Ang Hunahuna sa Bibliya

Unsa ka Matugoton ang Diyos?

“ANG DIYOS, BISAN PAG MAY TINGUHA NGA IPASUNDAYAG ANG IYANG KAPUNGOT UG IPAILA ANG IYANG GAHOM, NAGTUGOT UBAN ANG DAGAYANG HATAAS-NGA-PAILOB SA MGA SUDLANAN SA KAPUNGOT NGA GIHIMONG ANGAY SA KALAGLAGAN.”—ROMA 9:22.

LATAS sa kasaysayan gitugotan sa Diyos ang daghang kangil-ad ug tumang pagkadaotan. Kapin sa 3,000 ka tuig kanhi, si Job mimulo: “Ngano man nga ang mga daotan nagpadayong buhi, natigulang, milabaw usab kon bahin sa bahandi? Ang ilang mga kaliwat lig-ong natukod uban kanila diha sa ilang panan-aw, ug ang ilang mga anak atubangan sa ilang mga mata. Ang ilang mga balay maoy pakigdait, nahigawas sa kalisang, ug ang bunal sa Diyos wala ipahamtang kanila.” (Job 21:7-9) Ang ubang mahigugmaon sa hustisya, sama ni manalagnang Jeremias, nagpadayag usab ug kabalaka nga ang Diyos daw matugoton sa daotang mga tawo.​—Jeremias 12:​1, 2.

Unsay imong hunahuna? Nalibog ka ba sa pagtugot sa Diyos sa pagkadaotan? Ikaw ba naghunahuna usahay nga ang Diyos angay untang molihok dayon ug molaglag dihadiha sa tanang daotan nga mga tawo? Tagda ang gisulti sa Bibliya bahin sa kinutbanan sa pagkamatugoton sa Diyos ug sa mga katarongan niini.

Nganong Matugoton ang Diyos?

Una, kita kinahanglang mangutana: Ngano man nga ang Diyos, kinsa nagbaton sa labing hataas nga mga sukdanan sa pagkamatarong, motugot sa pagkadaotan? (Deuteronomio 32:4; Habacuc 1:13) Nagpasabot ba kini nga mokonsentir siya sa daotan? Dili gayod! Tagda ang mosunod nga ilustrasyon: Handurawa nga dunay usa ka siruhano nga naglapas sa pasukaranang mga prinsipyo sa kahinlo ug nagpaantos usab sa iyang mga pasyente sa tumang kasakit tungod sa iyang paagi sa pagtambal. Kon nagtrabaho siya sa usa ka ospital, dili ba papahawaon siya dayon? Apan adunay pipila ka sirkumstansiya diin mahimong gikinahanglan ang talagsaong pagkamatugoton. Sa grabeng kahimtang sa emerhensiya, tingali diha sa natad-panggubatan, pananglitan, dili ba gikinahanglang tugotan ang mga siruhano nga magtrabaho diha sa dili-kombenyente ug peligrosong mga kahimtang, tingali naggamit pa gani sa mga kasangkapan ug mga galamiton sa pag-opera nga isipong dili maayo diha sa ordinaryong mga kahimtang?

Sa samang paagi, mapailobong gitugotan sa Diyos karon ang daghang butang nga dili gayod dalawaton kaniya. Bisan tuod nagdumot siya sa pagkadaotan, siya temporaryong nagtugot niini sa pagpadayon. Dunay maayong mga rason sa iyang pagkamatugoton. Ang usa ka katarongan mao nga naghatag kini ug panahon nga mahusay sa permanenteng paagi ang hinungdanong mga isyu nga gipatungha sa pagrebelde ni Satanas sa tanaman sa Eden. Kini maoy mga isyu nga nalangkit pag-ayo sa pagkahusto ug pagkamakataronganon sa paagi sa pagmando sa Diyos. Dugang pa, ang iyang mapailobong pag-agwanta sa sayop nga mga buhat naghatag ug panahon ug kahigayonan niadtong nalangkit sa pagkadaotan nga magbag-o.

Usa ka Maluluy-on, Mapailobon nga Diyos

Ang atong unang mga ginikanan, si Adan ug Eva, miduyog kang Satanas sa pagrebelde batok sa Diyos. May katungod unta ang Diyos sa paglaglag kanila dihadiha. Hinunoa, iyang gipasundayag nga siya maluluy-on ug mapailobon, nga mahigugmaong nagtugot kanila nga makabaton ug mga anak. Apan kining maong mga anak, ug ang tibuok nga tawhanong pamilya nga gikan kanila,  nahimugso diha sa makasasala nga kahimtang.​—Roma 5:12; 8:20-22.

Katuyoan sa Diyos nga luwason ang tawo gikan sa iyang alaot nga kahimtang. (Genesis 3:15) Apan, sa kasamtangan, tungod kay nasabtan niya kon sa unsang paagi ang pagkadili-hingpit nga napanunod gikan kang Adan nag-apektar kanato, siya nagpakita ug hilabihang pailob ug kaluoy. (Salmo 51:5; 103:13) Siya ‘dagaya sa mahigugmaong-kalulot’ ug andam ug buot nga “magpasaylo sa madagayaon gayod.”​—Salmo 86:​5, 15; Isaias 55:​6, 7.

Kinutbanan sa Pagkamatugoton sa Diyos

Hinunoa, dili mahigugmaon ug dili makataronganon nga tugotan sa Diyos ang mga buhat nga daotan nga magpadayon sa walay kataposan. Walay mahigugmaong amahan nga motugot nga ang pagkadaotan himoon hangtod sa hangtod sa usa sa iyang mga anak kinsa tinuyong nagpadayon sa pagpahinabog grabeng kasakit sa ubang mga membro sa pamilya. Busa, ang pagkamapailobon sa Diyos sa pagtugot sa sala kanunay gayod nga timbangan sa ubang mga hiyas sama sa gugma, kaalam, ug hustisya. (Exodo 34:​6, 7) Sa dihang matuman na ang katuyoan sa iyang pagpasundayag ug hataas nga pailob, ang iyang pagtugot sa pagkadaotan matapos na.​—Roma 9:22.

Tin-aw kining gipakita ni apostol Pablo. “Sa miaging mga kaliwatan,” matod niya sa usa ka higayon, “gitugotan [sa Diyos] ang tanang kanasoran nga molakaw sa ilang mga dalan.” (Buhat 14:16) Sa laing higayon si Pablo misulti kon sa unsang paagi “gipalabay sa Diyos ang mga panahon sa maong pagkawalay-alamag” sa bahin sa mga tawo nga misupak sa iyang mga balaod ug mga prinsipyo. “Karon,” si Pablo mipadayon, “[ang Diyos] nagsugo sa katawhan nga silang tanan sa bisan diin angayng managhinulsol.” Ngano? “Tungod kay siya nakatakda na ug adlaw aron iyang pagahukman ang gipuy-ang yuta subay sa pagkamatarong.”​—Buhat 17:​30, 31.

Pagbaton ug Kaayohan Karon Gikan sa Pagkamatugoton sa Diyos

Nan, dayag lang nga walay usa nga angayng magtuo nga iyang mabalewala ang mga balaod sa Diyos ug dayon basta na lang mangayog pasaylo sa Diyos sa dihang buot niyang likayan ang mga sangpotanan sa iyang mga lihok. (Josue 24:19) Daghan didto sa karaang Israel ang nagtuo nga mahimo nila kana. Wala sila mag-usab. Ilang gihimong kawang ang katuyoan sa pagkamatugoton ug pailob sa Diyos. Wala tugoti sa Diyos nga magpadayon hangtod sa hangtod ang ilang pagkadaotan.​—Isaias 1:16-20.

Gipakita sa Bibliya nga aron malikayan ang kataposang paghukom sa Diyos, ang usa ka tawo kinahanglang ‘maghinulsol’​—sa ato pa, ilhon sa mabasolong paagi ang iyang dili-hingpit, makasasala nga kahimtang atubangan sa Diyos ug dayon tiunay nga talikdan ang daotan. (Buhat 3:19-21) Unya, pinasukad sa halad-lukat ni Kristo, si Jehova nga Diyos magapasaylo. (Buhat 2:38; Efeso 1:​6, 7) Sa iyang gitakdang panahon, pagawagtangon sa Diyos ang tanang makapaguol nga mga epekto sa sala ni Adan. Aduna unyay “usa ka bag-ong langit ug usa ka bag-ong yuta” diin dili na niya tugotan “ang presensiya . . . sa mga butang nga nagatuaw aron laglagon.” (Pinadayag 21:1-5; Roma 9:​22, Phillips) Pagkamaayong resulta tungod sa talagsaon, apan may kinutbanan, nga pagkamatugoton sa Diyos!

[Hulagway sa panid 23]

Ang Diyos nagtugot kang Adan ug Eva sa pagbaton ug mga anak