Mga Batan-on Nangutana . . .

Sa Unsang Paagi Makatabang Kanako ang Pag-ampo?

“Ang pag-ampo mao ang nakatabang kanako nga matul-id pagbalik ang akong kinabuhi.”​—Brad. *

DAGHANG batan-on ang nag-ampo​—tingali labaw pa kay sa imong gidahom. Usa ka Gallup Youth Survey sa mga batan-ong nagpanuigon ug 13 hangtod 17 sa Tinipong Bansa nagpakita nga 56 porsiyento kanila miingon nga sila mag-ampo sa dili pa manihapon. Usa ka surbi sa batan-ong mga hamtong nagpakita nga 62 porsiyento kanila mag-ampo matag adlaw.

Bisan pa niana, alang sa daghang batan-on ang pag-ampo maoy usa lamang ka walay-pulos nga rituwal o usa lamang ka rutina. Diyutay lang sa mga batan-on ang nakabaton nianang gitawag sa Bibliya nga “tukmang kahibalo sa Diyos.” (Colosas 1:​9, 10) Tungod niini, ang Diyos dili hinungdanon sa ilang kinabuhi. Usa ka surbi nangutana sa mga tin-edyer kon sila nangayo bag tabang sa Diyos sa dihang mohimog hinungdanong desisyon. Usa ka tin-edyer nga babaye miingon: “Ako kanunayng mag-ampo sa Diyos sa paggiya kanako sa pagpili sa hustong dalan sa kinabuhi.” Bisan pa niana, siya miadmitir: “Bisan karon wala akoy mahinumdoman nga usa ka partikular nga desisyon.” Nan, dili ikatingala nga daghang batan-on kulang ug pagsalig nga ang pag-ampo adunay gahom o nga kini magpulos alang kanila!

Bisan pa niana, sama kang Brad nga gihisgotan sa sinugdan, libolibong batan-on nakasinati mismo sa gahom sa pag-ampo. Mao man usab ikaw! Gipakita sa miaging artikulo kon nganong kita makasalig nga ang Diyos magpatalinghog sa atong mga pag-ampo. * Nan ang pangutana mao, Sa unsang paagi makatabang kanimo ang pag-ampo? Una, susihon nato kon sa unsang paagi tubagon sa Diyos ang atong mga pag-ampo.

Kon sa Unsang Paagi Tubagon sa Diyos ang mga Pag-ampo

Sa kapanahonan sa Bibliya ang pipila ka tawo sa pagtuo nakabaton ug direkta​—gani milagroso​—nga mga tubag sa ilang mga pag-ampo. Pananglitan, sa dihang nasayran ni Haring Ezequias nga siya adunay makamatay nga sakit, siya nangamuyo nga luwason sa Diyos. Ang Diyos mitubag: “Akong nadungog ang imong pag-ampo. Akong nakita ang imong mga luha. Ania, ako magaayo kanimo.” (2 Hari 20:1-6) Ang ubang mga lalaki ug babaye nga mahinadlokon sa Diyos samang nakasinati sa pagpangilabot sa Diyos.​—1 Samuel 1:​1-​20; Daniel 10:​2-​12; Buhat 4:​24-​31; 10:​1-7.

Hinunoa, ang pagpangilabot sa Diyos dili gayod maoy naandan, bisan sa kapanahonan sa Bibliya. Kasagaran, tubagon sa Diyos ang mga pag-ampo  sa iyang mga alagad, dili sa milagrosong pagpangilabot, kondili pinaagi sa pagtabang kanila nga “mapuno sa tukmang kahibalo sa iyang kabubut-on diha sa tanang kaalam ug espirituwal nga pagsabot.” (Colosas 1:​9, 10) Oo, ang Diyos mitabang pinaagi sa pagpalig-on sa iyang katawhan sa espirituwal ug sa moral​—naghatag kanila ug kaalam ug pagsabot aron makahimog maalamong mga desisyon. Sa dihang ang mga Kristohanon anaa sa kalisdanan, dili awtomatikong wad-on sa Diyos ang pagsulay. Hinunoa, siya nagtagana kanila ug “gahom nga labaw sa kasarangan” aron sila makalahutay niini!​—2 Corinto 4:7; 2 Timoteo 4:17.

Sa ingon usab karon, ang imong pag-ampo lagmit dili tubagon sa talagsaong paagi. Apan sama sa iyang gihimo kaniadto, ang Diyos makahatag kanimo sa iyang balaang espiritu ug makalig-on kanimo sa pagdumala sa bisan unsang mga kahimtang nga imong maatubang. (Galacia 5:​22, 23) Sa pag-ilustrar, tagdon nato ang upat ka espesipikong mga paagi nga ang pag-ampo makatabang kanimo.

Makatabang Kini sa Paghimog mga Desisyon

Si Karen nakigdeyt sa usa ka batan-ong lalaki nga daw adunay hataas nga mga tumong sa espirituwal. “Siya kanunayng moingon kanako nga buot niyang mahimong ansiyano sa kongregasyon,” miingon si Karen. Kining tanan daw maayo nga paminawon. Apan “daghan usab siyag hisgotan bahin sa negosyo nga iyang gisugdan ug bahin sa tanang butang nga iyang mapalit alang kanako. Nagsugod ako sa pagduhaduha sa iyang sinseridad.” Giampo kini ni Karen. “Ako nangamuyo kang Jehova nga buksan ang akong mga mata ug ipakita kanako kon unsay akong gikinahanglang masayran bahin sa maong lalaki.”

Usahay ang mismong akto sa pag-ampo mapuslanon, sanglit kini makatabang kanimo sa pagpamalandong ug maayo bahin sa mga butang nga imong gikabalak-an sumala sa panglantaw ni Jehova. Apan gikinahanglan usab ni Karen ang praktikal nga tambag. Makadawat ba siya ug milagrosong tubag? Buweno, tagda ang asoy sa Bibliya bahin kang Haring David. Sa dihang iyang nasayran nga ang iyang sinaligan nga higalang si Ahitopel nagtambag sa iyang mabudhiong anak nga si Absalom, si David miampo: “Palihog, himoang kabuangan ang tambag ni Ahitopel, Oh Jehova!” (2 Samuel 15:31) Apan milihok usab si David kaharmonya sa iyang pag-ampo. Iyang gisalig kang Husai kini nga sugo: “Unya pakyason mo ang tambag ni Ahitopel alang kanako.” (2 Samuel 15:34) Sa samang paagi, si Karen milihok nga kaharmonya sa iyang pag-ampo pinaagi sa pagpakigsulti sa usa ka hamtong nga Kristohanong ansiyano nga nakaila sa iyang trato. Gipamatud-an sa ansiyano ang gikahadlokan ni Karen: Ang iyang trato wala kaayoy pag-uswag sa espirituwal.

Si Karen miingon: “Ang maong kahimtang nakabuka sa akong mga mata sa gahom sa pag-ampo.” Ikasubo, ang iyang kanhing trato nangagpas sa bahandi ug mihunong sa pag-alagad sa Diyos. “Kon ako naminyo pa kaniya,” miingon si Karen, “mag-inusara tingali akong motambong sa Kristohanong mga tigom.” Ang pag-ampo nakatabang kang Karen sa paghimo ug usa ka maalamong desisyon.

Makatabang Kini sa Pagkontrolar sa Imong Emosyon

“Nagpagula ang hungog sa tibuok niyang espiritu,” nag-ingon ang Bibliya sa Proverbio 29:​11, “apan siya nga maalamon nagpakalma niini hangtod sa kataposan.” Ang problema mao nga daghang tawo karon nagkinabuhi nga nag-antos sa grabeng emosyonal nga kalisod ug sagad mawad-ag pailob​—nga usahay dunay dili-maayong resulta. Ang batan-ong si Brian nahinumdom: “May problema ako sa akong kauban sa trabaho. Usa ka adlaw mihulbot siya ug kutsilyo.” Unsa kahay imong buhaton? Si Brian miampo. Siya miingon: “Jehova tabangi ako nga magpabiling kalmado, ug napuypoy siya sa dihang ako siyang gipakigsultihan. Iyang gibuhian ang kutsilyo ug milakaw.” Ang pagkontrolar sa iyang emosyon nakatabang kang Brian nga dili magpadaog sa kasuko, ug lagmit mao kini ang nakaluwas sa iyang kinabuhi.

Dili ka tingali kanunayng tionan ug kutsilyo. Apan dunay daghang kahimtang sa imong kinabuhi nga kinahanglang imong kontrolahon ang imong emosyon. Ang pag-ampo makatabang kanimo sa pagpabiling kalmado.

Makatabang Kini sa Dihang Ikaw Magmagul-anon

Si Barbara nahinumdom nga “nakaagig masulayong panahon” mga pipila na ka tuig nga milabay. Siya miingon: “Ang akong trabaho, pamilya, mga higala​—daw walay mahimo. Wala ako masayod kon unsay akong buhaton.” Si Barbara awtomatikong miampo alang sa tabang. Apan dihay suliran. “Wala ako masayod kon unsay akong pangayoon kang Jehova,” siya miingon. “Sa kataposan, ako nangayo nga tagaan ug kalinaw sa hunahuna. Ako mihangyo matag gabii nga tabangan niya ako nga dili mabalaka sa bisan unsang butang.”

Sa unsang paagi nakatabang kaniya ang maong pag-ampo? Siya miingon: “Pipila ka adlaw sa ulahi,  akong naamgohan nga bisan tuod wala mahanaw ang akong mga problema, wala na kaayo ako maghunahuna ug mabalaka pa bahin niini.” Ang Bibliya nagsaad: “Ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”​—Filipos 4:​6, 7.

Makatabang Kini Kanimo nga Mas Masuod sa Diyos

Tagda ang kasinatian sa usa ka batan-ong ginganlag Paul. “Di pa dugay nga mibalhin akog puyo uban sa akong mga paryente,” matod niya. “Usa ka gabii niana akong gibati ang hilabihang kaguol. Bag-o pa lang akong migraduwar sa hayskul, ug gimingaw kaayo ko sa tanan kong mga higala. Nianang gabhiona mihilak ako tungod kay akong nahinumdoman ang among malipayong mga panahon.” Unsay gihimo ni Paul? Sa unang higayon, siya kinasingkasing nga nag-ampo. Siya miingon: “Gibuksan ko ang akong kasingkasing ug nangayo kang Jehova ug kalig-on ug kalinaw sa hunahuna.”

Unsay resulta? Si Paul nahinumdom: “Pagkaugma, mibangon ako nga gaan kaayo ang gibati sukad masukad sa akong kinabuhi. Nabag-o ang akong hunahuna gikan sa hilabihan nga kaguol ngadto sa pagkabaton ug ‘kalinaw sa Diyos nga labaw sa tanang panghunahuna.’” Karon nga nagmalinawon na ang iyang kasingkasing, si Paul makalantaw na sa mga butang nga dili na kaayo emosyonal. Ug iyang naamgohan nga ang ‘kanhing mga adlaw nga daw malipayon’ dili ra gayod diay makapalipay kaayo. (Ecclesiastes 7:10) Ngani, ang “mga higala” nga iyang gikamingawan pag-ayo dili gayod maayog impluwensiya kaniya.

Labaw sa tanan, nasinati ni Paul ang pag-atiman ni Jehova sa personal nga paagi. Iyang nakita ang kamatuoran sa mga pulong sa Santiago 4:8: “Duol sa Diyos, ug siya moduol kaninyo.” Alang kang Paul kini maoy usa ka dakong kausaban. Siya napalihok sa pag-una kang Jehova labaw kay sa tanang uban pang butang sa iyang kinabuhi ug sa pagpahinungod sa iyang kinabuhi ngadto kaniya.

Pakigsulti sa Diyos!

Kining positibo nga mga kasinatian naghatag ug pasalig nga ang pag-ampo makatabang kanimo. Siyempre, mahitabo lamang kana kon ikaw seryoso nga makaila sa Diyos, nga ugmaron ang pakighigala uban kaniya. Ikasubo, daghang batan-on ang naglangaylangay sa pagbuhat niini. Si Carissa gimatuto sa usa ka Kristohanong pamilya. Apan siya miadmitir: “Sa akong hunahuna niini lamang milabayng pipila ka tuig nga bug-os kong nasabtan ang kahinungdanon sa atong talagsaong relasyon uban kang Jehova.” Si Brad, nga gihisgotan sa sinugdan, gimatuto ingon nga usa ka Kristohanon apan mibiya sa matuod nga pagsimba sulod sa daghang katuigan. “Ayha pa ako mibalik kang Jehova,” matod niya, “sa dihang akong naamgohan ang nawala kanako. Karon ako nakaamgo kon unsa ka way hinungdan ug kahaw-ang ang kinabuhi kon wala kana nga relasyon.”

Apan, ayaw paghulat nga modangat ang kagul-anan una ka pa moduol sa Diyos. Sugdi karon ang pagpakigsulti kaniya​—nga makanunayon! (Lucas 11:​9-​13) “Sa atubangan niya ibubo ninyo ang inyong kasingkasing.” (Salmo 62:8) Sa dili madugay imong makita nga ang pag-ampo makatabang gayod kanimo!

[Mga footnote]

[Kahon/Mga hulagway sa panid 15]

Ang Pag-ampo Makatabang Kanimo

● Sa paghimog mas maayong mga desisyon

● Sa pagpabiling malinawon panahon sa kapit-os

● Sa pagkaplag ug kahupayan gikan sa kaguol

● Sa pagkahimong mas suod sa Diyos