Tabang sa Dihang Mamatay ang Usa ka Minahal

Sa miaging pipila ka tuig ang mga Saksi ni Jehova nagpatik ug usa ka brosyur nga naghisgot sa kalisod sa pagdumala sa kamatayon sa usa ka minahal. Niining bag-o lamang, usa ka sulat ang nadawat gikan sa usa ka mapabilhong magbabasa sa Pederal nga Republika sa Yugoslavia, kinsa misulat: “Gikan sa kahiladman sa akong kasingkasing, buot kong pasalamatan kamo alang sa brosyur nga Sa Dihang ang Imong Minahal Mamatay. Naghisgot gayod kini sa tanang detalye bahin sa pagkanamatyan ug usa ka minahal.”

Ang magsusulat nagpatin-aw: “Sa dihang namatyan ako sa akong magulang nga lalaki tungod sa aksidente sa trapiko, ang brosyur naghatag kanako ug ‘gikinahanglan gayong tabang.’ Ang seksiyong ‘Pila ka Praktikal nga mga Sugyot,’ sa panid 18, nakapahupay gayod kanako. Ugaling, paglabay sa upat ka bulan gibati ko ang tumang kaguol inubanan sa hilabihang kamingaw. Nahadlok ako nga maapektohan ang akong kahimsog sa emosyon.

“Sa makausa pa, gibasa ko kini nga brosyur, ug diha sa panid 9 sa kahong ‘Ang Proseso sa Pagkaguol,’ akong nabasa nga ang yugto sa pagkatimbang maoy dinuyogan sa kasubo uban sa kamingaw. Nahupayan gayod ako. Salamat sa inyong malumong kaluoy, nga inyong gipakita pinaagi niini nga brosyur.”

Tingali ikaw o usa ka tawo nga imong kaila makadawat usab ug paghupay gikan sa pagbasa niining 32-panid nga brosyur. Ikaw makahangyo ug kopya pinaagi sa pagpil-ap sa kupon ug pagpadala niini sa adres nga gipakita sa kaubang kupon o sa nahiangay nga adres nga gilista sa panid 5 niining magasina.

□ Interesado ako nga makadawat ug kopya sa brosyur nga Sa Dihang ang Imong Minahal Mamatay.

□ Palihog kontaka ako mahitungod sa usa ka libreng pagtuon sa Bibliya sa balay.