Ang Kahoy nga Sayong Momata

SA ULAHING bahin sa Enero o sa sayong bahin sa Pebrero, kadaghanan sa hinagdan nga mga bakilid sa Israel kalit nga mausab. Kay mahigmata gikan sa pagkatulog niini sa tingtugnaw, ang mga kahoyng almendras kalit nga mamulak. Sanglit kini maoy usa sa kinaunahang mga kahoy nga mamulak, ang almendras sagad maoy usa ka talagsaong talan-awon sa kabanikanhan tungod kay wala pay laing kahoy nga namulak. Ang puti ug pughaw nga pagkapula nga mga bulak niini nagdayandayan sa tugnawng kabanikanhan, nga nagpahinumdom kanato sa mga pulong ni Solomon sa Ecclesiastes 12:5. Didto iyang gitandi ang puting buhok sa pagkatigulang ngadto sa ‘kahoyng almendras nga namulak.’

Tungod sa sayong pagpamulak sa almendras, ang Hebreohanong pulong alang sa almendras sa pagkahaom nagkahulogan sa literal nga “nahigmata nga usa.” Busa gigamit kini sa Bibliya diha sa daghang makapahinganghang mga ilustrasyon. Pananglitan, nakita sa manalagnang si Jeremias diha sa panan-awon ang usa ka salingsing, o sanga, sa kahoyng almendras. Unsay gihawasan niini? “Ako nagpabiling nagmata mahitungod sa akong pulong aron tumanon kini,” si Jehova nagsulti kaniya. (Jeremias 1:​11, 12) Siyempre, si Jehova dili gayod kapoyon, ni matulog siya. Apan ang iyang mga pulong nagpasiugda sa iyang tinguha sa pagtapos sa iyang buluhaton.​—Isaias 40:28.

Kasiglohan una pa sa adlaw ni Jeremias, ang namulak nga sungkod nga almendras gigamit sa pag-ila sa usa nga gitudlo ni Jehova ingong hataas nga saserdote. Ang sungkod sa matag usa sa 12 ka tribo sa Israel gibutang sa atubangan ni Jehova diha sa tolda nga tagboanan. Pagkasunod buntag ang sungkod nga almendras ni Aaron dili lang kay milagrosong namulak kondili namunga pa ug hinog nga mga almendras! Kining sungkod nga almendras gitipigan diha sa arka sa pakigtugon sulod sa makadiyot nga panahon ingong pasidaan sa nasod nga dili gayod sila magbagulbol pag-usab batok sa tinudlong mga hawas ni Jehova.​—Numeros 16:​1-3, 10; 17:​1-10; Hebreohanon 9:4.

Tinguha ni Jehova nga ang mga larawan sa nindot nga mga bulak sa almendras magdayandayan sa pitog-sanga nga bulawang tangkawan nga nag-iwag sa Balaang Dapit sa tabernakulo. Sumala sa paghubit nga girekord ni Moises, “tulo ka kopa nga giporma sama sa mga bulak sa almendras ang diha sa usa ka hugpong sa mga sanga, nga nagsal-angsal-ang ang mga biyoos ug mga bulak; ug tulo ka kopa nga giporma sama sa mga bulak sa almendras ang diha sa pikas hugpong sa mga sanga, nga nagsal-angsal-ang ang mga biyoos ug mga bulak. Ingon niana ang unom ka sanga nga nagtuybo sa tangkawan. Ug sa tangkawan dihay upat ka kopa nga giporma sama sa mga bulak sa almendras, nga ang mga biyoos niini ug mga bulak niini nagsal-angsal-ang.”​—Exodo 37:​19, 20.

Bisag diyutay lang ang mga pagkutlo sa Bibliya sa kahoyng almendras, kini nagpunting gayod sa atong pagtagad sa maanindot nga puting mga bulak niini ug sa pagkasayong mahigmata niini. Labaw sa tanan, kining madanihong kahoy nagpahinumdom kanato nga si Jehova dili mopahulay hangtod nga iyang mapalampos ang iyang katuyoan.​—Isaias 55:11.