“Usahay Abi Nakog Nagdamgo Lamang Ako!”

Si Lourdes naglantaw sa siyudad diha sa bentana sa iyang apartment, ang iyang mga tudlo nagpangurog nga nagtabon sa iyang baba. Usa siya ka babayeng taga-Latin Amerika nga nag-antos diha sa mga kamot ni Alfredo, ang iyang pintas nga bana, sulod sa kapin sa 20 ka tuig. Si Alfredo gusto nang magbag-o. Apan, si Lourdes malisdan gihapon sa pagsugilon sa pisikal ug emosyonal nga kasakit nga iyang giantos.

“Nagsugod kadto mga duha lang ka semana human sa among kasal,” matod ni Lourdes sa hinay nga tingog. “Makausa, nahingo niya ang akong duha ka ngipon. Sa laing higayon ako nakahupo, ug ang iyang kinumo miigo sa estante sa sinina. Apan mas sakit ang iyang pagpamalikas. Gitawag niya ako nga ‘way pulos nga basura’ ug nagtratar kanako nga morag ako walay kabangkaagan. Gusto kong molayas, apan unsaon man nako paglayas uban sa tulo ka anak?”

Malumong gigunitan ni Alfredo ang abaga ni Lourdes. “De-ranggo ako nga propesyonal,” siya miingon. “Naulaw ako sa dihang gisumonan ako sa korte ug gibaoran nga panalipdan sa mga awtoridad ang akong pamilya. Naningkamot ako sa pagbag-o, apan wala madugay nagbuhat na usab ako sa samang butang.”

Sa unsang paagi nabag-o ang mga kahimtang? “Ang babaye diha sa tindahan sa kanto maoy usa sa mga Saksi ni Jehova,” saysay pa ni Lourdes, nga karon mas relaks nang tan-awon. “Mitanyag siya nga tabangan ako sa pagsabot sa Bibliya. Nakat-onan nako nga si Jehova nga Diyos nagpabili sa mga babaye. Nagsugod ako sa pagtambong sa mga tigom sa mga Saksi ni Jehova, bisan tuod sa sinugdan nakapasuko kadto kang Alfredo. Usa ka bag-ong kasinatian kadto alang kanako nga mogugol ug panahon uban sa mga higala sa Kingdom Hall. Ako nahibulong sa pagkasayod nga makahimo diay ako sa pagbaton ug kaugalingong mga tinuohan, makapahayag niana nga gawasnon, ug makatudlo pa gani niana ngadto sa uban. Akong naamgohan nga gipabilhan diay ako sa Diyos. Nakapalig-on kadto kanako.

“Dihay lisoanang punto nga dili nako malimtan. Si Alfredo tigtambongan gihapon sa Katolikong Misa kada Dominggo, ug supak siya sa akong ginabuhat uban sa mga Saksi ni Jehova. Gitutokan nako siya ug akong giingnan sa kalmado ug masaligong paagi: ‘Alfredo, ang imong hunahuna dili mao ang akong hunahuna.’ Ug wala niya ako sukmaga! Wala madugay, ako nabawtismohan, ug wala na niya ako sukmaga sulod na karon sa lima ka tuig.”

Apan mas dakong kausaban pa ang miabot. Si Alfredo misaysay: “Mga tulo ka tuig human mabawtismohi si Lourdes, usa nako ka kauban nga Saksi ni Jehova nagdapit kanako ngadto sa iyang balay, ug iyang gisaysay kanako ang makalingaw nga mga butang gikan sa Bibliya. Nga wala magsugilon sa akong asawa, misugod ako pagtuon sa Bibliya uban kaniya. Wala madugay mikuyog na ako kang Lourdes ngadto sa mga tigom. Daghang pakigpulong nga akong nadunggan didto maoy bahin sa pamilyahanong kinabuhi, ug kasagaran nga ako mobati ug kaulaw.”

Nakadayeg si Alfredo sa pagkakita nga ang mga membro sa kongregasyon, lakip ang mga lalaki, nanilhig sa salog human sa mga tigom. Sa pagduaw niya sa ilang mga pinuy-anan, iyang nakita ang mga bana nga motabang sa ilang mga asawa sa paghugas ug mga plato. Kining gagmayng mga kahimtang nagpakita kang Alfredo kon sa unsang paagi maglihok ang tinuod nga gugma.

Wala madugay, si Alfredo nabawtismohan, ug karon siya ug ang iyang asawa nagaalagad na ingong bug-os-panahong mga ministro. “Kanunay niya akong tabangan sa pagpanghipos sa lamesa human mangaon ug sa paghapnig sa higdaanan,” matod ni Lourdes. “Iya akong dayegon sa akong linutoan, ug iya akong tugotan sa paghimog mga pagpili​—sama sa kon unsay gusto nakong paminawon nga musika ug kon unsay among pamaliton para sa balay. Kining mga butanga wala gayod mahimo niadto ni Alfredo! Di pa dugay, sa unang higayon, iya akong gidad-an ug pungpong sa mga bulak. Usahay abi nakog nagdamgo lamang ako!”

 [Hulagway sa panid 10]

“Akong naamgohan nga bililhon diay ako sa mga mata sa Diyos. Nakapalig-on kadto kanako”

[Hulagway sa panid 10]

Nakadayeg si Alfredo sa pagkakita nga ang mga membro sa kongregasyon, lakip ang mga lalaki, manilhig sa salog human sa mga tigom

[Hulagway sa panid 10]

Iyang nakita ang mga bana nga motabang sa ilang mga asawa sa paghugas ug mga plato

[Hulagway sa panid 10]

“Di pa dugay, sa unang higayon, iya akong gidad-an ug pungpong sa mga bulak”