Gikan sa Among mga Magbabasa

Mga Kaminyoon nga Walay Gugma Wala nay direksiyon ang akong kaminyoon. Ang akong bana ug ako morag wala na maghigugmaay kondili giagwanta na lang namo ang usag usa. Usahay maghunahuna ko nga makigdiborsiyo. Apan tungod sa seryeng “Maluwas ba Nato ang Atong Kaminyoon?” (Enero 8, 2001), ang among gugma nabuhi pag-usab.

E. R., Espanya

Ako usa ka Kristohanong asawa, apan niining miaging tuig masulub-on kaayo ang akong kaminyoon. Tungod kay ang akong bana ug ako nakapasakit pag-ayo sa usag usa, morag imposible nga mapasig-uli pa ang among relasyon. Apan sa dihang akong gibasa kining mga artikuloha, morag nagsulti si Jehova nga, ‘Ayaw paglunga!’ Napalihok ako mismo sa paghimog positibong mga lakang aron mabuhi pag-usab ang mainit nga gugma nga among gibati sa usag usa kaniadto. Nagsugod na ako pagkamatikod ug sanong gikan kaniya. Akong balikbalikon pagbasa kining mga artikuloha.

N. H., Hapon

Nabawtismohan ako di pa dugay ug nakaagom ug pagsupak gikan sa akong dili-magtutuong asawa. Ang inyong mga artikulo nakatabang kanako nga makita kon sa unsang paagi magmalamposon ang akong kaminyoon. Miabot kini sa tukmang panahon.

W. S., Australia

Sanglit malipayon ang akong kaminyoon, akong gisugdan pagbasa kining mga artikuloha nga naghunahunang mapuslanon kini sa pagtabang sa uban. Apan sa sinugdanan pa lang, ang serye dunay praktikal nga mga punto nga makapalig-on sa ako mismong bugkos sa kaminyoon.

M. D., Italya

Gisultihan ako sa usa ka Kristohanong igsoong babaye sa akong kongregasyon nga wala sila magkasinabtanay sa iyang dili-magtutuong bana ug nagbulag sila. Wala madugay sa ulahi iya kong giingnan nga miarang-arang na ang kahimtang. Mahinamon kaayo niyang gibasa kining mga artikuloha, ug nakatabang kinig dako kaniya sa pagsulbad sa problema. Siya nag-ingon nga ang mga komento bahin sa komunikasyon ilabinang mapuslanon. Siya ug ang iyang bana nag-uli na.

N. S., Canada

“Ventriloquism” Nalibog ako sa artikulong “Kinsay Nagasulti?” (Enero 8, 2001) Dili ba mao kini ang paagi nga gigamit ni Satanas sa paglimbong kang Eva? Ang panglimbong ug panikas dili angay nga mahimong bahin sa kinabuhi sa usa ka Kristohanon.

B. H., Tinipong Bansa

Kon unsa man ugaling ang paagi nga gigamit ni Satanas sa paglimbong kang Eva, dili kadto tinuod nga matang sa ventriloquism, tungod kay ang maong abilidad naglangkit ug espesipikong mga teknik sa pagginhawa ug pagsulti ug si Satanas maoy usa ka espirituhanong linalang. Dili supak sa Kasulatan ang paggamit ug ventriloquism ingong usa ka matang sa kalingawan. Siyempre, sayop ang paggamit sa maong abilidad sa tinuyong paglimbong sa usa ka tawo o sa pagpasiugda ug espiritistikong mga buhat, sama sa gihimo sa pipila sa kapanahonan sa Bibliya. (Isaias 8:19)​—ED.

Ako usab nalingaw sa paghimo sa arte sa ventriloquism ug nagpasundayag niini diha sa daghang Kristohanong mga pagtipontipon. Sumala sa gihisgotan sa artikulo, dili kaayo maila sa dalunggan sa tawo ang gigikanan sa tingog. Apan, makapahibulong nga dili nimo mailad ang usa ka mananap niining bahina. Kon akong gamiton ang akong monyeka sa pagsulti ngadto sa akong iro, dili siya motan-aw sa monyeka kondili kanako. Si Jehova naghatag sa mga mananap ug hait kaayong pandungog.

L. R., Tinipong Bansa

Walay-Buhok nga Iro Duna koy batasan​—kanunay nakong unahon pagbasa ang mga artikulo nga dili kaayo makapainteres kanako. Tungod kay dili gyod ko ganahan ug mga iro, ang unang artikulo nga akong gibasa sa Enero 8 nga gula mao ang “Nakakita Ka na bag Xoloitzcuintli?” Pagkahuman nakog basa sa artikulo, halos gusto nakong makaangkon ug usa niadtong mga iroa! Siyempre, nabalanse ra pod nako ang akong hunahuna. Buweno, makaingon ko nga sa 40 ka tuig nga pagbasa sa inyong mga magasin, wala gayod ako mahigawad. Kasagarang malingaw ko sa mismong mga artikulo nga sa sinugdanan akong gihunahuna nga dili nako magustohan.

D. W., Tinipong Bansa