Ang Hunahuna sa Bibliya

Kinsa ang Antikristo?

“INYONG NADUNGOG NGA ANG ANTIKRISTO MOABOT.”​—1 JUAN 2:18.

KON gipasidan-an ka nga may nakitang makuyaw nga kriminal nga nagpadulong sa imong kasilinganan, unsay imong buhaton? Lagmit imong susihon ang tukmang mga detalye bahin sa iyang dagway ug mga pamaagi. Mag-igmat ka gayod.

Ang susamang kahimtang naglungtad karon. Gipasidan-an kita sa mga pulong ni apostol Juan: “Ang matag inspiradong pahayag nga wala magasugid bahin kang Jesus dili gikan sa Diyos. Dugang pa, kini ang inspiradong pahayag sa antikristo nga inyong nadungog nga moabot, ug karon kini ania na sa kalibotan.” (1 Juan 4:3) Aduna bay ingon niana nga antikristo, usa nga kaaway sa Diyos ug maglilimbong sa mga tawo, nga nagahulga karon sa kaayohan sa tanang tawo?

Lima ka beses nga gigamit ni Juan ang terminong “antikristo” diha sa duha sa iyang mga sulat. Nagtumong kini sa usa ka kahugpongan nga nagsupak sa gitudlo sa Bibliya bahin kang Jesu-Kristo ug naglakip sa mga impostor kinsa nagpakaaron-ingnon nga mao ang Kristo o ingong pinadala niya. Naghatag ang Bibliya ug kasaligang impormasyon bahin sa antikristo. Apan ingon usahay sa kahimtang sa mga kriminal, ang way-basehanang mga taho bahin niining misteryosong kahugpongan gihatagan ug labawng pagtagad kay sa kamatuoran.

Usa ka Kaso sa Sayop nga Pag-ila

Sukad sa mga adlaw ni apostol Juan, nangangkon ang mga tawo nga ang mga pulong ni Juan bahin sa antikristo nagtumong sa usa ka espesipikong indibiduwal. Gisugyot sa mga tawo ang lainlaing mga tawo nga ilang gituohan nga mao ang antikristo. Kasiglohan kanhi daghan ang nagtuo nga ang Romanong Emperador nga si Nero mao ang antikristo. Sa ulahi, ang bul-og sa pagdumot ug kalisang nga gipaagom ni Adolf Hitler nagpakombinsir sa daghan nga siya mao ang antikristo. Ang termino gipadapat pa gani ngadto sa Alemang pilosopo nga si Friedrich Nietzsche. Bisan pa niana ang uban nagtuo nga ang antikristo moabotay pa ug nga siya magpakita ingong malipoton, mapintas nga politiko kansang tuyo mao ang pagmando sa kalibotan. Sila nagtuo nga ang mapintas nga mananap sa Pinadayag kapitulo 13 maoy usa ka tinong reperensiya bahin sa antikristo nga gihisgotan ni Juan. Sila nag-ingon nga ang marka niini nga 666 daw nagpaila niining umaabot nga mananaog sa pagkadaotan.

Kadtong nagpasiugda niining mga ideyaha nagpatuo nga si Juan nagpunting sa usa lamang ka antikristo. Apan unsay gipakita sa iyang pulong? Tagda ang 1 Juan 2:​18: “Ingon sa inyong nadungog nga ang antikristo moabot, bisan gani karon adunay daghang mitungha nga mga antikristo.” Oo, ‘daghang antikristo,’ dili usa, ang responsable sa gubot nga espirituwal nga kahimtang niadtong unang siglo. Karong adlawa adunay, dili lang usa, kondili daghang antikristo  nga naglangkob sa antikristo nga matang. Sa tingob, gipahamtang nila ang espirituwal nga kagun-oban sa katawhan. (2 Timoteo 3:​1-5, 13) Kinsay naglangkob sa antikristo?

Atong susihon ang mapintas nga mananap sa Pinadayag kapitulo 13 isip usa ka posibilidad. Si apostol Juan misulat: “Ang mapintas nga mananap nga akong nakita sama sa usa ka leopardo, apan ang mga tiil niini morag mga tiil sa oso, ug ang baba niini morag baba sa leyon.” (Pinadayag 13:2) Unsay kahulogan niining maong mga kinaiya?

Ang mga eskolar sa Bibliya nakamatikod ug kalangkitan tali sa Pinadayag 13 ug Daniel kapitulo 7. Gihatagan sa Diyos si Daniel ug panan-awon bahin sa mahulagwayong mga mananap, lakip sa usa ka leopardo, oso, ug leyon. (Daniel 7:2-6) Unsang kahulogan ang gihatag sa manalagna sa Diyos niana? Misulat siya nga kadtong mapintas nga mga mananap nagsimbolo sa yutan-ong mga hari, o mga kagamhanan. (Daniel 7:17) Busa kita makataronganong makahinapos nga ang mapintas nga mananap sa Pinadayag naghawas sa tawhanong mga kagamhanan. Sanglit kining maong mga kagamhanan nagsupak sa Gingharian sa Diyos, sila naglangkob usab sa usa ka bahin sa antikristo.

Kinsa pa ang Naglangkob sa Antikristo?

Sa dihang si Kristo, ang Anak sa Diyos, nagkinabuhi pa dinhi sa yuta, daghan siyag kaaway. Bisan tuod karon dili na nila siya maabot sa pisikal nga paagi, ang iyang modernong-adlaw nga mga kaaway wala pa molunga. Matikdi kon kinsa ang nalakip niini nga mga kaaway.

Si apostol Juan miingon: “Kinsa ba ang bakakon kondili siya nga nagalimod nga si Jesus mao ang Kristo? Kini mao ang antikristo, ang usa nga nagalimod sa Amahan ug sa Anak.” (1 Juan 2:22) Gituis sa mga apostata ug mga lider sa bakak nga pagsimba ang tin-aw nga mga pagtulon-an ni Jesus ngadto sa makapalibog kaayong relihiyosong panglimbong. Kanang mga tawhana nagsalikway sa kamatuoran sa Bibliya ug nagsabwag ug mga kabakakan sa ngalan sa Diyos ug ni Kristo. Ilang gilimod ang tinuod nga relasyon sa Amahan ug sa Anak pinaagi sa ilang doktrina sa Trinidad. Busa, sila usab maoy bahin sa antikristo.

Gipasidan-an na ni Jesus ang iyang mga tinun-an sa Lucas 21:12: “Pagadakpon kamo sa mga tawo ug pagalutoson kamo, nga igatugyan kamo ngadto sa mga sinagoga ug sa mga bilanggoan . . . tungod sa akong ngalan.” Sukad sa unang siglo, ang matuod nga mga Kristohanon nag-antos sa mapintas nga paglutos. (2 Timoteo 3:12) Ang mga tigpasiugda sa maong pagtratar nagsupak kang Kristo. Sila maoy bahin usab sa antikristo.

“Siya nga dili dapig kanako maoy batok kanako, ug siya nga dili motipon kanako matibulaag.” (Lucas 11:23) Dinhi gipahayag ni Jesus nga ang tanang nagsupak kaniya ug sa balaang mga katuyoan nga iyang gipaluyohan malakip sa kategoriya sa antikristo. Unsang kataposang dulnganan ang naghulat kanila?

Unsay Naghulat sa mga Antikristo?

“Pagalaglagon [sa Diyos] kadtong nagasulti ug bakak. Ang tawo nga tig-ula ug dugo ug limbongan ginadumtan ni Jehova,” nag-ingon ang Salmo 5:6. Kini ba mapadapat sa mga antikristo? Oo. Si apostol Juan misulat: “Daghang maglilimbong ang nagapanungha sa kalibotan, mga tawo nga wala magpahayag nga si Jesu-Kristo mianhi sa unod. Kini mao ang maglilimbong ug ang antikristo.” (2 Juan 7) Tungod sa ilang kabakakan ug panglimbong, laglagon sa Labing Gamhanang Diyos ang mga antikristo.

Samtang ang panahon sa pagpahamtang sa maong silot nagkaduol na, kinahanglang dili tugotan sa matuod nga mga Kristohanon ang kontra-Kristohanong panglimbong ug pagpit-os, ilabina gikan sa mga apostata, nga magpahuyang sa ilang pagtuo. Ang pasidaan ni Juan maoy dinalian: “Magbantay sa inyong kaugalingon, nga kamo dili kapildihan sa mga butang nga among gihagoan sa pagpatungha, kondili nga kamo makabaton sa bug-os nga ganti.”​—2 Juan 8.

[Picture Credit Line sa panid 20]

Nero sa mga panid 2 ug 20: Kortesiya sa Visitors of the Ashmolean Museum, Oxford