Mga Batan-on Nangutana . . .

Unsaon Nako Paghimo nga Mas Makalingaw ang Pagbasa sa Bibliya?

“Usahay ang Bibliya lisod sabton, ug kana makapaluya sa buot.”​—Annalieza, 17 anyos.

“Ang Bibliya makalaay para nako.”​—Kimberly, 22 anyos.

DAGHANG tawo ang dili ganahang mobasa. Busa ang usa ka libro nga ingon ka baga sa Bibliya morag dugay kaayong mahuman​—bisan alang sa mga himasa. “Alang kanako, ang Bibliya maoy usa ka bagang libro nga naundan ug daghang dili-pamilyar nga mga pulong nga lisod sabton,” matod ni Tammy, nga 17 anyos. “Ang pagbasa sa Bibliya nagkinahanglan ug dakong konsentrasyon ug paglahutay.”

Dugang pa, ang homwork, mga buluhaton sa panimalay, ug kalingawan tingali mohurot sa dakong bahin sa imong panahon ug kusog. Kini usab makapalisod sa pagsentro sa pagtagad ug pagkalipay sa pagbasa sa Bibliya. Si Alicia, nga usa sa mga Saksi ni Jehova, naggahin usab ug panahon sa pagpangandam ug pagtambong sa Kristohanong mga tigom ug sa pagpaambit sa iyang mga tinuohan ngadto sa uban. Siya miadmitir: “Ang pagbasa sa Bibliya mahimong malisod tungod kay morag daghan kaayong butang ang angayng buhaton.”

Apan, si Alicia, Tammy, ug daghan pang ubang mga batan-on nakasagubang sa mga kababagan. Karon sila regular nga nagbasa sa Bibliya ug nalipay niini. Mahimo mo usab kini! Tagda ang tulo ka butang nga imong mahimo aron mas makalingaw ang pagbasa sa Bibliya.

Paggahin ug Panahon Alang sa Pagbasa sa Bibliya

“Ako nagtuong ang mga batan-on nakaingon nga makalaay ang pagbasa sa Bibliya tungod kay talagsa ra nila kining ginahimo,” matod ni Kelly, nga 18 anyos. Maingon nga ikaw malingaw sa usa ka esport o dula nga kanunay nimong ginadula, ikaw malingaw sa pagbasa sa Bibliya samtang kini regular nimong ginahimo.

Apan komosta kon gamay ra kaayo ang imong libreng panahon? Si apostol Pablo nagtambag: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan.” (Efeso 5:​15, 16) Ikaw ‘makapalit sa panahon’ pinaagi sa pagkunhod sa panahong gigugol sa dili hinungdanong mga kalihokan sama sa pagtan-awg TV. Ang termino nga gigamit ni Pablo alang sa “panahon” mahimong magkahulogan ug panahon nga gipili alang sa espesipikong katuyoan. Unsa ang imong gipiling panahon sa pagbasa sa Bibliya?

Daghan ang mobasa sa Bibliya mabuntag, human sa pagkonsiderar sa Kasulatanhong teksto ug mga komento nga makaplagan diha sa pulyeto nga Pagsusi sa Kasulatan sa Adlaw-Adlaw. * Gipili  sa uban nga mobasa sa dili pa matulog magabii. Pagpili ug realistikanhong oras nga epektibo kanimo, ug magpailin-ilin sumala sa panginahanglan. Si Alicia nag-ingon: “Ang pagkamapailin-ilinon mao gayod ang yawi aron masunod ang akong regular nga eskedyul sa pagbasa.”

Ang ubang Kristohanong mga batan-on nag-eskedyul ug 10 ngadto sa 15 minutos kada adlaw sa pagbasa sa Bibliya. Pinaagi sa paghimo niini, ilang nahurot ug basa ang tibuok Bibliya sa usa o duha ka tuig! Bisan pag dili nimo mahimo kana, himoang tumong ang pagbasa ug usa ka bahin sa Bibliya kada adlaw. Pinaagi sa hugot nga pagsunod sa imong gipili nga panahon sa pagbasa sa Bibliya, ang imong gugma alang sa Pulong sa Diyos motubo.​—Salmo 119:97; 1 Pedro 2:2.

Pag-ampo Alang sa Kaalam

Giadmitir bisan sa regular nga mga magbabasa sa Bibliya nga dunay mga bahin sa Pulong sa Diyos nga lisod sabton. Gusto sa Awtor sa Bibliya, si Jehova nga Diyos, nga imong masabtan ang iyang Pulong. Ang basahon sa Mga Buhat nag-asoy bahin sa usa ka Etiopianong magpapanaw nga wala kaayo makasabot sa tagna sa Isaias kapitulo 53. Ang lalaki andam nga mangayog tabang, ug gipadala sa manulonda ni Jehova ang misyonaryong si Felipe aron ipatin-aw ang tagna kaniya.​—Buhat 8:26-39.

Busa, ang epektibong pagbasa sa Bibliya dili gayod magsugod pinaagig pagbasa, kondili pinaagig pag-ampo. Sa dili pa nila buksan ang ilang Bibliya, gibatasan sa uban ang pag-ampo kang Jehova alang sa kaalam aron masabtan ug matisok sa kasingkasing ang mga pagtulon-an nga ilang mabasa. (2 Timoteo 2:7; Santiago 1:5) Ang espiritu sa Diyos magpahinumdom pa gani kanimo sa mga bersikulo sa Bibliya nga magtabang kanimo sa pagtubag sa mga pangutana o sa pagsagubang sa mga pagsulay.

Ang usa ka Kristohanong lalaki nahinumdom: “Sa 12-anyos ako, gibiyaan sa akong amahan ang among pamilya. Usa ka gabii niana nag-ampo ako diha sa higdaanan, nga nangaliyupo kang Jehova sa pagpabalik sa akong amahan. Dayon akong gikuha ang akong Bibliya ug gibasa ang Salmo 10:14: “Kanimo [Jehova] modangop ang alaot, ang batang ilo-sa-amahan. Ikaw nahimong iyang magtatabang.” Mihunong ako sa makadiyot. Akong gibati nga si Jehova nakig-estorya kanako ug nagpahibalo kanako nga siya ang akong magtatabang; siya ang akong Amahan. Duna pa ba koy mabatonan nga mas maayong amahan kay kaniya?”

Mahimo ba nimong batasanon ang pag-ampo matag higayon nga ikaw molingkod sa pagbasa sa Bibliya? Si Adrian misugyot: “Pag-ampo sa dili pa mobasa​—ug human usab mobasa​—aron mahimo kining panagkabildohay uban kang Jehova.” Ang kinasingkasing nga pag-ampo magpalalom sa imong determinasyon nga masunod ang imong eskedyul sa pagbasa sa Bibliya ug magpalig-on sa imong relasyon sa Diyos.​—Santiago 4:8.

Himoa Kining Buhi Diha sa Imong Hunahuna

Si Kimberly, nga gikutlo sa sinugdanan, laayang mobasa sa Bibliya. Tinuod, ang Bibliya karaan na kaayo nga libro​—gisulat dugay na sa wala pa maimbento ang kompiyuter, telebisyon, o ayroplano​—ug ang mga karakter sa Bibliya namatay libolibo ka tuig na kanhi. Bisan pa niana, si apostol Pablo misulat: “Ang pulong sa Diyos buhi ug gamhanan.” (Hebreohanon 4:12) Sa  unsang paagi nga gamhanan ang maong karaan nga libro?

Sa mga adlaw sa tigkopya nga si Esdras, libolibo ka lalaki, babaye, ug “tanan nga may igong panabot sa pagpamati” nagtigom sa Jerusalem aron maminaw sa pagbasa sa Balaod ni Moises. Nianang panahona ang Balaod kapin na sa 1,000 ka tuig ang edad! Apan, si Esdras ug ang iyang mga kaabag “nagpadayon pagbasa sa makusog diha sa basahon, diha sa balaod sa matuod nga Diyos, nga gipatin-aw kini, ug gihatag ang kahulogan niini; ug sila nagpadayon pagpasabot sa gibasa.” Sa dihang gipatin-aw niining maong mga lalaki ang Kasulatan ug gihimong buhi ang pagbasa, unsay miresulta? “Ang tibuok katawhan nanglakaw aron sa pagkaon ug sa pag-inom ug sa pagpadala ug mga bahin ug sa pagmaya sa hilabihan, kay ilang nasabtan ang mga pulong nga gipahibalo kanila.”​—Nehemias 8:1-12.

Sa unsang paagi imong ‘mahatagag kahulogan’ ang imong pagbasa sa Bibliya? Si Cathy, kinsa nag-isip sa pagbasa ingong sagubangonon, mobasag kusog aron masentro ang iyang pagtagad. Gisulayan ni Nicki nga ibutang ang iyang kaugalingon diha sa esena sa asoy. “Akong handurawon kon unsay akong bation sa maong kahimtang,” matod pa niya. “Ang akong paboritong estorya mao gayod ang asoy bahin kang Ruth ug Naomi. Balikbalikon nako kini sa pagbasa. Sa dihang mibalhin ko ngadto sa laing siyudad, nahupayan ako niining maong estorya tungod kay akong gihanduraw kon unsay gibati ni Ruth nga mibalhin sa laing dapit ug walay nailhang tawo. Akong nasabtan kon sa unsang paagi siya misalig kang Jehova, ug nakatabang gayod kini kanako nga buhaton usab kana.”​—Ruth, mga kapitulo 1-4.

Aron ang Bibliya mahimong “gamhanan,” gikinahanglan ang pagpamalandong. Sa matag higayon nga ikaw mobasa, gahinig panahon ang pagpamalandong sa mga kasulatan nga imong gibasa ug ang paghunahuna kon sa unsang paagi imong magamit ang imong nakat-onan. Tingali buot nimong gamiton ang mga tabang sa pagtuon sa Bibliya nga gipatik sa mga Saksi ni Jehova aron mapalambo ang imong pagbasa. *

Magmalahutayon!

Dili sayon ang pagsunod ug eskedyul sa pagbasa sa Bibliya. Bisan ang kinamaayohang programa sa pagbasa sa Bibliya tingali kinahanglang usbon usahay. Sa unsang paagi ikaw makalahutay sa imong tumong sa pagbasa sa Bibliya adlaw-adlaw?

Makatabang ang imong mga higala ug pamilya. Ang 15-anyos nga si Amber nag-ingon: “Usa ra kamig kuwarto sa akong igsoong babaye. May mga gabiing kapoyon ko kaayo nga gusto na lang kong matulog, apan pahinumdoman ko sa akong igsoon nga himoon ang akong pagbasa. Busa dili gyod ko makalimot!” Kon ang usa ka kasulatan o teksto makapaikag kanimo, hisgoti kini sa uban. Makapausbaw kini sa imong apresasyon alang sa Pulong sa Diyos ug basin makapukaw pa sa ilang interes sa pagbasa sa Bibliya. (Roma 1:​11, 12) Kon imong malaktawan ug usa ka adlaw o mas dugay pa ang imong pagbasa sa Bibliya, ayawg undang! Ipadayon ang pagbasa kon asa ka mihunong, ug magmadeterminado pa gayod nga padayong sundon ang imong eskedyul.

Ayaw gayod kalimti ang dagayang mga kaayohan nga moresulta tungod sa adlaw-adlaw nga pagbasa sa Bibliya. Pinaagi sa pagpamati kang Jehova pinaagi sa iyang Pulong, ikaw makatagamtam ug suod nga relasyon uban kaniya. Imong masabtan ang iyang hunahuna ug pagbati. (Proverbio 2:1-5) Kining bililhong mga kamatuoran gikan sa atong langitnong Amahan mapamatud-ang usa ka panalipod. “Unsaon paghinlo sa usa ka batan-ong lalaki sa iyang alagianan?” nangutana ang salmista. “Pinaagi sa pagpadayon sa pagbantay subay sa imong pulong.” (Salmo 119:9) Busa sugdi​—ug padayong sunda​—ang usa ka rutina sa pagbasa sa Bibliya. Imong makaplagan nga kini labi pang makalingaw kay sa imong gituohan!

[Mga footnote]

[Mga hulagway sa panid 24]

Ang pag-ampo ug pagpanukiduki makapauswag sa imong pagbasa sa Bibliya ug makatabang kanimo sa pagsabot sa kahulogan sa Kasulatan

[Hulagway sa panid 25]

Ang pagbutang sa imong kaugalingon diha sa esena sa asoy maghimo sa Kasulatan nga buhi