Ang Hunahuna sa Bibliya

Sayop ba ang Pagbangotan?

“DUGANG PA, MGA IGSOON, DILI NAMO BUOT NGA KAMO MAWALAY-ALAMAG MAHITUNGOD KANILANG NANGATULOG SA KAMATAYON; ARON DILI KAMO MASUBO INGON SA UBAN USAB NGA MGA WALAY PAGLAOM.”—1 TESALONICA 4:13.

ANG Bibliya nagtanyag ug paglaom alang niadtong nangamatay. Ang gibuhat ni Jesus nga pagbanhaw sa mga patay, ingon man sa iyang mga pagpanudlo, nagpunting sa usa ka panahon sa dihang ang mga patay pagabanhawon. (Mateo 22:23-​33; Marcos 5:​35, 36, 41, 42; Lucas 7:​12-​16) Sa unsang paagi maapektohan kita niini nga paglaom? Ang mga pulong ni apostol Pablo nga gikutlo sa itaas nagpakita nga kini nga paglaom makapahupay sa dihang mamatay ang usa ka minahal.

Kon ikaw namatyan ug usa ka minahal, walay duhaduha nga ikaw mibatig kasakit nga dala sa maong hitabo. Si Theresa, kansang bana nga nag-edad ug 42 namatay wala magdugay human operahi sa kasingkasing, miingon: “Pagkadako sa akong kakurat! Ang una kong gibati maoy bug-os nga kahadlok. Dayon gibati ko ang hilabihang kasakit nga misamot sa paglabay sa panahon. Nagsige akog hilak.” Ang mao bang mga reaksiyon nagpakita ug kawalay-pagtuo sa saad ni Jehova sa pagbanhaw sa mga patay? Ang mga pulong ba ni Pablo nagpasabot nga sayop ang pagbangotan?

Mga Pananglitan sa Pagbangotan Diha sa Bibliya

Kita makakaplag ug tubag sa maong mga pangutana pinaagi sa pagsusi sa mga pananglitan sa pagbangotan diha sa Bibliya. Sa daghang asoy ang kamatayon sa suod nga membro sa pamilya giduyogan ug usa ka panahon sa pagbangotan. (Genesis 27:41; 50:7-10; Salmo 35:14) Kasagarang naghingapin ang mga pagbati nga dala niini nga pagbangotan.

Palandonga kon sa unsang paagi ang pipila ka tawo sa pagtuo nagbangotan tungod sa kamatayon sa usa ka minahal. Pananglitan, si Abraham may malig-ong pagtuo nga banhawon sa Diyos ang mga patay. (Hebreohanon 11:19) Bisag nakabaton niini nga pagtuo, sa dihang namatay ang iyang asawa, siya “misulod aron sa pagminatay alang kang Sara ug sa paghilak tungod kaniya.” (Genesis 23:​1, 2) Sa dihang namakak ang mga anak ni Jacob ug gisultihan siya nga ang iyang pinalanggang anak nga si Jose namatay, “gigisi [ni Jacob] ang iyang kupo ug . . . nagpadayon sa paghilak tungod kaniya.” (Genesis 37:​34, 35) Aw, daghang tuig sa ulahi, ang pagpalandong sa kamatayon sa iyang minahal nga anak nakapaguol gihapon pag-ayo kang Jacob! (Genesis 42:36-38) Si Haring David usab dayag ug grabeng nagbangotan tungod sa kamatayon sa iyang duha ka anak nga si Amnon ug si Absalom. Bisag silang duha nakapahinabog kaguol kang David ug sa iyang pamilya, sila mga anak gihapon niya, ug ang ilang kamatayon nakapaguol pag-ayo kaniya.​—2 Samuel 13:28-39; 18:33.

 Usahay, ang tibuok nasod sa Israel nagbangotan, sama sa ilang gihimo tungod sa kamatayon ni Moises. Ang Deuteronomio 34:8 nagtug-an kanato nga ang mga Israelinhon nagbangotan tungod kaniya sulod sa 30 ka adlaw.

Sa kataposan, anaa ang pananglitan ni Jesu-Kristo. Ang iyang suod nga higalang si Lazaro namatay. Ug sa dihang nakita ni Jesus nga nanghilak ang mga igsoon ni Lazaro nga si Marta ug Maria, ug ilang mga higala, siya “miagulo diha sa espiritu ug naguol.” Bisag nahibalo siya nga sulod sa pipila ka gutlo iyang banhawon ang iyang higala, siya sa gihapon “mihilak.” Gihigugma ni Jesus ang iyang minahal nga mga higalang si Marta ug si Maria. Busa siya natandog gayod sa dihang iyang nakita ang ilang kaguol tungod sa kamatayon sa ilang igsoon.​—Juan 11:33-36.

Si Abraham, Jacob, David, ug si Jesus ngatanan nagpasundayag ug dakong pagtuo kang Jehova ug sa iyang mga saad, bisan pa niana sila naguol. Ang ila bang pagbangotan usa ka ilhanan sa kahuyang sa espirituwal? Ang ila bang kaguol usa ka timailhan sa kawalay-pagtuo sa pagkabanhaw? Dili gayod! Ang pagbangotan maoy kinaiyanhong reaksiyon tungod sa kamatayon sa usa ka minahal.

Kon Nganong Kita Magbangotan

Dili gayod katuyoan sa Diyos nga mamatay ang katawhan. Ang orihinal nga katuyoan ni Jehova, ingon sa gipahayag kang Adan ug Eva, maoy alang sa yuta nga mahimong usa ka matahom nga paraiso nga puno sa mahigugmaon, malipayong pamilya. Ang kamatayon moabot lamang kon ang unang magtiayon mopili sa pagsupak kang Jehova. (Genesis 1:28; 2:17) Ikasubo, si Adan ug Eva misupak, ug tungod sa pagkadili-masinugtanon, “ang kamatayon mikaylap sa tanang tawo.” (Roma 5:12; 6:23) Busa ang kamatayon maoy mapintas nga kaaway nga dili gayod bahin sa orihinal nga katuyoan sa Diyos.​—1 Corinto 15:26.

Nan, makataronganon lamang nga ang dili kinaiyanhong hitabo nga kamatayon sa usa ka minahal magpahinabog lawom nga kasakit sa emosyon alang kanilang naapektohan niini. Makahatag kini ug hilabihang kahaw-ang sa ilang kinabuhi. Si Theresa, ang balo nga gihisgotan sa itaas, miingon maylabot sa iyang bana: “Segurado ako nga makita ko siya pag-usab sa pagkabanhaw, apan gimingaw gayod ako kaniya karon. Kana maoy nakapaguol kaayo kanako.” Ang kamatayon sa usa ka ginikanan magpahinumdom kanato sa atong kaugalingong kamatayon. Ang kamatayon sa usa ka batan-on ilabinang makapaguol kanato tungod sa ahat nga paghikaw sa kinabuhi.​—Isaias 38:10.

Oo, ang kamatayon maoy dili-kinaiyanhon. Ang kasakit nga ipatungha niini pagadahomon, ug wala isipa ni Jehova ang pagbangotan ingong kawalay-pagtuo diha sa pagkabanhaw. Ingon sa gipakitang mga panig-ingnan ni Abraham, Jacob, David, sa nasod sa Israel, ug ni Jesus, ang dayag nga pagpahayag sa atong kasakit sa kasingkasing dili timailhan nga kita huyang sa espirituwal. *

Bisan pa niana, bisag kita ingong mga Kristohanon tinong mobatig kaguol tungod sa kamatayon, kita dili mobatig kasubo “ingon sa uban usab nga mga walay paglaom.” (1 Tesalonica 4:13) Dili kita mohimog dili-makataronganong mga paghingapin sa pagbangotan tungod kay kita wala maglibog bahin sa kahimtang sa mga patay. Nahibalo kita nga sila walay kasakit o kaguol apan anaa sa kahimtang nga sama sa halawom, malinawong pagkatulog. (Ecclesiastes 9:5; Marcos 5:39; Juan 11:11-14) Nakabaton usab kitag bug-os nga pagsalig nga si Jesus, “ang pagkabanhaw ug ang kinabuhi,” magtuman sa iyang saad nga banhawon kadtong “tanan nga anaa sa handomanang mga lubnganan.”​—Juan 5:​28, 29; 11:​24, 25.

Busa, kon ikaw naguol niining panahona, pagbatog kahupayan sa pagkahibalo nga si Jehova nakasabot sa imong kasakit. Hinaot kini nga kahibalo ug ang imong paglaom sa pagkabanhaw magpagaan sa imong kaguol ug motabang kanimo sa pagsagubang sa kamatayon sa imong minahal.

[Footnote]