“Mga Siruhano” nga Magkisikisi ug Ganado

Bisag ngil-aran ang pipila nga maghunahuna tingali niana, ang may-katakos ug mahinlo nga “siruhano” nagagimaw​—ang ubos nga ulod sa langaw. Usa ka taho diha sa The Journal of the American Medical Association (JAMA) nag-ingon nga ang mga doktor sa United Kingdom naghimog usa ka eksperimento sa 12 ka pasyenteng may mga kabahong sa bitiis. Ang unom gitambalan sa naandang tambal nga hydrogel, ug ang unom, pinaagi sa paggamit ug mga ulod sa langaw. *

“Ang tanang unom ka pasyenteng gitambalan sa ulod may hinlo nang mga samad human sa 3 lang ka adlaw,” matod sa JAMA. Kadtong gitambalan sa naandang paagi, “may duha lang ka hinlong mga samad human sa 1 ka bulan nga pagtambal; ang nahibiling upat nagkinahanglag dugang nga pagtambal.” Ang Britanikong medikal nga magasing The Lancet nag-ingon nga ang pagtambal pinaagig ulod “makapakunhod ug dako sa mga panahon sa pagtambal kon itandi sa naandang mga pagtambal” ug nga “ang gasto niini kapin lamag diyutay sa katunga kay sa hydrogel.”

Sa dihang gamiton ang ulod sa pagtambal​—pananglit diha sa usa ka samad nga nakabahong na​—ang mga doktor magbutang ug bag-o pa, hinlo nga mga ulod sa samad, matod sa JAMA. (Siyempre, ang mga doktor mogamit lamang niadtong espisye sa mga ulod nga dili modaot sa himsog nga mga tisyu.) Dayon ang samad taklapan ug pinong nylon nga gasa ug sa mosuhop nga humok nga panapton sa ilalom sa paghupot sa nagtubig nang patayng tisyu. Sa pagkabusog na sa mga ulod, kini kuhaon ug ilabay, ug idugang ang mga bag-o hangtod bug-os nang mahinlo ang samad. Human niana, ang moagos nga dugo paingon sa nahibiling himsog nga tisyu mopausbaw sa pagtubo sa bag-ong unod.

“Wala kamiy pasyente nga mibalibad sa mga ulod,” matod sa siruhano sa kaugatan nga si Michael Walker. “Ang mga trabahante sa ospital, dili ang mga pasyente, mao ang ngilngigan.” Gawas pa sa United Kingdom, ang Tinipong Bansa ug Canada mogamit usab ug pagtambal pinaagig ulod diha sa pipila ka ospital. Sa pagkamatuod, usa ka siruhano nga gikutlo diha sa The Lancet miingon nga “mas daghan ang mga pasyente sa TBA nga mohangyog pagtambal pinaagig ulod kay sa mga doktor nga andam mogamit niana.”

Ang pagtambal pinaagig ulod dili tinuyong nadiskobrehan. “Ang mga doktor sa panggubatan,” matod sa Science World, “nakakita nga ang mga samad sa mga sundalo nga giulod mas daling naayo kay sa mga samad nga wala ulora. Sa wala madugay nagsugod na ang pagtambal pinaagig ulod.” Ug karon kini gigamit sa ginatos ka ospital sa Tinipong Bansa ug Uropa.

[Footnote]

[Hulagway sa panid 22]

Ubay-ubayng ulod sa langaw nga gipakita diha sa usa ka tudlo (tinuod nga gidak-on)

[Credit Line]

Copyright sa letrato SMTL, http://www.smtl.co.uk/

[Mga hulagway sa panid 22]

Sa wala pa tambali

Human matambali

[Credit Line]

Mga letrato ni R. Sherman, University of California, Irvine