Pag-abuso sa Droga—Adunay Solusyon!

“DAGHANG Kontrabandong Cocaine Nasakpan Diha sa mga Botelya sa Bino.” Gibatbat diha sa artikulo sa mantalaan ubos niana nga ulohan kon giunsa pagkompiskar sa kapolisan sa Johannesburg, Habagatang Aprika, ang kontiner nga ipasakay sa barko nga dunay sulod nga 11,600 ka botelyang bino nga gikan sa Amerika del Sur. Gisagol diha sa bino maoy duolan sa 150 ug 180 ka kilong cocaine. Gituohan nga kini ang kinadak-ang nakompiskar nga kontrabandong cocaine nga nakasulod sa nasod sa pagkakaron.

Bisan pag kini mohatag ug impresyon nga nagmalamposon ang pagpakig-away batok sa droga, ang tinuod mao nga ang mga polis nakasikop ug gibanabanang 10 ngadto sa 15 porsiyento lamang sa ilegal nga mga droga sa tibuok kalibotan. Sa pagkaalaot, susama ra kini sa usa ka hardinero nga namutol ug pipila ka mga dahon gikan sa kusog kaayong motubong mga sagbot apan wala ibta ang mga gamot nga anaa ilalom sa yuta.

Ang dako kaayong kita gikan sa mga droga nakadaot sa mga paningkamot sa gobyerno sa pagsanta sa paggama ug pagpamaligya niini. Sa Tinipong Bansa lamang, ang gibanabanang tinuig nga kita sa ilegal nga droga maoy bilyonbilyong dolyares. Tungod kay dako kaayong kantidad ang nalangkit, dili ikahibulong nga ang kapolisan ug mga opisyales sa gobyerno, bisan kadtong dagko ug mga ranggo, mahiphipan.

Si Alex Bellos sa mantalaang The Guardian  Weekly nagtaho gikan sa Brazil nga sumala sa usa ka imbestigasyon nga gihimo sa parliamento, “tulo ka kongresista, 12 ka diputado sa estado ug tulo ka mayor ginganlan . . . diha sa listahan nga dunay kapin sa 800 ka tawo nga ginaingong nalangkit sa organisadong krimen ug pagpayuhot sa mga droga sa Brazil.” Nalista usab diha ang “mga polis, mga abogado, mga negosyante ug mga mag-uuma sa 17 sa 27 ka estado.” Mahitungod niining mga nadiskitahan usa ka propesor sa politika sa Brasília University miingon: “Naigo niining akusasyona ang tanang bahin sa katilingban sa Brazil.” Kini ang ikaingon usab bahin sa daghang katilingban diin kaylap ang droga. Ang mga lagda sa merkado labot sa suplay ug panginahanglan niini sa mga pumapalit nakadugang sa problema.

Tungod kay wala man kaayo molampos ang mga pagdili sa balaod, ang uban miawhag nga himoong legal ang pipila ka mga droga. Ang ideya niini mao nga ang mga tawo angayng tugotan nga magbaton ug gamayng gidaghanon nga iyang magamit. Gituohan nga makapasayon kini sa gobyerno sa pagkontrolar ug makakunhod sa dakong ganansiya sa mga drug lord.

Ang Uban Milampos sa Pagbulag Gikan sa Droga

Kinahanglang moundang una paggamit ang mga giyanon sa droga aron makuha ang hilo gikan sa lawas ug unya ayohon ang ilang pisikal nga panglawas. Sa pagkaalaot, dako kaayog purohan nga sa dihang mobalik ang giyanon ngadto sa iyang naandang palibot, siya matental sa paggamit ug droga. Ang magsusulat nga si Luigi Zoja mihatag niini nga katarongan: “Imposible kaayong wagtangon lamang ang usa ka batasan nga dili una tudloan ang pasyente ug bug-os bag-ong panghunahuna.”

Si Darren, nga gihisgotan sa nag-unang artikulo, nakakaplag ug “bag-ong panghunahuna” nga nakapausab sa iyang kinabuhi. Siya miingon: “Nangangkon ako nga usa ka ateyista, apan sa ngadtongadto, bisan pag nagdroga ako gikan sa buntag hangtod sa gabii, nakaamgo ako nga aduna gayoy Diyos. Sulod sa duha o tulo ka bulan, misulay ako sa pag-undang paggamit ug droga, apan sigehan ako ug hatag sa akong mga higala. Bisan pag nagdroga gihapon ako, nagsugod ako sa pagbasa sa Bibliya sa regular una pa ako matulog. Wala na kaayo ako makig-uban sa akong mga higala. Usa ka gabii ako ug ang akong kauban sa kuwarto nahubog pag-ayo sa droga. Akong gihisgotan kaniya ang Bibliya. Pagkabuntag iyang giteleponohan ang iyang igsoong lalaki, nga usa sa mga Saksi ni Jehova. Kami iyang gitudlo ngadto sa usa ka Saksi nga nagpuyo sa siyudad nga among gipuy-an, ug nakigkita ako kaniya.

“Nag-estoryahay kami hangtod sa alas 11:00 s.g., ug mipauli ako nga nagdalag duolan sa usa ka dosenang mga giya sa pagtuon sa Bibliya. Nagsugod ako sa pagtuon sa Bibliya uban niya ug mihunong sa pag-abuso sa droga ug pagtabako. Mga siyam ka bulan sa ulahi, gibawtismohan ako ingong usa sa mga Saksi ni Jehova.”

Ang pagbulag sa pagkagiyanon sa droga dili sayon. Si Michael nga gihisgotan sa nag-unang artikulo nag-ingon nga ang mga kalisod nga iyang gibati sa  dihang mihunong siya paggamit ug droga human sa 11 ka tuig nga pag-abuso: “Wala gayod akoy ganang mokaon ug busa miniwang ako. Nakaagi usab ako nga morag gitusoktusok sa dagom ang ubang bahin sa akong lawas, panington, ug makakitag mga siga ibabaw sa ulo sa mga tawo. Gibati nako ang dakong kahidlaw sa droga, apan ang pagpakigsuod kang Jehova pinaagi sa pag-ampo ug pagtuon sa Bibliya nakatabang kanako sa pagpalayo sa droga.” Kining mga tig-abuso kanhi sa droga miuyon nga kinahanglang mohunong gayod sila sa pagpakig-uban sa ilang mga higala kanhi.

Kon Nganong ang mga Paningkamot sa Tawo Dili Molampos

Ang ilegal nga pag-abuso sa droga maoy usa lamang ka bahin sa usa ka mas dakong problema sa kalibotan. Usa ka hilabihan ka dakog impluwensiya sa pagkadaotan, kapintasan, ug kabangis ang nagkontrolar sa tibuok kalibotan. Ang Bibliya nag-ingon: “Ang tibuok kalibotan nailalom sa gahom sa usa nga daotan.” (1 Juan 5:19) Kanang “usa nga daotan” gipaila ni apostol Juan diha sa Pinadayag 12:9: “Busa gitambog ang dakong dragon, ang orihinal nga halas, ang usa nga gitawag Yawa ug Satanas, nga nagpahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.”

Dugang pa sa iyang kaugalingong kahuyangan, kinahanglang sagubangon sa tawo kining gamhanang kaaway. Si Satanas ang hinungdan sa pagkapukan sa tawo sa sinugdan. Siya determinado sa pagyudyod sa katawhan ngadto sa kadaotan ug sa pagpalayo kanila gikan sa Diyos. Ang pag-abuso sa tawo sa droga morag maoy usa ka bahin sa iyang taktika. Siya naglihok nga dunay dakong kasuko tungod kay siya nahibalo nga “hamubo na lamang ang iyang panahon.”​—Pinadayag 12:12.

Unsa ang Solusyon sa Diyos?

Ang Bibliya nagbutyag sa mahigugmaong tagana sa Maglalalang sa paglukat sa katawhan gikan sa ilang makasasalang kahimtang. Diha sa 1 Corinto 15:​22, kita gisultihan: “Kay ingon nga diha kang Adan ang tanan nangamatay, sa ingon usab diha kang Kristo ang tanan pagabuhion.” Si Jesus kinabubut-ong mianhi sa yuta ingong usa ka tawong hingpit ug gihalad ang iyang yutan-ong kinabuhi aron malukat ang katawhan gikan sa mga epekto sa sala ug kamatayon.

Ang pagkahibalo sa hinungdan sa kamatayon maingon man sa solusyon sa mga problema sa tawo nakahatag ug katarongan ug kaisog alang sa daghan aron makalingkawas gikan sa pagkagiyan sa droga. Apan duna pay mahimo ang Bibliya kay sa pagtabang kanato sa pagpakiglabot sa tinagsatagsa sa mga problema sa droga karon. Kini naghisgot bahin sa usa ka panahon, human nga mawagtang ang impluwensiya ni Satanas, sa dihang ang tanang problema sa kalibotan, apil ang pag-abuso sa droga, matapos sa dayon.

Ang basahon sa Pinadayag nag-asoy bahin sa “usa ka suba sa tubig sa kinabuhi, ingon katin-aw sa kristal, nga nagaagos gikan sa trono sa Diyos ug sa Kordero.” (Pinadayag 22:1) Kining simbolikong suba naghulagway sa tagana sa Diyos pinaagi kang Jesu-Kristo sa pagpasig-uli sa tawo ngadto sa hingpit nga kinabuhi diha sa usa ka paraisong yuta. Gibatbat sa Pinadayag ang mga kahoy sa kinabuhi nga nanubo sa daplin sa suba ug nag-ingon: “Ang mga dahon sa mga kahoy maoy tambal alang sa kanasoran.” (Pinadayag 22:2) Kining simbolikong mga dahon naglarawan sa makaayo nga mga tagana ni Jehova aron mapasig-uli ang katawhan sa pagkahimong hingpit sa espirituwal ug sa pisikal.

Sa kataposan, ang tawo malibre, dili lamang sa pag-abuso sa droga kondili gikan usab sa tanang ubang mga sakit ug mga problema nga naghampak kaniya niining dunot nga sistema!

[Kahon/Hulagway sa panid 9]

Unsa ka Luwas ang Marijuana?

Ubay-ubayng mga nasod nagplano nga himoong legal ang marijuana, nga sa panguna alang sa kagamitan sa pagtambal. Ang droga nadiskobrehang makaalibyo sa pagkakasukaon tungod sa kemoterapiya, ug sumala sa nadiskobrehan makatabang sa mga dunay AIDS aron ganahang mokaon. Kini gigamit usab ingong panghupay sa sakit.

Bisan tuod dili parehas ang mga resulta sa mga nadiskobrehan sa panukiduki, ang mga pagtuki nga gitaho diha sa magasing New Scientist nakakita ug pipila ka makadaot nga mga epekto sa marijuana.

Gitandi sa usa ka pagtuki nga gihimo sa Harvard University ang usa ka grupo nga tigyupyop ug marijuana adlaw-adlaw uban sa usa ka grupo nga panagsa rang moyupyop niini. Ilang nadiskobrehan nga popareho ang ilang nakuhang grado sa naandang mga pasulit sa hunahuna. Apan, sa usa ka pasulit may kalabotan sa katakos sa pagkamapaigoon, ang kusog nga moyupyop ug marijuana mas mubo ug grado.

Gipanid-an sa laing unibersidad ang usa ka grupo sa regular nga tigyupyop ug marijuana ug ang usa ka grupo nga tigyupyop ug sigarilyo, sulod sa 15 ka tuig. Ang mga tigyupyop ug marijuana kasagarang moyupyop ug tulo o upat ka estik sa marijuana sa usa ka adlaw, samtang ang tigyupyop ug sigarilyo moyupyop ug 20 o sobra pang sigarilyo sa usa ka adlaw. Sama ug gidaghanon gikan sa duha ka grupo ang nag-antos sa ubo ug brongkitis. Sa pagsusi sa mga baga nadiskobrehan nga nangadaot ang mga selula niining duha ka grupo.

Bisan pag ang mga tigyupyop ug marijuana panagsa rang moyupyop, nakaplagan nga ang usa ka estik sa marijuana mopagawas ug tulo ka pilo nga gidaghanon sa tar kon itandi sa sigarilyo. Dugang pa, ang New Scientist nagtaho: “Ang mga tigyupyop ug marijuana mohingos ug mas lalom ug dugaydugay nilang pugngan ang ilang ginhawa.”

Dugang pa, ang mga selula sa imyunidad gikan sa mga baga sa mga tigyupyop ug marijuana nadiskobrehan nga 35 porsiyento nga dili kaayo makasukol sa kagaw kay sa mga selula gikan sa mga tigyupyop ug sigarilyo.

[Credit Line]

U.S. Navy photo

[Kahon sa panid 11]

“Usa ka Makapabalakang Akusasyon” Batok sa mga Ginikanan

Usa ka editoryal sa mantalaang Saturday Star sa Habagatang Aprika nagpahayag ug kabalaka bahin sa makuyaw nga pagdaghan sa pag-abuso sa droga sa mga batan-on sa Habagatang Aprika ug nagkomento:

“Nga gihimo kini [nagdroga] sa atong mga anak kasagaran maoy usa ka makapabalakang akusasyon kanato ingong mga ginikanan ug sa katilingban sa katibuk-an. Kita nagsigeg pangamas aron makasapi, naggamit sa atong panahon ug kusog aron moasenso. Ang atong mga anak nakahatag ug kabug-at sa atong hunahuna, sa atong kusog. Ato ba silang gihatagan ug dekalidad nga panahon? Mas dali nga hatagan na lang sila ug kuwarta aron dili na kita masamok. Mas dali kay sa mamati kanila​—sa ilang mga kahadlok, sa ilang mga paglaom, sa mga butang nga naghasol kanila. Karong gabhiona, samtang naglingkod kita sa lamesa sa restawran o nagpahayahay atubangan sa TV, kita ba nahibalo kon unsay ilang gihimo?”

O, mahimong idugang nato, kita ba nahibalo sa ilang gihunahuna?

[Hulagway sa panid 10]

Daghan ang nadasig sa paghunong sa pag-abuso sa droga