Ang mga Reunyon sa mga Pamilya sa Korea—Usa ka Bag-ong Sinugdanan?

TINAMPO SA MAGSUSULAT SA PAGMATA! SA REPUBLIKA SA KOREA

GITAWAG kadto nga makapatandog ug kulbahinam nga tinuod-kinabuhing panghitabo. Nakadani kadto ug kapin sa 1,300 ka lokal nga mga reporter ug kapin sa 400 ka tigbalita sa ubang mga nasod. Ang panghitabo mao ang pagkita-pag-usab sa mga pamilya gikan sa amihanan ug habagatang mga bahin sa Korea​—mga pamilya nga nagkabulag sulod na sa mga 50 ka tuig.

Sulod sa tunga sa siglo, daghang Koreano ang walay kontak sa ilang mga paryente​—pinaagig sulat, fax, o telepono. Ang walay-militar nga sona nga nagbahin sa nasod maoy nagpabulag sa mga membro sa pamilya sa usag usa. Unsay nagpaposible niini nga reunyon? *

Usa ka Reunyon nga Dakog Kahulogan

Sa Agosto 15, 2000, usa ka ayroplano nga dunay bandera sa Republika sa Demokratikanhong Katawhan sa Korea mitugpa sa Kimpo International Airport sa Republika sa Korea. Ang ayroplano may sakayng mga pasahero gikan sa amihanan nga nakadawat ug pamatuod pinaagi sa International Red Cross nga buhi pa ang uban nilang mga paryente didto sa habagatan. Dayon gidala sa mao gihapong ayroplano ang 100 ka Koreano gikan sa habagatan ug mipadulong sa amihanan aron mahimamat nila ang ilang mga paryente. Handurawa nga ikaw dunay igsoong lalaki, igsoong babaye, inahan, amahan, anak nga lalaki o babaye, o kapikas nga wala nimo makita kapin na sa 50 ka tuig! Daghan nga nangabot alang niining maong reunyon maoy hapit na mo-70 o 80 anyos, ug wala nila makita ang ilang mga paryente sukad nga sila mga tin-edyer!

Gihikay kining maong mga pagduaw nga taman lang sa upat ka adlaw ug tulo ka gabii, human niana ang tanan kinahanglang mopauli sa ilang tagsatagsa ka nasod. Tino nga mao kiniy hinungdan kon nganong daghan sa nagkita-pag-usab nga mga membro sa pamilya way-hunong  nga nag-estoryahanay! Kay may posibilidad nga dunay masakit tungod sa sobrang emosyonal ug mental nga tensiyon, nag-atang na ang mga doktor, nars, ug mga ambulansiya. Dili ikatingala, kining tanan napahimuslan.

Ang mga reunyon naglangkit sa gamay lang kaayong bahin sa bug-os nga gidaghanon sa nagkabulag nga mga pamilya. Gibanabana sa uban nga dunay 690,000 ka tawo nga kapin sa 60-anyos ang edad ug 260,000 nga kapin sa 70-anyos ang edad, nga nahimulag gihapon sa ilang mga minahal. Apan, sa 76,000 ka tawo gikan sa Republika sa Korea nga nakakab-ot sa pipila ka kinahanglanon ug miaplay aron makaduaw sa ilang mga paryente sa amihanan, 100 lamang ang napili alang niini nga reunyon.

Lakip niini mao ang 82-anyos nga si Yang Jin-yeul. Nakadawat siya ug notisya pinaagi sa Red Cross nga si Yang Won-yeul, ang iyang 70-anyos nga igsoong lalaki sa amihanan, nangita sa iyang mga paryente sa habagatan. Ang manghod nga lalaki ni Yang Jin-yeul nag-eskuyla kanhi sa usa ka unibersidad sa Seoul sa 1950 sa dihang siya nawala panahon sa Gubat sa Korea. Wala nay balita bahin kaniya sukad niadto. Silang duha, uban sa ilang duha ka igsoong babaye, nagkita pag-usab human nga magkabulag sulod sa lima ka dekada!

Nagkita pag-usab si Lee Pok-yon, 73-anyos, ug ang iyang 70-anyos nga asawa ug duha ka anak nga lalaki. Kataposan niyang nakita ang iyang pamilya niadtong duha ug lima ka tuig pa lang ang edad sa iyang mga anak. Usa ka adlaw niana panahon sa gubat, migawas siya sa balay nga nag-ingong mopalit siya ug bisikleta. Nawala siya ug wala nay balita bahin kaniya sukad niadto. Sa ilang emosyonal nga reunyon, ang iyang asawa, nga karon may sakit na nga palsy ug diabetes, nakasukna sa pangutana nga iyang gihinuktokan sa daghan nang dekada: Nganong nadugay siya sa pagpalit sa bisikleta?

Si Lee Chong-pil, 69 anyos, maoy usa ka estudyante sa hayskul sa dihang nahimulag siya sa iyang pamilya sa 1950 ug girehistro nga nawala. Nagkita sila pag-usab ni Cho Won-ho, iyang 99-anyos nga inahan, duha ka igsoong lalaki, ug duha ka igsoong babaye didto sa habagatan. Ikasubo, ang iyang tigulang nga inahan wala na makaila kaniya.

Pipila lamang kini sa daghang makapatandog nga mga reunyon nga nahitabo. Kini nga hitabo direkta nga gipasalida sa ubay-ubayng mga estasyon sa TV sa lokal ug sa ubang mga nasod. Sa pagtan-aw niini nga mga reunyon, mitulo usab ang mga luha sa kalipay sa mga tumatan-aw! Daghan ang naghunahuna kon kini ba motultol sa dugang pang mga reunyon. Bisan pa niana, natapos ang mga reunyon, kini nga panagbulag halos parehas ka sakit sa unang panagbulag. Ang minahal nga mga membro sa pamilya wala mahibalo kon magkita pa ba sila o kanus-a na pod sila magkita.

Tunga sa Siglo nga Panagbulag​—Hapit Nang Matapos?

Sa Agosto 15, 1945, ang Korea nakabatog kagawasan human sa 36 ka tuig sa kolonyal nga pagmando sa Hapon. Ugaling, sa wala madugay ang Korea nabahin tungod sa politika niadtong panahona. Pinaagi sa pagpapahawa sa mga Hapon gikan sa Korea, ang mga sundalong Amerikano maoy nakaangkon sa paggahom sa teritoryo sa habagatan sa 38th parallel, ug ang mga sundalong Sobyet maoy nagmando sa teritoryo sa amihanan. Ang gubat nga mibuto human niana wala makasulbad sa mga suliran. Karon dunay duha ka gobyerno ang Korea. Sukad sa 1945 ug sa tibuok  panahon sa Gubat sa Korea, libolibo ka pamilya ang nagkabulag. Sa dihang sa kataposan natapos ang gubat sa 1953, ang walay-militar nga sona nga nalukop ug mga bombang gilubong nagbahin sa nasod karon ngadto sa duha.

Sa daghang katuigan, dihay pipila ka timailhan nga magkauli ang amihanan ug habagatan. Apan, sa Hunyo 13, 2000, ang ayroplano nga gisakyan sa presidente sa Republika sa Korea, si Kim Dae-jung, mitugpa sa Sunan Airport sa Pyongyang. Ang pangulo sa Republika sa Demokratikanhong Katawhan sa Korea, si Kim Jong-il, didto sa tugpahanan nga naghulat sa pag-abiabi kaniya. Sa kalit lang daw nabuksan ang pultahan sa paglaom. Wala pa gayod sukad magkita kining duha ka lider. Apan niining higayona maora silag managsoon nga dugayng wala magkita. Gisundan kini sa tulo-ka-adlaw nga komperensiya diin ang duha ka lider nanaad nga maningkamot nga taposon ang tunga-sa-siglong panagbingkil ug maningkamot nga magkauliay. Ang mga reunyon sa nagkabulag nga mga membro sa pamilya maoy usa sa unang mga resulta niana nga komperensiya. Wala madugay gihimo ang ubang mga lakang.

Ang duha ka lider nagkasabot usab nga gamiton pag-usab ang riles nga nagkonektar sa amihanan ug sa habagatan. Dunay 12 kilometros nga riles sa habagatang bahin sa Korea ug 8 kilometros diha sa amihanang bahin nga gidahom nga maayo na pagka-Septiyembre 2001. Kining maong riles motadlas sa walay-militar nga sona, nga magkonektar pag-usab sa duha ka bahin sa Korea. Ug kon ang riles sa ngadtongadto makonektar na sa Trans Chinese Railroad, kini maggikan sa Korea latas sa Tsina ug moabot hangtod sa Uropa. Kon sa mga pulong pa ni Presidente Kim Dae-jung, kini mahimo gayod nga “usa ka bag-ong dalan sa negosyo nga gama sa puthaw.” Laing riles sa ngadtongadto ang gam-on nga motadlas sa tunga sa walay-militar nga sona ug ikonektar ngadto sa Trans-Siberian Railroad sa Rusya.

Panahon ray mag-igo kon kining maong mga lakang maoy timaan sa usa ka bag-ong sinugdanan. Sa kasamtangan, ang mga paningkamot nga magkita pag-usab ang mga pamilya maoy dalayegon. Bisan pa niana, dayag nga ang katawhan nanginahanglan ug tibuok-kalibotang pagmando sa Gingharian sa Diyos. (Mateo 6:​9, 10) Niadto pang 1912 nga ang mga Saksi ni Jehova nagsugod sa pag-organisar sa pagpakaylap niining maong mensahe sa paglaom sa Sidlakan. Daghan didto sa amihanang bahin sa Korea ang nakadungog niini, ug ubay-ubay ang midawat niini. Apan, daghan kanila ang nabilanggo panahon sa pagmando sa Hapon tungod sa ilang pagdumili nga moapil sa gubat.

Human sa Gubat sa Kalibotan II ug sa pagpagawas kanila sa bilanggoan, kining maong mga Kristohanon, mga Saksi ni Jehova, nagsugod sa pagtigom. Kadaghanan kanila miadto sa habagatan diin sila dunay kagawasan sa pagsimba. Sa Hunyo 1949, natukod ang unang kongregasyon sa Seoul, ug karon kini mitubo ngadto sa usa ka dakong organisasyon nga may kapin sa 87,000 ka aktibong mga Saksi sa Republika sa Korea. Apil niini mao ang libolibo nga nahimulag usab sa ilang mga paryente sa amihanan.

Tingali mausab ang mga hitabo sa usa ka paagi nga magtugot sa tanang nagkabulag nga mga pamilya sa Korea nga magkita pag-usab. Labing hinungdanon, ang pagtapos niini nga panagbulag magpaposible sa 22 milyones ka molupyo sa Republika sa Demokratikanhong Katawhan sa Korea nga sa kataposan makabaton ug higayon nga makadungog sa mensahe sa Bibliya.

[Footnote]

[Mga hulagway sa panid 13]

Magtiayon (ibabaw) ug inahan ug anak nga lalaki (ubos) nagkita pag-usab

[Hulagway sa panid 14]

Nagbuhat ug pagsimba sa katigulangan, usa ka lalaki nagyukbo sa larawan sa iyang amahan, kinsa namatay nga wala gayod sila magkita pag-usab

[Hulagway sa panid 15]

Si Yang Jin-yeul (layong wala) ug iyang igsoong lalaki (tunga) gikan sa amihanan, nagkita pag-usab

[Picture Credit Line sa panid 13]

Mga hulagway sa mga panid 13-15: The Korea Press Photojournalists Association