Gikan sa Among mga Magbabasa

Artikulo Nakaluwas ug Kinabuhi Miduaw kami sa usa ka tawong ginganlag Lenny nga miingon nga ang artikulong “Dengge​—Ang Hilanat Gumikan sa Pinaakan” (Hulyo 22, 1998) nakaluwas sa kinabuhi sa iyang pag-umangkong babaye. Gihilantan na siyag pila ka adlaw, ug may nanubo na sa iyang lawas; apan ang iyang mga ginikanan nag-ingon nga tipdas lamang kadto. Kay nahinumdom sa artikulo, gipangita ni Lenny ang magasin ug gibasa pag-usab ang seksiyon nga naghubit sa mga simtoma sa dengge. Iya dayong giingnan ang mga ginikanan sa iyang pag-umangkon nga dad-on siya sa ospital. Ang mga doktor didto nagkompirmar nga siya may hemorrhagic fever. Nakadayeg si Lenny sa Pagmata! nga nakatabang niya sa pagluwas sa iyang pag-umangkon, ug sa ulahi miuyon siya nga magtuon sa Bibliya.

J.M.L., Pilipinas

“Marfan’s Syndrome” Sa artikulong “Pagsagubang sa ‘Marfan’s Syndrome’​—Sa Dihang ang mga Lutahan Malisa” (Pebrero 22, 2001), si Michelle nag-ingon nga kada adlaw motomar siya ug morpina. Nganong ang makaadik nga droga gamiton man sa usa ka Kristohanon?

S. D., Tinipong Bansa

Sayop alang sa usa ka Kristohanon ang paggamit ug mga droga tungod lang sa mga kalalim o kalami nga ipatungha niini. Bisan pa niana, ang usa ka tawo nga modawat ug narkotiko isip pangpahupay sa kasakit ubos sa pagtultol sa usa ka doktor dili gayod ikaingon nga nangita lamang siya ug kalalim. Siyempre, bisan sa mga kahimtang nga sama niana, ang usa ka Kristohanon kinahanglang magtimbangtimbang bahin sa posibilidad sa pagkaadik ug sa ubang makadaot nga mga epekto tungod sa pagtomar sa maong mga tambal.​—ED.

Nakadasig nako ang kasinatian ni Michelle. Bisan tuod kanunay siyang mibatig kasakit, ako nakadayeg sa kamatuoran nga wala niya tugoti ang iyang mga kahimtang nga mopahunong niya sa pag-alagad kang Jehova sa bug-os kasingkasing.

J. G., Guam

Paghulog sa Radyoaktibo Nawad-an akog gana sa inyong artikulong “Paghulog sa Radyoaktibo​—Butang nga Kabalak-an.” (Pebrero 22, 2001) Dili ninyo angay gamiton ang mga taktika sa pagpanghadlok aron lisangon ang mga tawo, sa paningkamot nga palamboon ang inyong panghunahuna bahin sa Bibliya. Ang mga risgo kinahanglang ipahayag diha sa hustong dapit niini. Pananglitan, ang elektrisidad luwas man kon gamiton lamang nga maampingon. Apan, daghang tawo ang makoryentehan kada tuig. Nagpasabot ba kini nga kitang tanan sobrang mahadlok ug magkinabuhi sa kahadlok sa elektrisidad? Ang kamatuoran mao nga ang tanang nasod magkinahanglan ug dugang elektrisidad sa umaabot, ug ang nukleyar nga mga reaktor nakita nga mao ang labing hinlo ug labing luwas nga paagi sa pagsuplay niini. Dili kinahanglang mahadlok kita sa nukleyar nga enerhiya.

R. S., Canada

Komplikado kining mga isyuha, ug among gipabilhan ang kaprangka sa magbabasa. Hinuon, kami wala mobati nga ang among artikulo naggamit ug “mga taktika sa pagpanghadlok.” Walay gihimong pagsulay aron lisangon ang among mga magbabasa. Ni gisaway namo ang nukleyar nga enerhiya. Sa baylo, among gipakita ang nahiangayng mga kabalaka nga anaa sa mga tawo bahin sa nukleyar nga enerhiya, nga nagtumong sa Gingharian sa Diyos nga mao ang ultimang sulbad sa kakulang sa enerhiya.​—ED.

Insyurans Isip ahente sa insyurans, ako nakadayeg gayod sa gipasiugdang serye nga “Seguro​—Nagkinahanglan Ka ba Gayod Niini?” (Pebrero 22, 2001) Alang sa daghan nga dunay insyurans, kini makapalibog gayod kaayo. Lisod sabton kon nganong mobayad ka sa usa ka butang nga basin dili gayod nimo magamit. Sa ingon ako mapasalamaton sa inyong ilustrasyon bahin sa pagdaladalag reserbang ligid. Salamat niining maayong pagkasulat nga impormasyon.

C. P., Tinipong Bansa

Paglighot Salamat sa inyong artikulong “Mga Batan-on Nangutana . . . Daotan ba Gayod ang Paglighot sa Balay?” (Pebrero 22, 2001) Nakapasubo kanako ang paglantaw sa pagkawalay-kasinatian sa pipila ka batan-ong mga Kristohanon. Usa ka batan-ong babaye ang milighot ug miadto sa parti ug unya gilugos. Walay nakatabang niya. Palihog ipadayon ang pagpasidaan sa atong mga batan-on!

J. N., Tinipong Bansa