Ang Hinungdanong Papel sa mga Amahan

“NAGKADAGHAN ang batan-ong kalalakin-an nga buot makabaton ug aktibong papel diha sa pagmatuto sa ilang mga anak. Otsentay-dos porsiyento sa mga lalaki nga nagpangedaron ug 21 hangtod sa 39 ang mipili ug eskedyul sa trabaho nga magtugot kanila sa paggugol ug daghang panahon uban sa ilang mga pamilya,” matod sa mantalaang The Toronto Star sa Canada maylabot sa dili pa dugayng pagtuon sa Harvard University. Sumala sa pagtuon, diin 1,008 ka lalaki ug babaye sa T.B. nga nagpangedaron ug 21 hangtod sa 65-pataas ang gisurbi, 71 porsiyento sa batan-ong mga lalaki miingon nga ilang “isakripisyo ang usa ka tipik sa ilang suweldo aron makabaton ug dugang panahon uban sa ilang mga pamilya.”

Nganong daghang amahan ang buot makabaton ug mas aktibong papel diha sa kinabuhi sa ilang mga anak? Si David Blankenhorn, usa sa mga tigpasiugda sa National Fatherhood Initiative, nga nagpasiugda sa responsable, komitidong pagkaamahan, nag-ingon nga sa 1994 nga surbi sa 1,600 ka lalaki sa T.B., 50 porsiyento ang miingon nga ang ilang mga amahan wala magtagbaw sa ilang emosyonal nga mga panginahanglan panahon sa ilang pagkabata. Daghan sa mga amahan karon dili buot nga makita kining kahimtanga nga masubli.

Ang mga amahan nga aktibong nalangkit sa kinabuhi sa ilang mga anak mahimong usa ka maayong impluwensiya. Nagpunting sa panukiduki nga gipatik sa Department of Health and Human Services sa T.B., ang The Toronto Star miingon nga sa dihang ang mga amahan mokaon uban sa ilang mga anak, maglingawlingaw uban kanila, ug motabang sa ilang homwork, “mas diyutay ang mga suliran sa pamatasan, mas maayo ang pagpakigsandurot ug mas taas ang grado sa eskuylahan taliwala sa mga bata ug mga tin-edyer.”

Ang gihisgotan sa ibabaw nagpasiugda sa kahikayan alang sa pagmatuto sa mga anak nga mapuslanon karong adlawa sama ra nga mapuslanon kini sa panahon nga unang gisulat kini kapin na sa tulo ka libo ka tuig kanhi. Ang Tagmugna sa pamilya espesipikong nagsugo sa mga amahan nga aktibong malangkit sa pagmatuto sa ilang mga anak. (Efeso 3:​14, 15; 6:4) Ang mga amahan gitambagan sa pagsilsil sa gugma alang sa Diyos diha sa kasingkasing sa ilang mga anak ug sa pagsulti kanila bahin sa mga tulumanon ug mga kasugoan sa Diyos. Giingnan sila sa Diyos nga buhaton kini ‘sa maglingkod sila sa ilang balay ug sa maglakaw sila sa dalan ug sa ilang paghigda ug sa ilang pagbangon.’​—Deuteronomio 6:7.

Ang pagmatuto sa mga anak maoy responsabilidad sa amahan ug inahan. Ang Bibliya nagtambag sa mga anak: “Pamatia ang disiplina sa imong amahan, ug ayaw talikdi ang balaod sa imong inahan.” (Proverbio 1:8) Hinungdanon ang papel sa amahan. Naglakip kini sa pagpaluyo ug pagtahod sa inahan ug pagpakig-ambit sa mga buluhaton nga nalangkit sa pagmatuto sa mga anak. Nagkinahanglan usab kini ug paggugol ug panahon sa pagbasa alang sa mga anak ug pagpakigsulti kanila. Magtagbaw kini sa hinungdanong emosyonal nga panginahanglan sa mga anak.

Walay duhaduha, ang Bibliya mao ang labing kasaligang tuboran sa tambag ug maayong mga prinsipyo alang sa usa ka maayong pagkatimbang nga pamilya. Ang amahan nga aktibong nag-atiman sa espirituwal, emosyonal, ug materyal nga mga panginahanglan sa iyang pamilya nagtuman sa iyang hinatag-sa-Diyos nga responsabilidad.