aron mamatay alang kanato.

4. Pinaagi sa dili lamang pagkabalaka sa atong kaugalingong mga panginahanglan apan sa pagkamahunahunaon sa kabubut-on sa Diyos ug sa pagbuhat niini.

5. Kita kinahanglang mapainubsanon, matinahoron, ug dili-mahakogon.

[Mga hulagway sa panid 26]

Ang pagtuon sa Bibliya ug pagtuon gikan sa kalalangan motabang kanimo nga mas makaila pa sa Diyos