Ang Praktikal nga Tabang Gihatag Bisan Diin

SI Baxter, usa ka 15-anyos nga estudyante sa hayskul, dunay makaiikag nga paagi sa paggugol sa iyang mga hapon sa Sabado. Mobisita siya sa usa ka grupo sa mga tigulang, magpatokar ug musika ug mohimog mga sesyon sa pagkanta diha sa balay-amomahan sa mga retirado. “Siya mopakatawa, molingaw ug molipay sa mga nagpuyo sa balay-amomahan,” matod sa magtutudlo ni Baxter. Si Lucille, nag-edad ug 78, nagpakitag susamang kalulot. Mag-apod-apod siyag pagkaon taliwala sa mga kabos ug moduaw sa masulub-ong mga pasyente sa ospital. Usa ka higala nag-ingon bahin kang Lucille: “Kon dunay panginahanglan ug siya makatabang, andam siya nga motabang.”

Ang Pagboluntaryo Gihubit

Kini nga paagi sa kinabuhi​—‘Andam sa pagtabang kon dunay panginahanglan’​—giambitan sa daghang minilyong katawhan sa tibuok kalibotan. Sila motanyag ug tabang sa mga dapit sa konstruksiyon ug sa mga opisina, mga pabrika, mga balay-amomahan, mga institusyon alang sa mga tawong hapit nang mamatay, mga kampo sa mga kagiw, mga sentro alang sa mga walay balay, mga departamento sa bombero, mga sentro alang sa mga tawong nanginahanglag tambag tungod sa grabeng suliran, mga establisimento alang sa nangawala o wala na kinahanglanang mga hayop, ug daghan pa. Sila anaa halos sa tanang dapit! Gigamit nila ang ilang mga katakos gikan sa pagpintakasi ug kamalig o balay ngadto sa pagpatunghag pondo ug gikan sa pag-atiman sa giabandonar nga mga masuso ngadto sa paghupay sa mga dunay makamatayng sakit. Sila mga boluntaryo​—mga tawo kansang mga ginahimo makahatag ug kaayohan sa kinabuhi niadtong nanginahanglan.

Ang pagboluntaryo gihubit ingong “usa ka halangdong hunahuna nga natuman tungod kay gibuhat.” Nalangkit niini ang mga kahimtang sama sa pagkakomitido tungod sa usa ka kawsa, usa ka espiritu sa pagsakripisyo, pagkawalay-suhol, ug pagpasundayag sa pagkamatinabangon. “Ang boluntaryong pag-alagad,” matod sa duha ka boluntaryo sulod sa dugay nang panahon, maoy “paghatag sa atong kaugalingon: sa atong panahon, sa atong mga kamot ug tiil, sa atong mga ideya, sa atong katakos sa pagtabang sa ubang tawo, sa atong mga katakos sa pagsulbad ug problema, sa atong propesyonal nga kahibalo.” Makaiikag, ang  maong pagboluntaryo nakahatag usab ug kaayohan sa mga boluntaryo mismo.​—Tan-awa ang kahon nga “Ang mga Boluntaryo Nakabaton Usab ug Kaayohan.”

Nagkadaghang mga Boluntaryo —Nagkadako ang Panginahanglan

Sa Tinipong Bansa, gibanabana nga 100 ka milyon ka tawo ang nagboluntaryo​—ug sila nagkadaghan. “Ang among organisasyon padayong midako pag-ayo,” di pa dugayng miingon sa Pagmata! si Kathleen Behrens, ehekutibong direktor sa organisasyon sa pagboluntaryo sa New York Cares. “Sa miaging tuig lamang, kami dunay kapin sa 5,000 ka bag-ong mga boluntaryo nga miduyog sa among programa.” Ang mga grupo sa boluntaryo sa Uropa nakasinati usab ug susamang pag-uswag. Pananglitan, ang gidaghanon sa mga boluntaryo sa Pransiya miuswag ug 6 porsiyento matag tuig sulod sa miaging duha ka dekada. Apan, wala mokunhod ang panginahanglan sa dugang nga mga boluntaryo. Sa kasukwahi, ang United Nations Volunteers (usa ka ahensiya sa HK) nag-ingon nga kon itandi sa tibuok kalibotan, “ang panginahanglan sa dugang serbisyo sa mga boluntaryo mas dako karon kay sukad masukad.” Nag-ingon ang usa ka superbisor sa museyo: “Ang mga boluntaryo hinungdanon kaayo sa pagpalakat sa museyo.”

Apan, sukwahi ang nahitabo. Bisag daghang direktor, mga manedyer, ug mga koordinetor nga  nagtrabaho uban sa mga boluntaryo ang mibati nga ang maong mga boluntaryo “bililhon kaayo,” daghang trabaho sa mga boluntaryo ang wala pabilhi. Aron masugdan ang pag-usab sa maong kahimtang, ang Hiniusang Kanasoran nakahukom sa paghimo sa tuig 2001 ingong panahon sa paghatag ug pagtagad sa boluntaryong mga trabahante. Ang kahong “Internasyonal nga Tuig sa mga Boluntaryo” nagbatbat sa pipila ka tumong sa UN nga gilaomang makab-ot.

Sa kasamtangan, nagakahitabo ang mga kausaban sa sistema sa pagboluntaryo nga nakahatag ug hagit alang sa mga boluntaryo ug niadtong nagdirihir sa ilang buluhaton. Bisan pa niana, aduna gihapoy daghang tawo sa tibuok kalibotan nga andam sa paghatag sa ilang kaugalingon alang sa kaayohan sa uban. Unsay nagtukmod kanila sa paghimo niana? Unsay ilang nalampos? Ug sa unsang paagi maapektohan nila ang imong kinabuhi?

[Kahon/Hulagway sa panid 4]

Ang mga Boluntaryo Nakabaton Usab ug Kaayohan

“Ang pagpaningkamot nga makatabang sa uban nakahatag ug mas dulot, mas makahuloganon, mas makalipayng ganti kay sa akong mabatonan pinaagi sa pagpadayon sa bug-os nga pagtagad sa akong karera sa negosyo,” matod ni Michael, usa ka dili-bug-os-panahon nga boluntaryo. Dili lang si Michael ang mibati niini. Si Sharon Capeling-Alakija, ehekutibong koordinetor sa United Nations Volunteers, nag-ingon: “Sa tibuok kalibotan ang mga tawo nga . . . moboluntaryo nasayod pag-ayo kon unsa kadako sa kaayohan nga ilang makuha tungod sa mabatonang kasinatian.” Si Dr. Douglas M. Lawson, usa ka eksperto sa buluhatong pagboluntaryo, nagpamatuod nga nakaplagan sa mga tigdukiduki nga “kasagaran panahon sa pipila lang ka oras sa pagboluntaryo ang kinatibuk-ang pisiolohikal nga batasan ug sikolohikal nga kahimsog mouswag pag-ayo nga gibansagan kinig ‘Ang Kalipay sa Boluntaryo.’” Ug ang “kalipay sa boluntaryo” dili lumalabay lang nga pagbati. Ang mga tigdukiduki sa Cornell University sa Tinipong Bansa nagtuon sa usa ka grupo sa mga tawo sulod sa 30 ka tuig ug nakakaplag nga “kadtong miboluntaryo mas malipayon ug mas himsog kay kanilang wala moboluntaryo.” Makaiikag, ang Bibliya nag-ingon: “Adunay labaw nga kalipay sa paghatag kay sa pagdawat.”​—Buhat 20:35; Proverbio 11:25.

[Kahon/Hulagway sa panid 5]

Internasyonal nga Tuig sa mga Boluntaryo

Sa Nobyembre 20, 1997, ang Asembliya Heneral sa Hiniusang Kanasoran nagproklamar sa tuig 2001 ingong “International Year of Volunteers,” (IYV 2001). Sumala sa HK, dunay upat ka tumong nga pagakab-oton sulod niining tuiga.

Dugang nga pagkainila Ang mga gobyerno gidasig sa pag-ila sa kahinungdanon sa mga boluntaryo pinaagi sa pagtuon ug pagrekord sa ilang mga kalamposan ug sa paghatag ug mga ganti sa talagsaong mga buhat sa pagboluntaryo.

Dugang nga lehislatibo nga nagpasiugda sa boluntaryong pag-alagad Pananglitan, ang mga nasod giawhag nga idasig ang pagboluntaryo pinaagi sa pagdawat sa boluntaryong pag-alagad isip kapuli sa militaryong pag-alagad o sa paghatag ug pipila ka eksemsiyon sa buhis.

Pagpasangkad sa kutay sa impormasyon bahin sa pagboluntaryo Ang media giawhag sa paghatag ug dugang nga publisidad bahin sa kalamposan nga nahimo sa mga boluntaryo. Ingong resulta, ang maong mga proyekto masundog, “nga dili na kinahanglang ang matag komunidad mogugol ug panahon ug paningkamot sa pagmugnag kaugalingon nilang mga programa ug mga proyekto nga namugna na sa uban.”

Promosyon Ang mga organisasyon sa pagboluntaryo gidasig sa paghimog mga eksibit aron sa pagpahibalo sa publiko bahin sa mga kaayohan nga makuha sa sosyedad gikan sa buluhatong pagboluntaryo.

Ang HK naglaom nga ang IYV 2001 moresultag dugang mga hangyo alang sa mga serbisyo sa mga boluntaryo, dugang mga tanyag gikan sa katawhan aron moalagad ingong mga boluntaryo, ug dugang pondo ug mga pasilidad alang sa mga organisasyon sa pagboluntaryo aron madumala ang nagakadakong panginahanglan sa sosyedad. Sa katibuk-an duna nay 123 ka gobyerno ang miapil sa pag-esponsor sa mga tumong niining resolusyona sa HK.