Gikan sa Among mga Magbabasa

Pagkaway-Trabaho Buot ko kamong sultihan nga nadasig kaayo ako sa artikulong “Unsa nay Nahitabo sa ‘Tibuok Kinabuhing Trabaho’?” (Oktubre 8, 2000) Maayo kaayo ang mga sugyot kon unsaon sa pagpangandam sa dihang magpakunhod ug trabahante ug kon unsaon nga makasagubang sa pagkaway-trabaho. Gibati kong mas relaks alang sa interbiyo sa trabaho nga akong adtoon.

F. W., Tinipong Bansa

Parmasya sa Insek Nabalaka ako maylabot sa teoriya luyo sa alternatibong pagpanambal nga gihulagway sa artikulong “Pag-adto sa Usa ka Parmasya sa Insek.” (Nobyembre 8, 2000) Dili ako supak sa paggamit ug mga tambal nga tanom. Apan, dili ba mas daghan pa ang nalangkit sa yin ug yang kay sa yano lang nga init ug bugnaw? Yano ra kaayo ang inyong paghisgot sa usa ka doktrina nga naggikan sa okulto ug bakak nga relihiyon. Wala ba kana maghimong peligroso sa maong pagpanambal?

V. A., Tinipong Bansa

Tinuod nga sa Sidlakan ang prinsipyo sa yin ug yang gigamit diha sa daghang kalihokan, lakip na sa pagpanag-an. Apan, kini wala magpasabot nga dili na kini magamit sa laing mga paagi nga wala idili sa Kasulatan, sama sa pagdayagnos sa sakit. Busa ang tagsatagsa ka Kristohanon kinahanglang mohukom kon angay bang gamiton ang mga paagi sa pagpanambal nga gipasukad niining prinsipyoha.​—ED.

Mga Problema sa Kabataan Natandog kaayo ako sa seryal nga “Mga Problema sa Kabataan​—Sa Kataposan Masulbad Na!” (Disyembre 8, 2000) Aduna akoy makapasubong kasinatian sa akong pagkabata. Ang akong inahan palahubog ug nagdagmal kanako halos kada adlaw. Sa paglabay sa panahon, ako naguol kaayo ug kanunay nang buot mamatay. Ang mga artikulo nagpahinumdom kanako kon unsa ka hinungdanon ang bugkos tali sa mga anak ug mga ginikanan. Karon nga nasinatian ko ang gugma ni Jehova alang kanako, gipaningkamotan kong magmasinaboton sa akong inahan; siya adunay susamang mga kasinatian sa iyang pagkabata.

U. P., Republika sa Korea

Ako usa ka magtutudlo nga taga-Argentina, ug gituohan ko nga makaayo kon ang tanang ginikanan ug mga magtutudlo magpadapat sa tambag niining gulaa​—ug sa Bibliya, nga kanunay ninyong gikutlo.

F. S., Espanya

Kasuko Akong nabasa ang balita diha sa “Pagpaniid sa Kalibotan” bahin sa “Kasuko ug ang Imong Kasingkasing.” (Disyembre 8, 2000) Tinuod gayod kini. Duna akoy sakit sa kasingkasing nga kanunayng makapaluya kanako. Ang eskuylahan usa ka hagit alang kanako tungod kay dili mahimong masuko ako. Apan, sa tabang ni Jehova nga Diyos ako nagmalamposon sa pagwagtang sa kasuko gikan sa akong kinabuhi.

A. F., Tinipong Bansa

Mga Sakit sa “Prostate” Gipabilhan ko pag-ayo ang di pa dugayng artikulo nga “Pagsagubang sa mga Sakit sa ‘Prostate.’” (Disyembre 8, 2000) Apan, kini wala gayod maghisgot sa radioactive-seed-implant nga pamaagi. Bag-o lang kining gipublikar sa nag-unang mga magasin sa T.B. ug menos rag segundaryong mga epekto.

H. Z., Tinipong Bansa

Salamat sa pagpahibalo sa among mga magbabasa bahin niini nga pagtambal. Gipaila sa mga taho nga ang radioactive-seed therapy (brachytherapy) dili kaayo makadaot sa usa ka pasyente kay sa naandang pag-opera ug sa ubang mga kahimtang kini usab makaayo. Apan, dangtan pag pipila ka panahon ayha pa mahibaloi sa mga doktor ang layog-abot nga mga epekto niini. Sa pagkakaron, angayng masayran sa bug-os sa mga pasyente ang ilang mga kapilian sa dili pa modesisyon.​—ED.

Yellowstone Akong pahalipay alang sa artikulong “Yellowstone​—Dapit Diin Nagsagol ang Tubig, Bato, ug Kalayo”! (Disyembre 8, 2000) Ang akong asawa ug ako nalipay nga nakatrabaho niini nga parke sa miaging tuig. Ang akong asawa nagtrabaho sa usa ka research database, ug ako ang nagsuhid sa kalamakan. Mao nga sa dihang migula kining artikuloha, nahinam kaayo kami ug gibasa dayon namo kini. Maayo kaayong pagkasulat! Maayong pagkapili ang mga hulagway ug maayong pagkadukiduki. Tukma ang tanang impormasyon. Apan kinahanglang adtoon gayod kining lugara aron makita ang kaanindot niini! Walay kataposan ang katahom.

D. S., Tinipong Bansa