Gikan sa Among mga Magbabasa

Mga Nars Usa ako ka nars sa duolag tulo na ka tuig. Ang direktang pag-atiman sa sakit ug pag-antos dili gayod sayon nga buluhaton. Pagkamakapadasig gayod nga mabasa sa seryeng “Mga Nars​—Mag-unsa na Lang Kita Kon Wala Sila?” (Nobyembre 8, 2000) nga gipabilhan diay sa uban ang among buluhaton! Labaw pang makapadasig ang saad sa Bibliya nga sa dili madugay ang mga nars dili na unya kinahanglanon.​—Isaias 33:24.

J.S.B., Brazil

Ang akong bana ug ako nagpadagan ug klinika alang sa mga pasyente nga magduawan, ug kining mga artikuloha nakadasig gayod kanamo. Nakatabang kini kanamo nga pauswagon ang among tinamdan alang sa among propesyon ug alang sa among mga pasyente. Nakasulat kamog maayo kaayong artikulo!

S. S., Alemanya

Nagtuo gayod ako nga ang mga nars katabang lamang. Apan kini nga mga artikulo nakatabang kanako sa pagsabot nga ang mga nars nakatabang nga makunhoran ug dako ang sikolohikal nga pag-antos, ug naghatag sila ug pagsabot ug pagpaluyo nga kasagarang dili ikahatag sa puliking mga doktor. Nagpadala akog mga kopya sa magasin ngadto sa ubay-ubay nakong mga klasmet kanhi nga nagtuon sa pagkanars.

F. G., Italya

Salamat alang niining sensitibong mga artikulo. Ang pagkanars nagtabang kanako nga mohamtong sa daghang paagi. Usa kini sa mga hinungdan nga nag-agda kanako sa pagpalandong sa katuyoan sa kinabuhi ug sa pagtuon sa Bibliya. Kining isyuha sa Pagmata! maoy usa ka dakong kapahayagan sa pagpabili nga sukad akong nadawat. Dasigon ako niini sa dugay nga panahon!

J. D., Republika sa Czech

Salamat alang niining mga artikuloha. Usa ako ka lisensiyadong nars sulod na sa daghang tuig. Gibati ko ang maong empatiya alang sa akong mga pasyente nga ako mismo makahilak sa dihang magpatulo kanila ug tambal sa mata. Segurado ako nga pabilhan pag-ayo sa mga nars sa tibuok kalibotan kini nga Pagmata!

L.A.R., Tinipong Bansa

Ngipon sa Bata Ingong bahin sa akong buluhaton diha sa buhatan sa dentista, tudloan ko ang mga inahan kon unsaon sa pag-amping sa ngipon sa ilang mga bata. Ang artikulong “Ampingi ang Dali-Madaot nga mga Ngipon” (Nobyembre 22, 2000) nakatabang ug dako tungod kay gipatin-aw niini ang risgo sa pag-aslom ug kadaot tungod sa bakterya. Ang tanang inahan nga mokonsulta kanako karon makadawat ug kopya, ug maayo kaayo ang mga resulta!

T.C.S., Brazil

Nanggimok nga mga Bitiis Mao pay pagkahuman nakog basa sa inyong artikulong “Aduna Ka bay Nanggimok nga mga Bitiis?” (Nobyembre 22, 2000) Nag-antos ako niini sulod na sa 18 ka tuig, ug nagtuo ako nga ako lamang ang gitakboyan. Kanunay akong makahilak tungod sa kahigawad ug pagkadili-makatulog, ug duna koy tanang matang sa tambal. Siyempre, ang bugtong solusyon lamang mao ang Gingharian ni Jehova.

S. T., Scotland

Sa dihang gibasa ko kining artikuloha, nahingangha ako tungod kay gihubit gayod niini ang akong mga simtomas. Bisag ang akong sakit wala pa sa pormal madayagnos ingong Restless Legs Syndrome, nahupayan ako sa pagkahibalo nga ang uban nag-antos usab diay sa samang balatian. Karon nakakat-on na ako sa pagpahiuyon sa akong kahimtang nga mas epektibo kay sa miagi. Tungod kay ako nahibalo na karon kon unsaon pagdumala sa dili maayong mga pagbati, mas maayo na ang akong gibati sa emosyon.

A. K., Hapon

Ako 43 anyos na ug mahigmata gihapon sa panahon sa kagabhion tungod sa mga pagbati nga daw dunay mga nagkamang diha sa akong mga bitiis ug mga bukton. Sa wala pa makabasa niining artikuloha, nagtuo ako nga ako ra ang duna niini nga balatian. Wala koy kalibotan nga gibati diay usab sa uban ang akong gibati. Salamat kaayo sa pagpatik ug mga artikulo nga sama niini sa paglamdag sa uban bahin niining talagsaong mga balatian.

D. L., Canada