Buluhatong Pagboluntaryo nga may Dumalayong mga Kaayohan

 SI Jesu-Kristo kanunayng naghimo ug malulotong mga buhat alang niadtong nanginahanglan. Pananglitan, iyang gipakaon ang gigutom ug giayo ang masakiton. (Mateo 14:14-​21) Apan, unsang buluhatona ang gihatagan niya ug kinalabwang prioridad? Ang usa ka panghitabo nga nahitabo sayo sa ministeryo ni Jesus naghatag sa tubag. Narekord kini sa unang kapitulo sa Ebanghelyo ni Marcos.

Samtang didto si Jesus sa Capernaum, duol sa Dagat sa Galilea, gidala siya ngadto sa balay ni Simon, o Pedro. Didto “ang ugangang babaye ni Simon naghigda nga gihilantan,” ug giayo siya ni Jesus. (Marcos 1:29-31) Sa ulahi, ang usa ka panon lakip sa daghang tawo nga “nasakit sa nagkadaiyang mga sakit” nagtapok didto sa pultahan sa balay ni Pedro, ug giayo usab sila ni Jesus. (Marcos 1:32-34) Unya migabii na, ug ang tanan nangatulog.

Pagkaugma “samtang ngitngit pa,” hilom nga mibangon si Jesus ug mibiya sa balay paingon “sa usa ka mingaw nga dapit,” diin didto “siya nag-ampo.” Pagkataudtaod, ang mga tinun-an namangon usab, mitan-aw sa gawas sa balay, ug nakita ang usa ka dakong panon sa katawhan nga naghulat sa pultahan. Apan unsay ilang buhaton? Wala si Jesus! Dihadiha si Pedro ug kadtong nagauban kaniya nangita kang Jesus ug nakakaplag kaniya ug miingon: “Ang tanan nangita kanimo.” (Marcos 1:35-37; Lucas 4:42) Morag sa diwa ilang gisultihan si Jesus: ‘Unsay imong gibuhat dinhi? Sa miaging gabii usa ka dakong kalamposan ang imong nahimo sa pagpang-ayo sa masakiton. Karong adlawa lain na usab nga dakong kahigayonan ang nagpaabot kanimo!’

Apan matikdi ang tubag ni Jesus: “Mangadto kita sa laing dapit, sa kasikbit nga mga lungsod, aron makawali usab ako didto.” Kini nga tubag makahuloganon. Si Jesus wala mobalik sa balay ni Pedro aron ayohon ang uban. Gipakita niya kon ngano sa dihang siya miingon: “Kay alang niini nga katuyoan [nga mao, ang pagwali] nga ako mianhi.” (Marcos 1:​38, 39; Lucas 4:43) Unsay gipasabot ni Jesus sa iyang mga tinun-an? Ang pagbuhat ug maayong mga buhat mahinungdanon alang kaniya, apan ang pagwali ug pagpanudlo sa pulong sa Diyos mao ang pangunang buluhaton ni Jesus.​—Marcos 1:14.

Sanglit ang Bibliya nag-awhag sa mga Kristohanon nga “managsunod pag-ayo sa mga tunob [ni Jesus],” ang matuod nga mga Kristohanon karong adlawa adunay tin-aw nga giya bahin sa kon unsang matanga sa buluhatong pagboluntaryo ang angayng hatagag prioridad. (1 Pedro 2:21) Sama kang Jesus, sila nagatabang sa mga tawo nga nanginahanglan​—sumala sa gipakita sa nag-unang artikulo. Sama kang Jesus usab, gihatagan nilag unang prioridad ang buluhatong pagpanudlo sa mensahe sa Bibliya bahin sa maayong balita sa Gingharian sa Diyos. * (Mateo 5:​14-​16; 24:14; 28:​19, 20) Nan, nganong angay nga hatagag prioridad ang pagboluntaryo sa pagtudlo sa katawhan bahin sa mensahe sa Bibliya kay sa ubang hinungdanong mga matang sa buluhatong pagboluntaryo?

Kon Ngano ug sa Unsang Paagi ang Edukasyon sa Bibliya Makahatag ug Kaayohan

Usa ka panultihon sa Asia naghatag sa tubag. Kini nag-ingon: “Kon ikaw magplano alang sa usa ka tuig, pagpugas ug mga binhi. Kon ikaw magplano alang sa napulo ka tuig, pagtanom ug mga kahoy. Kon ikaw magplano alang sa usa ka gatos ka tuig, edukaha ang mga tawo.” Sa pagkatinuod, kon mahitungod sa paghatag ug malungtarong mga solusyon, kinahanglanon gayod ang edukasyon tungod kay kini mougmad sa katakos sa usa ka tawo sa paghimog mga desisyon nga mopauswag sa iyang kinabuhi. Mao nga karong adlawa kapin sa unom ka milyon sa dili-bug-os ug bug-os-panahong mga boluntaryo ang nagagamit sa ilang panahon, kusog, ug kahinguhaan sa paghatag sa publiko ug libreng edukasyon sa Bibliya. Kining epektibong programa sa pagboluntaryo  nga ginahimo sa mga Saksi ni Jehova nakahatag ug dakong epekto sa mga tawo sa tibuok kalibotan. Sa unsang paagi?

Samtang natabangan ang mga tawo sa pagsabot ug sa pagsunod sa praktikal nga tambag sa Bibliya, sila mas nasangkapan sa pagdumala sa mga suliran sa kinabuhi. Nabatonan nila ang moral nga kalig-on nga gikinahanglan sa pagbuntog sa makadaot nga mga batasan. Si Nelson, usa ka batan-on sa Brazil, nagpasiugda sa laing kaayohan sa edukasyon sa Bibliya: “Sukad nga ako nagsugod sa pagtuon sa Bibliya uban sa mga Saksi ni Jehova, gibati nako ang kalipay tungod kay ako karon aduna nay katuyoan sa kinabuhi.” (Ecclesiastes 12:13) Ang uban pang ginatos ka libo​—batan-on ug tigulang​—nga bag-o pang nagsugod sa pagtuon sa Pulong sa Diyos ang mibati sama sa gibati ni Nelson. Dugang pa sa pagtabang sa mga estudyante aron makakaplag ug makapatagbaw nga katuyoan sa kinabuhi, ang mensahe sa Gingharian sa Diyos naghatag ug makapalig-ong paglaom sa umalabot​—usa ka paglaom nga makapahimo sa kinabuhi nga mapuslanon, bisan pa ilalom sa labing masulayong mga kahimtang. (1 Timoteo 4:8)​—Tan-awa ang kahong “Kon sa Unsang Paagi Makahatag ug Kaayohan ang Gingharian sa Diyos.”

Pinaagi sa paghatag ug edukasyon sa Bibliya, ginahimo sa mga Saksi ni Jehova ang usa ka boluntaryong pag-alagad nga may malungtarong mga kaayohan. Unsa ka malungtaron? Ang Pulong sa Diyos nag-ingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Hunahunaa nga nakigbahin ka sa usa ka programa nga may walay kataposang mga kaayohan​—mao gayod kana ang matang sa boluntaryong pag-alagad nga tinuod nga makahatag ug kaayohan ngadto sa uban! Dili ba kana mao ang matang sa programa nga buot nimong makat-onan ug dugang pa? Kon mao, kontaka ang mga Saksi ni Jehova sa imong kasilinganan. Ang pagdawat niini nga imbitasyon maoy usa ka lakang nga dili nimo pagabasolan.

[Footnote]

[Blurb sa panid 11]

“Kon ikaw magplano alang sa usa ka tuig, pagpugas ug mga binhi. Kon ikaw magplano alang sa napulo ka tuig, pagtanom ug mga kahoy. Kon ikaw magplano alang sa usa ka gatos ka tuig, edukaha ang mga tawo”

[Kahon/Mga hulagway sa panid 10]

Nagdala Siyag Tabang ug Paglaom

Si Nadine, usa ka 43-anyos nga nars sa Pransiya nga nag-espesyalisar sa tropikanhong mga sakit, maoy usa sa mga boluntaryo nga nagtrabaho sa Sentral Aprika. “Ang mga tawo mangutana kanako kon nganong gihimo ko kini,” matod niya sa usa ka interbiyo di pa dugay. “Ako nagtuo sa Diyos, gihigugma ko ang mga tawo, ug buot kong isakripisyo ang akong panahon ug kusog sa pagtabang sa uban. Ug ang pagkahimong usa sa mga Saksi ni Jehova mao ang nag-aghat kanako sa paghatag ug kahupayan ug paglaom niadtong nanag-antos.” Samtang nagboluntaryo sa Aprika, gibahin ni Nadine ang iyang panahon tali sa pagtaganag hinabang ug sa pagpakig-ambit sa edukasyon sa Bibliya nga buluhaton nga gihimo didto sa lokal nga mga Saksi.

[Mga hulagway]

Si Nadine sa Aprika

[Kahon sa panid 12]

Kon sa Unsang Paagi Makahatag ug Kaayohan ang Gingharian sa Diyos

Palihog basaha kining mga tekstoha diha sa imong kaugalingong Bibliya, ug tan-awa kon sa unsang paagi nagsaad ang Diyos sa pagtagbaw sa mga panginahanglan sa tawo sa mosunod nga mga bahin:

Maayong Panglawas “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”​—Pinadayag 21:4; Isaias 33:24; 35:​5, 6.

Edukasyon “Dili sila magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”​—Isaias 11:9; Habacuc 2:14.

Trabaho “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. . . . Dili sila magbudlay sa walay kapuslanan.”​—Isaias 65:21-23.

Pagkaon “Ang yuta magapatungha gayod sa iyang bunga; ang Diyos, ang atong Diyos, magapanalangin kanato.”​—Salmo 67:6; 72:16; Isaias 25:6.

Katilingbanong mga Kahimtang “Gibali ni Jehova ang olisi sa mga daotan . . . Ang tibuok yuta mipahulay na, nahigawas na sa kasamok.”​—Isaias 14:​5, 7.

Hustisya “Tan-awa! Usa ka hari magahari alang sa pagkamatarong; ug mahitungod sa mga prinsipe, sila magmando ingong mga prinsipe alang sa hustisya.”​—Isaias 11:3-5; 32:​1, 2.