Ang Paggamit sa Diyos ug Gahom—Makataronganon ba Kini?
Ang Hunahuna sa Bibliya
Ang Paggamit sa Diyos ug Gahom—Makataronganon ba Kini?
ANG makamatay nga paggamit sa gahom sagad nga nahimong bahin sa kasaysayan sa tawo. Sa usa ka pagbanabana, lagmit 170,000,000 ka tawo ang gipamatay sa ika-20ng siglo sa ilang kaugalingong politikal nga mga kagamhanan. Sumala sa tukmang gipakita sa Bibliya, ang mga tawo kanunayng nagdominar sa ubang mga tawo ngadto sa ilang kadaotan.—Ecclesiastes 8:9.
Tungod sa dili hustong paggamit sa tawo sa mapintasong gahom, ang pipila tingali mokuwestiyon sa paggamit sa Diyos ug gahom sa paglaglag sa iyang mga kaaway. Dili ba ang mga Hudiyo, ilalom sa direktang pagtultol sa Diyos, nag-atake ug nagpatay sa mga molupyo sa Canaan sa Yutang Saad? (Deuteronomio 20:16, 17) Ug dili ba ang Diyos mismo nag-ingon man nga iyang dugmokon ug taposon ang tanang masukihong mga kagamhanan? (Daniel 2:44) Ang pipila ka sinserong tawo nagduhaduha kon ang paggamit sa Diyos ug gahom kanunay bang makataronganon.
Pag-abusar sa Gahom
Importanteng masabtan nga ang katakos sa paggamit ug gahom maoy hinungdanong elemento sa kagamhanan. Ang usa ka administrasyon nga dili makapatuman sa mga dekreto niini maoy, sa baylo, walay-gahom. Pananglitan, unsa ka daghang tawo nga bisan pa sa gitahong mga pag-abusar sa mga polis ang kinabubut-ong modumili sa panalipod nga itagana sa kapolisan? Ug kinsang tawhana nga sa hustong paagi makalalis batok sa panginahanglan sa usa ka hudisyal nga sistema nga makapatuman sa mga balaod niini?
Si Mohandas Gandhi, kinsa nailhan sa iyang kaligutgot sa kapintasan, kas-a miingon: “Pananglit ang usa ka tawo maghuramentado ug mabangis kaayo, nga may dalang espada, ug magpatay sa tanan niyang masugatan, ug walay mangahas sa pagdakop kaniyang buhi. Bisan kinsang tawhana nga makapakgang sa maong buangbuang pasalamatan gayod sa mga tawo ug isipon nga usa ka mabinationg tawo.” Oo, bisan si Gandhi nakasabot sa panginahanglan sa paggamit ug gahom ilalom sa pipila ka kahimtang.
Dayag, ang katakos sa paggamit ug gahom maoy usa ka kinahanglanong elemento sa bisan unsang establisadong katilingban. Sa katibuk-an, sa dihang ang mga tawo mosupak sa paggamit ug gahom, ang ilang gisaway mao gayod ang pag-abusar sa gahom.—“Ang Tanan Niyang Dalan Hustisya”
Walay ebidensiya sukad diha sa kasaysayan nga ang Diyos nag-abusar sa iyang gahom. Siya dili momando pinaagig malupigong gahom. Buot niyang kita mosimba kaniya tungod sa gugma. (1 Juan 4:18, 19) Sa pagkatinuod, ang Diyos dili mogamit ug gahom kon duna pay maayong paagi sa paglikay niana. (Jeremias 18:7, 8; 26:3, 13; Ezequiel 18:32; 33:11) Ug kon mopili siya paggamit ug gahom, siya kanunayng mohatag ug igong pasidaan aron si bisan kinsang buot magbag-o makahimog mga lakang sa pagtul-id. (Amos 3:7; Mateo 24:14) Ingon ba niana ang mga paagi sa usa ka malupigon, mapintas nga Diyos?
Ang paggamit sa Diyos ug gahom dili ikatandi sa dili makataronganong pag-abusar sa gahom sa mga tawo. “Ang tanan niyang dalan hustisya,” matod ni Moises bahin kang Jehova, “usa ka Diyos sa pagkamatinumanon, nga kaniya walay inhustisya.” (Deuteronomio 32:4) Dili sama sa mga kagamhanan sa malupigong mga tawo, ang kagamhanan sa Diyos wala ipasukad sa kon kinsay mas gamhanan. Sa tanang kahimtang, siya naggamit ug gahom uyon sa iyang hingpit nga gugma, kaalam, ug hustisya.—Salmo 111:2, 3, 7; Mateo 23:37.
Pananglitan, sa dihang gilaglag sa Diyos ang mga daotan sa Lunop, kadto nahitabo human ang daghang tuig sa pagpasidaan. Si bisan kinsa mahimong nakapahimulos sa gitaganang arka ug naluwas. Walo ka tawo lamang ang naghimo niana. (1 Pedro 3:19, 20; 2 Pedro 2:5) Sa mga adlaw ni Josue, ang Israel nagpahamtang sa paghukom sa Diyos sa mahilayong mga Canaanhon, usa ka paghukom nga gipahayag kapin sa 400 ka tuig nga abante! (Genesis 15:13-21) Sulod nianang panahona, ang mga Canaanhon dili na gayod ignorante sa puwersadong pamatuod nga ang mga Israelinhon maoy piniling katawhan sa Diyos. (Josue 2:9-21; 9:24-27) Apan, walay Canaanhong nasod gawas sa mga Gabaonhon ang mihangyog kaluoy o nagpahimulos sa kahigayonan sa paghangyog kalinaw. Sa kasukwahi, ang mga Canaanhon mipalabi sa pagpatig-a sa ilang mga kasingkasing batok sa Diyos.—Josue 11:19, 20.
Ang Diyos Adunay Awtoridad
Sa dihang mosulay pagsabot sa paggamit sa Diyos ug gahom, kinahanglang magsugod kita diha sa paninugdang kamatuoran bahin sa atong posisyon atubangan sa Diyos. “Kami ang yutang-kulonon, ug ikaw ang among Magkukulon,” mapaubsanong miila si manalagnang Isaias. (Isaias 64:8) Dayag, ingong Maglalalang sa uniberso, ang Diyos makagamit ug gahom sa bisan unsang paagi nga buot niya. Isip pag-ila sa awtoridad sa Diyos, sama ni Solomon kita makaingon: “Ang pulong sa hari mao ang gahom sa pagbuot; ug kinsa ang moingon kaniya: ‘Unsay imong ginabuhat?’”—Ecclesiastes 8:4; Roma 9:20, 21.
Tungod sa posisyon sa Diyos ingong labing gamhanang Maglalalang, may katungod siya sa paghatag ug pagkuha sa yutan-ong kinabuhi. Sa pagkatinuod, ang mga tawo dayag nga walay katungod ug kahibalo sa pagkuwestiyon sa paggamit sa Diyos ug gahom. Ang tawo kinahanglang makakat-on sa pagpahiuyon sa iyang panghunahuna sa iya sa Diyos. “Dili ba ang inyong mga dalan ang dili matul-id?” Si Jehova nangutana.—Ezequiel 18:29; Isaias 45:9.
Ang pagbati ni Jehova sa hustisya ug ang iyang gugma sa mga tawo maoy magpalihok niya sa paghinlo sa yuta sa mga tawong nag-abusar sa gahom ug mabangisong nagyatak sa mga katungod sa uban. Kining paggamit sa gahom maoy magpundar sa maayong mga kahimtang sa yuta alang sa tanang tawo nga mahigugmaon sa kalinaw nga buot niana. (Salmo 37:10, 11; Nahum 1:9) Sa ingon ang kagamhanan sa Diyos maisip nga makataronganon ug mabayaw sa walay kataposan.—Pinadayag 22:12-15.