Gikan sa Among mga Magbabasa

Kahupayan Alang sa Masakiton Salamat sa seryeng “Kahupayan Alang sa Masakiton.” (Enero 22, 2001) Upat ka tuig ang milabay ako nalangkit sa usa ka aksidente. Gibati ko sa daghang higayon nga mas maayo pa unta kon namatay na ako. Ingong sangpotanan ako malimtanon ug mabalak-on na kaayo. Sa dihang nabasa ko kining seryeha, ako nadasig.

T. M., Hapon

Sukad sa edad nga 15, kinahanglan kong sagubangon ang masakit nga rheumatoid arthritis. Ang impormasyon nakatabang kanako sa pagkaamgo nga kinahanglan kong mokat-on sa pagsalig pa kang Jehova, kinsa maoy “usa ka salipdanan sa adlaw sa kasakit.”​—Nahum. 1:7.

Y.F.R., Colombia

Usa ako ka bug-os-panahong ebanghelisador. Wala magdugay human mobalhin aron moalagad sa bag-ong dapit, nahibaloan ko nga ako adunay diabetes. Katingalahan ang inyong paghubit bahin sa lilo sa mga emosyon nga bation sa usa nga dunay laygay nga sakit! Ang mga artikulo mitabang nako sa pagkonsiderar pag-usab sa akong kahimtang diha sa mas timbang nga paagi ug sa paghimog mga kausaban sa akong kinabuhi.

L. A., Italya

Dili kami masakiton, apan ang mga prinsipyo sa artikulo nakatabang kanamo ug dako sa among problema nga ginaatubang. Ingon sa subsob kaayong nahitabo, ang magasin maoy tubag sa espesipikong pag-ampo.

R. P. ug L. P., Sri Lanka

Pipila ka semana ang milabay, gisultihan ako nga ako adunay kanseron nga tumor sa akong atay. Mahanduraw nimo ang epekto niini diha kanako, tungod kay himsog ako hangtod nianang tungora. Karon akong gipunit ang Enero 22 nga isyu ug nalingaw kaayo sa mga artikulo. Gihubit niini ang tanan kong mga pagduhaduha, mga hunahuna, ug mga emosyon apan, sa samang panahon, nagpasiugdag positibong panglantaw.

J. E., Espanya

Tinuod-Kinabuhing Kasinatian Ako nagasulat bahin sa makapatandog nga eksperyensiya ni Bill ug Rose Meiners, “Pagsumpo sa Kakulian sa Panglawas Pinaagi sa Paghimog mga Tumong.” (Enero 22, 2001) Makapadasig ang pagkahibalo nga sila nakasagubang sulod sa kapin sa tunga sa siglo. Kini nga mga sugilanon sa kinabuhi nakatandog sa kinailadmang mga pagbati sa kasingkasing. Buot kong mahibalo si Bill ug Rose nga ako espesipikong nag-ampo alang kanila.

V. G., Italya

Alang kanamong himsog, kini nga sugilanon sa usa ka tawo nga nakigbisog sa iyang sakit sulod sa kapin sa 50 ka tuig maoy hilabihan ka makapadasig. Mitabang kini kanako sa pagkasabot nga ingong himsog nga babaye, kinahanglan kong pabilhan ug gamiton sa bug-os ang akong kinabuhi.

P. V., Republika sa Czech

Aduna koy inahan nga nagmasakiton sulod na sa halos 20 ka tuig. Sa pagkakaron siya nawad-ag paglaom ug nangutana kon nganong siya dili makabaton ug bisan diyutay na lamang nga kahupayan. Akong gibasa kining artikuloha ngadto kaniya, apan nakabaton usab ako ug kaayohan gikan niana. Karon akong nasabtan kon nganong siya halos kanunayng nagmagul-anon.

G.O.A., Nigeria

Si Bill ug Rose, maingon man ang daghan pang uban kinsa kinahanglang magkinabuhi uban ang grabeng sakit, maoy isog kaayo! Sa akong hunahuna kami nga walay grabeng sakit nga sagubangon makakat-on sa ilang panig-ingnan. Bill ug Rose, padayong magmalig-on! Kamo maoy panig-ingnan alang kanamo!

I. S., Alemanya

Pagpakigdeyt sa Tin-edyer Ako maoy 15 anyos, ug ako nalingaw sa artikulong “Mga Batan-on Nangutana . . . Komosta Kon ang Akong mga Ginikanan Maghunahuna nga Bata pa Ako Kaayo Aron Makigdeyt?” (Enero 22, 2001) Ang mga bata sa eskuylahan nangutana nako kon ako bayot ba tungod kay ako dili makigdeyt. Sagad kong gisultihan sila nga dili ako tugotan sa akong mga ginikanan nga makigdeyt, apan buot ko gayod nga mahatagan sila ug mas maayong tubag. Kay nabasa kining artikuloha, karon nahibalo na ako kon unsaon pagtubag ang ilang mga pangutana. Daghan kaayong salamat sa paghunahuna bahin kanamong mga tin-edyer.

C. G., Tinipong Bansa