‘Napakyas ang Eksperimento’

NIINING kalibotana, nga usa ka tuling nagakaunlod nga tibuok-globong balangay, giingon nga ang bung-aw tali sa mga dato ug pobre nagkadako. Nagkomento bahin sa mga paningkamot sa pagtukod ug usa ka tibuok-globo nga ekonomiya, usa ka internasyonal nga grupo sa mga aktibista ang miingon: “Human sa 50 ka tuig nga pag-eksperimento, kini napakyas. Imbes mohatag ug mga kaayohan sa ekonomiya alang sa tanang tawo, kini nagpahinabog kadaot sa kalikopan, wala-hitupnging kasamok sa katilingban, kaguliyang sa ekonomiya diha sa kadaghanang mga nasod, pag-usbaw sa kakabos, kagutom, kawalay-kaugalingong-yuta, paglalin ug kagubot sa katilingban. Ang eksperimento mahimong tawgon karon nga usa ka kapakyasan.”

Unsay diperensiya niana? Sa dihang ang mga tawo mangagpas sa hinakog nga mga tumong, lagmit gayod silang makapahinabog kadaot. Ang tigpamuhonan-kapitalista nga si George Soros nag-ingon: “Ang pinansiyal nga mga merkado nagpahinabo nga ang tanan, lakip na ang mga tawo (pamuo) ug kinaiyahan (yuta), isipong mga manggad.” Ang pagkadili-hingpit sa tawo mao usab ang nakaingon. Miuyon sa mga hunahuna sa pilosopong si Karl Popper, si Soros nag-ingon: “Ang atong pagsabot kinaiyanhong dili-hingpit; ang bug-os nga kamatuoran, ang hingpit nga disenyo alang sa katilingban, dili nato makab-ot.”

Ang pagkawalay-kaangayan sa ekonomiya dili gayod bag-o. Walo ka siglo una pa kang Kristo, usa ka magsusulat sa Bibliya naghisgot bahin niadtong “nanikas sa mga timawa, nga nagdaogdaog sa mga kabos.” (Amos 4:1) Human makita ang susamang mga inhustisya, usa ka karaang estadista misulat mga 3,000 ka tuig kanhi: “Ang tawo nagmando sa tawo alang sa iyang kadaotan.”​—Ecclesiastes 8:9.

Unsa ang solusyon? Ang mga ahensiya ba sa tawo makasulbad sa hilabihang kawalay-kaangayan sa ekonomiya pinaagi sa internasyonal nga kooperasyon? “Wala kitay igong internasyonal nga mga institusyon,” matod ni Soros, “nga manalipod sa tagsatagsa ka kagawasan, tawhanong mga katungod, ug sa kalikopan, o magpalambo sa hustisya diha sa katilingban​—gawas pa sa pagpatunhay sa pakigdait. Kadaghanan sa mga institusyon nga atong nabatonan maoy mga kapunongan sa mga estado, ug kasagarang unahon sa mga estado ang ilang mga intereses inay ang interes sa kadaghanan. Ang Hiniusang Kanasoran ingong konstitusyon walay katakos sa pagtuman sa mga saad nga anaa sa pasiuna sa karta niini.”

Angay ba kitang mawad-ag paglaom? Dili. Ang usa ka matarong nga tibuok-kalibotang kagamhanan nagsingabot na! Mao kana ang tema sa pagsangyaw ni Jesus. Gitawag niya kinig “ang gingharian sa Diyos,” ug gitudloan niya ang iyang mga sumusunod sa pag-ampo alang niana. (Lucas 11:2; 21:31) Ang Gingharian sa Diyos natukod na sa mga langit, ug sa dili madugay wagtangon niini ang tanang inhustisya gikan niining yutaa. (Pinadayag 11:​15, 18) Imbes mahimong temporaryong eksperimento sa pagmando, ang Gingharian sa Diyos magpabilin sa walay kataposan. (Daniel 2:44) Kini magsulbad sa dayon sa mga problema sa kakabos ug pagdaogdaog. Pagkanindot nga palaaboton alang sa mga kabos ug mga dinaogdaog​—sa pagkatinuod, alang sa tanan!

[Hulagway sa panid 13]

Ang tibuok-globong ekonomiya wala makasulbad sa mga problema sa mga kabos​—bilyonbilyon gihapon ang nagkinabuhi nga walay gripo o elektrisidad