Si Mama ug ang Iyang Napulo ka Anak Babaye

SUMALA SA GIASOY NI ESTHER LOZANO

SI Mama ug si Papa natawo sa Bitlis, Turkiya, sa Armenianong mga ginikanan. Sayo sa miaging siglo, sa dihang may kaylap nga pagmasaker sa mga Armeniano, ang among amahan mibiya sa Turkiya ug miadto sa Tinipong Bansa. Siya niadto mga 25 anyos. Ang among inahan, si Sophia, ulahi nga mibiya, sa dihang siya 12 anyos.

Ang mga ginikanan sa duha ka pamilya daw nagkasabot nga ang among inahan paadtoon sa Tinipong Bansa aron maminyo sa among amahan, si Aram Vartanian. Si Sophia bata pa kaayo aron maminyo sa iyang pag-abot sa Fresno, California, busa miipon siya pagpuyo sa iyang umaabot nga ugangang-babaye hangtod siya anaa na sa hustong edad.

Ang panganay nga anak sa among mga ginikanan maoy lalaki nga ginganlan nilag Antranig, usa ka ngalan nga sa ulahi giilisan ug Barney. Natawo siya sa Agosto 6, 1914. Ang misunod nga pulo ka anak maoy pulos babaye. Ang among amahan nahimong Estudyante sa Bibliya, ingon sa pagkaila niadto sa mga Saksi ni Jehova, sa dihang si Shield Toutjian miduaw sa Fresno ug mipakigpulong ngadto sa Armenianong komunidad niadtong 1924. Human niadto, ang among tibuok pamilya nag-usa sa pagtambong sa Kristohanong mga tigom.

Mibalhin kami sa Oakland, California, niadtong 1931 ug nakig-uban sa kongregasyon didto. Si Barney matinumanong nag-alagad kang Jehova sa Napa, California, hangtod sa iyang pagkamatay niadtong 1941. Ako ang ikatulong anak nga babaye nga natawo sunod kang Barney, ug ako nagpasimbolo sa akong pagpahinungod  kang Jehova niadtong 1935. Human sa pagtambong sa mga tigom sulod sa mga 75 ka tuig, ang among igsoong si Agnes nabawtismohan dili pa dugay! Kaming tanang mga babaye presente, ug nalipay kaayo kami nga bawtismado na karon ang kataposan sa napulo ka babaye.

Ikasubo, si Mama wala didto niadto. Siya namatay sa miagi pang tuig sa panuigong 100 ka tuig ug 2 ka adlaw. Ang iyang pagkamatay gibalita sa mantalaan sa California nga Hayward News sa Mayo 14, 1996. Kadto nagpahayag nga “siya naghimog boluntaryong serbisyo sa komunidad ingong Saksi ni Jehova pinaagi sa pagtudlo . . . sa Bibliya ngadto sa mga tawong interesado sulod sa 54 ka tuig.” Ang artikulo nagkutlo usab sa among igsoong si Elizabeth, kinsa miingon: “Ang iyang balay kanunayng bukas ug siya kanunayng may lugar alang sa usa pa diha sa kan-anang lamesa . . . Siya kanunayng moingon, ‘Dayon aron makainom ug isog nga kape,’ ug kon ikaw makadayon sa dihang siya nagluto sa iyang iladong baklava keyk, bulahan ka gayod.”

Ang kinamagulangan namo nga igsoong babaye, si Gladys, 85 anyos na, ug ang kinamanghoran 66 anyos. Kaming tanan aktibong mga Saksi. Tulo kanamo nag-alagad ingong mga misyonaryo human makagraduwar sa Watchtower Bible School of Gilead. Si Elizabeth, kinsa karon nagpuyo sa Newport Beach, California, nakatungha sa ika-13ng klase sa tunghaan ug nag-alagad sa Callao, Peru, sulod sa lima ka tuig. Si Ruth mitambong sa ika-35 nga klase. Siya ug ang iyang bana, si Alvin Stauffer, nag-alagad ingong mga misyonaryo sa Australia sulod sa lima ka tuig. Ako nakatungha sa ikaupat nga klase sa Gilead ug niadtong 1947 naasayn ngadto sa Mexico, diin niadtong 1955, ako naminyo kang Rodolfo Lozano. * Kaming duha nag-alagad sa Mexico sukad niadto.

Kaming napulo ka magsoong babaye mapasalamaton kaayo tungod sa maayong panglawas nga among nabatonan. Kini nagpahinabo nga makapadayon kami sa pag-alagad kang Jehova uban sa bug-os namong hunahuna, kasingkasing, ug kusog samtang maoy iyang kabubut-on​—karon ug hangtod sa kahangtoran diha sa iyang bag-ong kalibotan.

[Footnote]

[Hulagway sa panid 20]

Si Agnes panahon sa pagbawtismo kaniya, 1997

[Hulagway sa panid 20, 21]

Si Elizabeth sa adlaw nga migraduwar siya sa Gilead, 1949

[Hulagway sa panid 21]

Si Esther (sa tuo) sa sangang buhatan sa Mexico, 1950

[Hulagway sa panid 21]

Si Ruth ug Alvin Stauffer nga nag-alagad ingong internasyonal nga mga alagad sa sangang buhatan sa Mexico, 1987