Gikan sa Among mga Magbabasa

Edukasyon Nagsulat ako aron magpasalamat sa seryeng “Edukasyon nga Motultol sa Mas Maayong Kinabuhi.” (Disyembre 22, 2000) Gipakita gayod niini kon sa unsang paagi si Jehova, pinaagi sa iyang organisasyon, naningkamot nga maabot ang tanang matarong ug kasingkasing. Natandog ako sa dihang akong nabasa kon sa unsang paagi ang lokal nga estasyon sa telebisyon ug ang mga mantalaan nagtaho bahin sa pagluwat sa Pagmata! diha sa pinulongang Samoan. Giilustrar niini ang katumanan sa mga pulong ni Jesus sa Buhat 1:8: “Kamo mahimong akong mga saksi . . . hangtod sa kinalay-ang dapit sa yuta.”

J. D., Tinipong Bansa

Miikyas nga mga Amahan Ako maoy 15 anyos ug sa kinasingkasing buot magpasalamat kaninyo tungod sa “Mga Batan-on Nangutana . . .” nga mga artikulong “Nganong Mibiya si Papa Kanamo?” (Nobyembre 22, 2000) ug “Sa Unsang Paagi Makasagubang Ako Karon nga Gibiyaan na Kami ni Papa?” (Disyembre 22, 2000) Nagkadaiya ang akong gibati gikan sa kasuko ngadto sa kaguol ug pagkawalay-paglaom. Gipakita sa mga artikulo nga wala ako mag-inusara niini nga kahimtang ug nga ang akong gibati maoy normal kaayo. Palihog ipadayon ang pagsulat nianang talagsaong mga artikulo.

S. L., Alemanya

Ako maoy 10 anyos, ug akong gibati nga daw akong gihulat kining mga artikuloha sa tibuok kong kinabuhi! Hilabihan ang akong pag-antos sa dihang mibiya kanamo si Papa. Ang mga artikulo miabot gayod sa hustong panahon.

M. D., Alemanya

Sugilanon sa Kinabuhi Salamat sa artikulong “Gihatagag Paglaom nga Nagpalig-on Kanako.” (Disyembre 22, 2000) Naghambin ako ug pagdumot sa akong amahan tungod kay sukad sa akong pagkabata, nakita ko na siya nga nag-abuso sa akong inahan. Nahibalo ako nga ang pagdumot maoy sayop, apan ang mga pagbati lisod kaayong makontrolar. Apan unya akong nabasa kon sa unsang paagi gipaningkamotan ni Tatjana Vileyska ang pagbuntog sa pagdumot alang sa tawo nga nagpatay sa iyang inahan. Buot kong sundogon siya.

A. K., Hapon

Nakahilak ako sa pagbasa sa masakit nga kasinatian ni Tatjana sa pagkamatay sa iyang mga ginikanan. Ang maong personal nga mga kasinatian maoy kanunayng nagpahinumdom kanako nga daghang tawo sa tibuok kalibotan ang nakaantos sa grabeng mga kalisdanan nga malamposon ug nakakaplag ug kalipay bisan pa sa ilang personal nga mga pakigbisog.

J. R., Tinipong Bansa

Mao pay akong pagkahuman ug basa sa makaiikag nga sugilanon ni Tatjana Vileyska. Ang iyang sugilanon maoy usa nga dili ko daling malimtan. Ang pagsagubang sa iyang naagoman una pa makakat-on sa kamatuoran gikan sa Bibliya ug bisan pa niana nakalahutay uban ang malipayong panglantaw maoy tinuod nga espirituwal nga milagro.

S. S., Tinipong Bansa

Pagluwas sa mga Kaminyoon Kinasingkasing kong gipasalamatan kamo sa serye diha sa Pagmata! sa Enero 8, 2001, “Maluwas ba Nato ang Atong Kaminyoon?” Usa ka tuig kanhi ako ug ang akong asawa dihay mga suliran sa kaminyoon. Pareho kaming gimatuto diha sa mga panimalay diin kanunayng walay pugong ang pagkasuko. Busa molitok kamig mga pulong nga makapasakit gayod sa usag usa, ug ang mga kahimtang dili na makontrolar. Apan misugod kami sa pagpadapat sa mga prinsipyo sa Bibliya, ug kami malipayon na kaayo karon.

R. O., Tinipong Bansa

Ingong ansiyano sa kongregasyon, nakaplagan ko nga ang usa sa labing malisod nga mga kahimtang nga akong giatubang mao ang pagpaningkamot sa pagtabang niadtong kinsa mibati nga sila natanggong diha sa usa ka walay-gugmang kaminyoon. Aron makaseguro, kita adunay dagayang Kasulatanhong tambag pinaagi sa mga publikasyon latas sa katuigan. Apan, pinaagi sa pagtan-aw sa hapin sa magasin, akong nakita nga kini gayod ang among gikinahanglan sa pagtaganag mas direktang tabang nianang mga tawhana. Wala ako mahigawad sa mga artikulo!

L. R., Tinipong Bansa