Mga Boluntaryo nga Nagtrabaho

MATAG Biyernes sa hapon si Sirley, usa ka edarang magtutudlo sa Brazil, naggamit sa iyang sala sa balay nga klasehanan. Sa mga alas dos, si Amélia, usa sa mga estudyante, moabot. Wala gayod siya makapaltag leksiyon ug mas arang-arang nang mobasa kay sa ubang mga kabataan sa hayskul. Si Amélia maoy 82 anyos.

Gisunod ni Amélia ang panig-ingnan sa kapin sa 60 ka tigulang nga migraduwar sa libreng klase sa literasiya nga gidumala ni Sirley diha sa kaugalingon niyang lungsod. Di pa dugay, ang pagboluntaryo ni Sirley gipublikar diha sa mantalaang Jornal do Sudoeste sa Brazil. Human hisgoti nga siya nakahimog “dakong tabang ngadto sa kinabuhi sa mga tawo diha sa komunidad,” ang artikulo nag-ingon nga ang paagi ni Sirley sa pagtudlo sa mga tigulang epektibo kaayo nga “human lang sa 120 ka oras nga mga klase, ang mga tigulang makasulat na, makabasa nag mga mantalaan, ug makamao na sa yanong aritmetika ug sa uban pang adlaw-adlaw nga mga trabaho.” Ang teksbok nga gigamit ni Sirley, midugang ang artikulo, mao ang pulyeto nga Learn to Read and Write, nga gihimo sa mga Saksi ni Jehova. *

Gikan sa Pagkamaulawon Ngadto sa Pagkinabuhing May Dignidad

Lain pang estudyante ni Sirley, ang 68-anyos nga si Dona Luzia, nag-asoy nga sa wala pa siya makakat-on sa pagbasa ug pagsulat, maulaw siyang makigsulti sa uban. Bisan ang pagpamalit malisod nga buhaton. “Karon makasulat na ako sa akong mga paryente sa ubang mga lungsod, ug ako na ang magdumala sa kaugalingon kong salapi. Wala nay makapanikas kanako,” matod niya nga mapahiyomon. Si Maria, usab 68 anyos, nakahinumdom sa kaulaw nga iyang bation inigpirma sa iyang pensiyon nga tseke pinaagig tamla sa iyang kumagko. “Gibati  ko nga ako inutil,” matod niya. Apan salamat sa mga klase sa literasiya, malipayon na karon si Maria nga mosulat sa iyang kaugalingong pirma.

Ang pagdayeg gikan sa mga estudyante ug mga graduwado maoy nakapainila sa libreng programa ni Sirley nga tungod niana huot na ang iyang sala sa balay. Sa dili madugay mibalhin ang klase ngadto sa mas hamugaway nga dapit.

Usa ka Programang Nakadawat ug Pasidungog

Si Sirley maoy usa sa mga Saksi ni Jehova. Walay duhaduha nga sinati ka sa buluhatong edukasyon sa Bibliya nga ginahimo sa mga Saksi  ni Jehova ingong boluntaryong pag-alagad. Apan, ang kalamposan ni Sirley dili talagsaon. Ang mga klase sa literasiya nga gidumala diha sa ginatos ka Kingdom Hall sa tibuok Brazil nakatabang nag kapin sa 22,000 ka tawo sa maong nasod nga makakat-on sa pagbasa ug pagsulat.

Ang susamang mga programa sa mga Saksi ni Jehova nagmalamposon sa ubang mga bahin sa kalibotan. Pananglitan, sa Aprikanhong nasod sa Burundi, ang National Office for Adult Literacy (usa ka departamento sa Ministri sa Edukasyon) nalipay kaayo sa mga resulta sa programa sa literasiya nga gihimo sa mga Saksi nga tungod niana gihatagan niinig pasidungog ang upat ka magtutudlo sa programa tungod sa “kakugi nga gihimo sa pagtudlo sa uban aron makakat-on sa pagbasa.” Ang mga opisyal sa gobyerno ilabinang nakadayeg nga 75 porsiyento niadtong nakakat-on sa pagbasa ug pagsulat maoy mga hamtong nga mga babaye​—usa ka grupo nga sagad magpanagana sa pagtambong sa maong mga programa.

Sa Mozambique, 4,000 ka estudyante ang nagpalista sa mga klase sa literasiya sa mga Saksi, ug kapin sa 5,000 ka estudyante ang nakakat-on sa pagbasa ug pagsulat sa milabayng upat ka tuig. Usa ka kanhing estudyante ang misulat: “Buot kong ipahayag ang akong kinasingkasing nga pagpasalamat. Tungod sa maong tunghaan, makabasa na ako ug makasulat.”

Mga Hinabang nga “Gipakita sa Buhat Inay nga Pormalidad Lamang”

Ang buluhaton nga paghatag ug hinabang maoy laing matang sa boluntaryong  pag-alagad nga gihimo sa mga Saksi ni Jehova. Di pa dugay ang usa ka bodega haduol sa Paris, Pransiya, nahimong hugopanan sa daghang buluhaton. Mga 400 ka boluntaryo ang migugol sa ilang hinapos sa semana sa pag-empake ug mga pagkaon, besti, ug medisina. Sa pagkatapos sa semana, siyam ka dagkong kontiner nga punog mga suplay sa hinabang nga mobilig duolan sa $1 ka milyon (T.B.) ang andam nang ibiyahe sa barko. Wala madugay human niadto, ang kargamento miabot sa gigun-ob-sa-gubat nga mga nasod sa Sentral Aprika, diin ang lokal nga mga boluntaryong Saksi daling nag-apod-apod sa mga suplay. Kadaghanan sa mga suplay hinatag ra usab sa mga Saksi.

Gidayeg sa usa ka mantalaan sa Congo (Kinshasa) ang makitawhanong kalihokan sa mga Saksi ni Jehova ingong “gipakita sa buhat inay nga pormalidad lamang.” Ang mga opisyal sa United Nations High Commissioner for Refugees (UNHCR) nagpahayag usab sa ilang pagpaluyo. Usa ka opisyal sa UNHCR sa Democratic Republic of Congo nalipay pag-ayo sa kahapsay sa kalihokan sa pagtabang nga gihimo sa mga Saksi nga tungod niana iyang gipagamit ang iyang sakyanan sa mga boluntaryo. Nakadayeg usab ang mga tawo sa maong dapit. Sa dihang nakita sa mga nanan-aw kon unsa ka dali nga nakaabot ang mga suplay sa hinabang sa tanang nanginahanglan, ang pipila nangutana sa katingala: “Giunsa kamo pag-organisar aron mahatagan ninyo ang tanan nga nanginahanglan?”

Ang kalihokan sa pagtabang nga gihimo sa mga Saksi ni Jehova ug ang ilang mga programa sa literasiya maoy duha lamang ka pananglitan sa mga serbisyo nga gihimo sa mga Saksi sa tibuok kalibotan latas sa mga dekada. Apan, ang mga Saksi nalangkit usab sa lain pang matang sa buluhatong pagboluntaryo​—usa ka pag-alagad nga sa tinuod makahatag ug malungtarong kaayohan. Hisgotan kini sa sunod nga artikulo.

[Footnote]

[Kahon/Hulagway sa panid 6, 7]

Ang Nag-usab-usab nga Kalibotan sa Pagboluntaryo

Samtang gitadlastadlas ni Julie ang globo sa mga biyahe maylabot sa negosyo, bisan sa iyang puliking eskedyul nakahigayon gihapon siya alang sa pipila ka buluhatong pagboluntaryo​—pipila ka oras sa usa ka dapit ug usa ka adlaw sa laing dapit. Di pa dugay samtang didto sa Amerika del Sur, gigugol niya ang usa ka hapon sa pagtabang didto sa usa ka balay sa mga ilo duol sa Santiago, Chile. Siya nag-ingon nga ang pagbiyahe makahatag ug “ekselenteng mga kahigayonan” sa pagboluntaryo sa lainlaing mga paagi.

Sama kang Julie, nagakadaghan ang mga boluntaryo nga nagahatag ug panahon​—apan sa ginagmayng mga bahin lamang. “Kini maoy usa ka bag-ong hilig,” matod ni Sara Meléndez, presidente sa usa ka grupo sa tigdukiduki nga naghipos sa mga estadistika sa buluhatong pagboluntaryo. “Ang mga tawo moboluntaryo, apan kon himoon nila kini, panagsa ra kaayo.” Ingong resulta, ang mga organisador naproblema tungod sa kanihit sa mga boluntaryo, ug naglisod sila sa pagdumala sa ilang mga programa.

“Mapailin-ilinong Pagboluntaryo”

Ang pipila ka organisador nakamatikod nga kining maong bag-ong hilig​—ang paggahin ug mas gamayng panahon sa pagboluntaryo​—maoy tungod sa nausab nga tinamdan sa mga boluntaryo. “Ang ‘Ania ako kon imo akong gikinahanglan’ nga matang sa pagboluntaryo nahanaw na,” matod ni Susan Ellis, usa ka konsultant sa mga grupo nga nagboluntaryo. “Ang mga tawo dili na mohimog mga panaad.” Ang magsusulat nga si Eileen Daspin miuyon. Human interbiyoha ang ubay-ubayng mga direktor sa mga grupong nagboluntaryo mahitungod sa kanihit sa mga boluntaryo, siya mihinapos nga “ang pagboluntaryo naapektahan pag-ayo tungod sa kahadlok sa mga tawo sa tagdugayng mga panaad.”

Apan, ang direktor sa New York Cares, si Kathleen Behrens, nga gihisgotan una pa niini nga seryal, nagtuo nga kadtong nagboluntaryo sulod sa hamubong panahon mohimo niini, dili tungod kay dili bug-os ang pagkakomitido, apan tungod kay sila kulang ug panahon. Ang mga tawo nga nagkadipodipo pagdumala sa kapin sa 50-oras nga pagtrabaho sulod sa usa ka semana nga may atimanon pa nga mga anak o edarang mga ginikanan dili gayod makaboluntaryo sa regular nga paagi. “Apan, ang kamatuoran nga kining puliki nga mga tawo naghimo gihapon sa pag-alagad sa komunidad nga bahin sa ilang kinabuhi,” siya nag-ingon, “nagpakita nga hugot gayod ang ilang pagkakomitido.”

Alang niadtong mga boluntaryo nga kulang ug panahon, matod ni Behrens, “ang mapailin-ilinong pagboluntaryo” mao ang sulbad. Daghang organisasyon sa pagboluntaryo ang nagtanyag gani karon ug bisan usa ka adlaw lamang nga mga proyekto. “Makapaarang kini sa mga tawo sa pagboluntaryo sa mapuslanong mga paagi ug sa gihapon mabatonan nila ang gikinahanglang pagpailin-ilin sa pagbuhat niini sa igoigong kasubsob.”

Dugang pa, nagkadaghan ang mga tawo nga nagboluntaryo pinaagi lamang sa ilang kompiyuter sa balay, nga nag-entra ug mga impormasyon sa kompiyuter ug nanukiduki. “Ang pagboluntaryo pinaagig kompiyuter,” nag-ingon ang The Wall Street Journal, “mao tingali ang labing talagsaon, ug ang pipila nag-ingon nga labing epektibo, sa kon unsay gitawag nga ‘mapailin-ilinong pagboluntaryo.’”

[Kahon/Mga hulagway sa panid 8]

Pagpanghatag ug Hinabang sa Kobe!

Sa dihang mihapak ang usa ka linog sa mauswagong pantalan sa siyudad sa Kobe, Hapon, sa Enero 1995, grabe kaayo ang kadaot. Nga may kapin sa 5,000 nga nangamatay, mao kadto ang kinagrabehang linog nga mitay-og sa Hapon sukad sa 1923. Ang mga Saksi ni Jehova sa Hapon ug sa tibuok kalibotan misugod dayon sa paghatag ug hinabang sa mga biktima. Sa dihang gihimo ang pagtigom ug hinabang nga salapi, kapin sa usa ka milyong dolyar ang naamot sulod sa tulo ka tingtrabaho nga adlaw. Mibaha ang lainlaing matang sa mga hinabang ngadto sa Kobe.

Nakita sa usa ka Kristohanong ansiyano nga nalangkit sa buluhaton nga pagpanghatag ug hinabang nga ang iyang Kingdom Hall sa wala madugay gipondohan ug mas daghang abiyo kay sa magamit. Unsay buhaton sa sobrang mga abiyo? Misugyot siya nga idonar ang ubang mga abiyo sa usa ka ospital diha sa duol. Gipuno sa mga Saksi ang usa ka van ug mibiyahe agi sa mga gun-ob. Ang biyahe gidangtag daghang oras inay sa naandang pipila ka minutos. Sa ospital, gitanyag nila sa nagdumalang doktor ang ilang mga abiyo​—lakip ang mga habol, kutson, dayaper, preskong prutas, ug mga tambal nga mapalit nga walay reseta. Kay nalipay, miingon ang doktor nga ang ospital andam nga modawat sa bisan unsa nga ikahatag sa mga Saksi. Ang prutas ilabinang gikalipayan, tungod kay kulang ang preskong pagkaon alang sa tanang pasyente.

Samtang gidiskarga sa mga Saksi ang mga abiyo, ang doktor nagtindog didto nga hilom nga nagtan-aw​—bisan pa sa kadinalian sa iyang trabaho. Dayon mapainubsanon siyang miyukbo ug nagpasalamat kanila. Sa dihang milarga na sila, nagpabilin siyang nagtindog didto sa pagpakita sa kadako sa iyang pagpasalamat. Ang ansiyano nga nalangkit miingon nga kining mao gihapong ospital sa ulahi nakigkooperar pag-ayo sa mga pasyente nga mga Saksi ni Jehova.

[Kahon/Mga hulagway sa panid 9]

Buluhatong Pagboluntaryo—Usa ka Kahago nga Makahatag ug Kaayohan

Sa dihang ang usa ka grupo sa mga boluntaryo sa Kabezi, usa ka gamayng komunidad sa Burundi, buot magtukod ug usa ka Kingdom Hall sa mga Saksi ni Jehova, ang lokal nga opisyal mihimog usa ka talagsaong hangyo. Siya mihangyo kon mahimo bang ayohon sa mga Saksi ang dalan ubay sa giplanohang luna sa konstruksiyon. Malipayong miuyon ang mga Saksi sa pag-ayo sa nagubang dalan, nga ang tanang buluhaton gihimo nga manomano. Maayo kaayo kining pagkabuhat sa mga boluntaryo nga tungod niana ang lokal nga mga opisyal nagpasalamat sa ilang kahago ug andam nga espiritu. Human niana, gisugdan sa pagtukod sa mga boluntaryo ang ilang Kingdom Hall, nga gipakita sa ibabaw. Karon aduna na silay nindot nga tinukod nga makatabang sa pagpalambo sa edukasyon sa Bibliya sa katuigan pang moabot. Sa pagkatinuod, ang buluhatong pagboluntaryo sa lainlaing mga paagi makahatag ug dumalayong mga kaayohan.

[Mga hulagway sa panid 6, 7]

Si Sirley nakakaplag ug katagbawan sa pagtudlo sa uban aron makakat-on sa pagbasa

[Credit Line]

Nelson P. Duarte-Jornal do Sudoeste