Gikan sa Among mga Magbabasa
Gikan sa Among mga Magbabasa
Paspas nga Paso Ang seryeng “Pagsagubang sa Paspas nga Paso Karon” (Pebrero 8, 2001) maoy mahitungod sa lintunganayng hinungdan sa mga suliran sa atong modernong katilingban. Ang pangutana, “Ginauna mo ba ang mga butang o ang mga tawo?” nakadani sa akong pagtagad. Palihog ipadayon ang pagpatik nianang maayong mga artikulo alang kanamo!
Y. K., Hapon
Ang mga artikulo nakatabang kanako sa pagtino sa mga prioridad ug pagtulotimbang sa akong mga kalihokan. Nga wala makaamgo niana, ako nalit-agan sa paagi sa kinabuhi nga misangpot alang kanako sa kanunayng kakapoy, kabalisa, ug mental nga kahago. Karon ginausab ko ang akong mga batasan ug ginauna ang mga butang nga hinungdanon. Salamat sa pagtabang kanako nga makapayano sa akong kinabuhi!
L.D.C., Guatemala
Ang Sistema sa Imyunidad Gihatag ko ang Pebrero 8, 2001 nga isyu, nga may artikulong “Mga Tigbantay nga Manalipod sa Imong Panglawas,” ngadto sa usa ka doktor nga nalangkit sa panagang nga pagpanambal. Siya nalipay sa hulagway sa panid 15 nga nagpadayag sa puting mga selula sa dugo nga nag-atake sa bakterya. Gipadak-an niya kini ug gikuwadro, ug iyang ginagamit kini karon sa pagsaysay sa sistema sa imyunidad.
H. K., Hapon
Ako nagbasag Pagmata! sulod sa 30 anyos, ug giapresyar ko pag-ayo ang tukma-sa-panahong impormasyon niini. Nakadayeg gayod ako sa artikulong “Mga Tigbantay nga Manalipod sa Imong Panglawas” kay kana nakatabang kanako sa pagsabot sa kahibulongan kaayong paagi sa paglihok sa sistema sa imyunidad nga gibutang ni Jehova diha kanato.
L. G., Mexico
Usa ako ka doktor, ug nakat-onan ko ang bahin sa sistema sa imyunidad sa dihang estudyante pa ako sa medisina. Ang katin-awan sa teksbok sa sistema sa imyunidad lisod sabton, apan kini nga artikulo talagsaon. Nagsumaryo kini sa ulohan sa paagi nga sayong sabton. Ang usa nga naglektyur kas-a miingon nga sa dihang tun-an nato ang sistema sa imyunidad, kita dili makataronganong makalikay sa ideya nga ang Diyos maoy naghimo niana. Ako magpaabot sa dugang nga talagsaong mga artikulo bahin sa lawas sa tawo.
N. K., Hapon
Mga Tsunami Ako 12 anyos, ug gibasa ko ang tanan ninyong magasin. Nagustohan ko kaayo ang artikulong “Makapatay nga mga Balod—Mga Kasugiran ug mga Kamatuoran.” (Pebrero 8, 2001) Malingaw ako sa maong mga balod, ug nahimuot ako sa paagi sa inyong pagpakita, pinaagi sa panig-ingnan, kon unsa ka gamhanan kini sila.
K. S., Tinipong Bansa
Radyoaktibong Abog Nahimuot ako sa kayano sa katin-awan diha sa artikulong ‘Radyoaktibong Abog—Butang nga Kabalak-an.’ (Pebrero 22, 2001) Nahibalo ako nga ang mga elemento nga sama sa strontium 90 makadaot kaayo, apan wala ako mahibalo nga kini moapektar sa tawo sukad sa iyang pagkabata. Ang pagkasabot sa maong komplikadong mga ulohan mapuslanon kaayo kay kini makatabang sa mga tawo sa pagkaamgo nga ang tawo nagkinahanglan gayod sa tabang sa Dakong Maglalalang aron makaplagan ang mga solusyon. Salamat kaayo tungod sa pagpadayon sa pagpakitag kabalaka alang sa inyong mga magbabasa pinaagi sa pagpayano sa maong lisod nga mga ulohan aron si bisan kinsa makakuhag kaayohan gikan niana.
M. Z., Italya
Mga Batan-on Nangutana Ako nagbasa na sa magasing Pagmata! sukad pa sa panahong gitawag kinig Consolation. Bisan pag ako tigulang na, ako nagkalipay sa pagbasa sa mga artikulo sa “Mga Batan-on Nangutana . . .” Pinaagi sa pagpahiuyon sa pipila sa mga kahimtang nga gipahayag ngadto sa mga kahimtang nga giatubang sa mga tigulang, ako makakuha ug daghang impormasyon ug makabaton ug maayong tambag. Ang serye nagaedukar bisan sa mga tigulang nga sama nako.
R. S., Tinipong Bansa