Mga Sugilanon sa Pagtuo Gikan sa Makasaysayanhong Bilanggoan

Sa tibuok kalibotan, ang mga boluntaryo taliwala sa mga Saksi ni Jehova moduaw sa mga bilanggoan aron tabangan ang mga binilanggo nga sinserong nagtinguha nga makigsuod sa Diyos. Sulod sa kapin sa 20 ka tuig, malamposon kaming nakadumala sa maong edukasyonal nga programa sa Bibliya diha sa pederal nga bilanggoan sa Atlanta, Georgia, T.B.A. Ang pagtuon sa Bibliya diha sa bilanggoan maoy usa ka makaikag nga tahas. Ingong boluntaryong mga ministro, makaestorya namo ang mga tulisag bangko, mangingilkil, mamumuno, tigpayuhot ug mga droga, mangingilad, ug mga tagsala sa seksuwal nga buhat. Sa unsang paagi natabangan ang maong mga indibiduwal?

 UNA sa tanan, interesado ka tingali nga mahibalo kon kanus-a ug sa unsang paagi unang nakasulod ang mga Saksi ni Jehova niini nga bilanggoan. Kini maoy niadtong Hulyo 4, 1918. Usa ka grupo sa walo ka iladong Kristohanon nga mga ministro ang giubanan sa pagsaka sa 15 ka granisong mga ang-ang sa hagdanan niining pederal nga bilanggoan. Kon gisunod ang naandang batasan niadtong panahona, giposasan sila nga ang mga posas gitaod sa kadena nga gibakos, nga may talikala ang ilang mga bitiis. Ang bag-ong mga binilanggo maoy kuwalipikado sa espirituwal nga mga lalaki kinsa nanguna taliwala sa Internasyonal nga mga Estudyante sa Bibliya, ingon sa pagtawag kaniadto sa mga Saksi ni Jehova. Wala maghunahuna ang maong mga lalaki nga dili ra dangtan ug usa ka tuig aron pamatud-an nga ang ilang pagkabilanggo maoy usa ka dakong kapakyasan sa hukmanan sa pagpahamtang sa hustisya. Sa Marso 1919, ang walo ka Saksi nga mga ministro mikanaog sa samang hagdanan sa bilanggoan, nga wala nay mga posas ug gawasnon. Sa ulahi gideklarar sila nga walay sala sa dihang ang mga awtoridad nakahukom sa pagsibog sa sumbong. *

Panahon sa ilang pagkabilanggo sa Atlanta, kining maong Kristohanong mga lalaki nagdumala ug mga klase sa pagtuon sa Bibliya. Usa sa walo ka binilanggo, si A. H. Macmillan, ang nagtaho sa ulahi nga ang luyoluyong opisyal sa bilanggoan mabatokon sa sinugdan apan sa kataposan natukmod sa pag-ingon: “Maanindot ang mga leksiyon nga inyong ginatudlo [uban sa mga binilanggo]!”

Karon, kapin sa 80 ka tuig sa ulahi, ang mabungahong mga klase sa pagtuon sa Bibliya padayong naghatag ug dumalayong epekto sa mga indibiduwal nianang mao gihapong bilanggoan. Sa daghang okasyon, ang mga opisyal sa bilanggoan nagpili sa mga membro sa among grupo alang sa linaing pag-ila ug mga ganti agig pasidungog. Ang kaepektibo sa edukasyonal nga mga programa sa mga Saksi ni Jehova gipublikar usab diha sa Volunteer Today, usa ka nasodnong sulat-balita nga gipatik sa U.S. Department of Justice, Federal Bureau of Prisons.

Ang usa sa mga kaayohan sa programa sa pagtuon sa Bibliya uban sa mga binilanggo mao ang talagsaong kausaban sa ilang panggawi. Ingong resulta, ang uban sayong nakagawas sa bilanggoan. Mahimong maghunahuna ang matahapong mga maniniid nga nagtuon lamang sa Bibliya ang mga piniriso tungod sa maong katuyoan. Bisan pag tinuod kana sa pipila ka kaso, lahi ang kasagarang gipakita sa among kasinatian. Sa makadaghan, kami nahinam sa pagkahibalo nga ang among mga estudyante padayong naghupot ug maayong Kristohanong panggawi sa daghang katuigan human sila nakagawas sa bilanggoan. Ang mosunod maoy pipila sa daghang kasinatian nga among napahimuslan luyo sa nagbuntaog nga mga paril niining makasaysayanhong bilanggoan.

Nakakaplag ug Paglaom ang Lalin nga mga Binilanggo

Sayo sa katuigang 1980, kaming nagsangyaw sa bilanggoan sa Atlanta nakapahimulos sa pribilehiyo sa pagtabang sa daghang lalin nga mga binilanggo. Talagsaon ang pipila sa maong mga kausaban.

Sa sinugdan si Raoul * maoy usa ka peligroso gayod nga binilanggo. Siya ug usa niya ka higala maoy propesyonal nga mga kriminal nga nasentensiyahang mabilanggo sa kasong pagbuno. Sila pintas gayod, matod sa mga ansiyano nga nagtabang kanila. Si Raoul dunay mortal nga mga kaaway. Usa ka lalaki ang nanumpa nga patyon niya si Raoul, ug mao usab kana ang panumpa ni Raoul nga buhaton kaniya. Nahadlok si Raoul sa dihang ang iyang higpit nga kaaway gibalhin sa samang bilanggoan sa Atlanta. Morag sa dili madugay mag-abot ra gayod ang dalan niining duha ka dugay nang magkaaway diha sa hawanan, sa kan-anan, o sa selda sa bilanggoan. Apan, human makatuon sa Bibliya uban sa mga Saksi ni Jehova, dako kaayo ang mga kausaban nga nahimo ni Raoul sa iyang panghunahuna, batasan, ug panagway. Sa dihang nag-abot ra gayod ang duha diha sa hawanan sa bilanggoan, wala na gani mailhi si Raoul sa higpit niyang kaaway! Ang dugoon nga panagsangka nga morag dili kalikayan wala gayod mahitabo.

Sa dihang nakahukom si Raoul nga pasimbolohan ang iyang pahinungod sa Diyos pinaagi sa bawtismo, kinahanglang makakaplag ug usa ka angayan nga sudlanag tubig. Mitabang ang  kapelyan sa bilanggoan, nga nagtaganag usa ka itom nga lungon isip tangke nga bawtismohanan. Ang lungon gipuno ug tubig. Apan morag mas dako si Raoul kay sa lungon. Busa gipaneguro sa duha ka ansiyano nga bug-os gayong matuslob sa tubig si Raoul, sumala sa kinahanglanon sa Bibliya. (Lucas 3:21) Karon si Raoul gawasnon na ug padayong nag-alagad ingong masibotong Kristohanong ministro.

Sa 1987 ang usa ka balaod nga maghingilin sa lalin nga mga binilanggo miresulta sa usa ka malaglagon ug grabeng kagubot diha sa bilanggoan nga gibalita sa tibuok kalibotan. Daghan ang gipamihag. Apan, diyutay lang ang nasayod sa sugilanon sa maisogong lalin nga mga binilanggo nga nagpameligro sa ilang mga kinabuhi pinaagi sa pagdumili sa pag-apil sa peligroso ug mapintas nga pag-alsa. Sila maoy mga estudyante sa among mga klase sa pagtuon sa Bibliya. Kining mga tawhana, kinsa andam nga mopatay sa ilang kaaway ug magpakamatay, nagpabiling neyutral​—wala makigbahin sa kapintasan ug bandalismo. Pagkakusganon nga pamatuod sa gahom sa Bibliya sa pagbag-o bisan sa luog nga mga kriminal ngadto sa mahigugmaon-sa-kalinaw nga mga Kristohanon!​—Hebreohanon 4:12.

Pagkaplag sa Kapasayloan

Ang lain pang dili-malimtang kasinatian mao ang iya ni James. Usa siya sa mga Saksi ni Jehova kanhi apan gipasagdan niya ang iyang kaugalingon nga maluya sa espirituwal. Nagpadala siya sa tentasyon ug nakapanikas sa bangko. Gipalagpot siya sa Kristohanong kongregasyon ug nabilanggo sa pederal nga bilanggoan sa Atlanta. Sa ulahi siya misugilon kanamo: “Kadto mao ang labing alaot nga bahin sa akong kinabuhi.”

Lisod ang kinabuhi sa bilanggoan. “Giantos nako ang makalilisang nga pagbati sa pagkanahilain ug kawalay-paglaom,” nahinumdom si James. Apan, ang iyang pagkabalhog diha sa hagip-ot nga selda sa bilanggoan nakatukmod kaniya nga seryosong susihon ang iyang kaugalingon. Ingon niini ang iyang giingon: “Ang nakapasakit kaayo kanako didto sa bilanggoan dili ang akong pagkadili-komportable kondili ang akong pagpakyas  sa akong langitnong Amahan.” Human sa pipila ka bulan, usa sa mga binilanggo nga nagtuon sa Bibliya uban sa mga boluntaryong Saksi ang miduol kang James ug midapit kaniya sa pagtambong sa mga klase sa pagtuon sa Bibliya. Mibalibad si James sa sinugdan tungod sa kaulaw. Apan kanunay siyang gidapit sa maong batan-on, ug sa kadugayan mitambong si James sa usa ka tigom sa Dominggo.

Natandog kaayo siya sa pagkakita niya sa mahigugmaong kahingawa nga gipasundayag sa mga Saksi nga nagadumala sa klase ngadto sa mga estudyante. Sa ulahi laing butang ang nakapadayeg kaniya. Tungod sa iyang mga kasinatian kanhi, nagtuo si James nga ang tanang relihiyosong mga boluntaryo dagkog suweldo tungod sa ilang trabaho uban sa mga binilanggo. Apan sa iyang katingala iyang nahibaloan nga ang mga Saksi wala magtunol ug mga resibo sa gastos ug wala magdawat ug bayad nga salapi alang sa ilang mga serbisyo.​—Mateo 10:8.

Si James nagsugod sa pagpaabot nga mahinamon sa mga tigom. Nakaplagan niya nga ang mga igsoong lalaki nga nagdumala niadtong mga tigoma maluloton ug makapadasig. May usa ka ansiyano nga gidayeg niya pag-ayo. “Halos dili na ako makapaabot sa sunod niyang pagduaw,” matod ni James, “tungod kay himoon niyang makaiikag ang Pulong sa Diyos; makatakod ang iyang espiritu. Gisilsil niya kanako ang panginahanglan sa pagbasa sa Bibliya sa matukiong paagi aron masabtan ang tinuod nga diwa sa mensahe​—aron himoon kining akoa na gayod ug, labing mahinungdanon, aron maugmad nako ang hunahuna ni Kristo.”

Lisod makatuo si James nga pasayloon sa Diyos ang iyang mga sala. Unsay nakatabang kaniya? “Ang pagpasaylo sa Diyos gibanaag diha sa pagtagad nga among nadawat gikan sa matinumanon ug nagasakripisyo-sa-kaugalingon nga mga lalaki. * Usa ka butang ang nahimong tin-aw: Bisan pa sa akong grabeng mga sala, bisag gamay  wala gayod ipabati sa igsoon kanako nga dili na ako mapasaylo sa Diyos. Wala gayod ako pasagdi ni Jehova. Nakita niya ang akong kinasingkasing nga pagbasol ug ang akong pagsalikway sa maong binuang ug malimbongong dalan; ug dagaya niya akong gipanalanginan.” Oo, si James napasig-uli sa Kristohanong kongregasyon. Nagpabilin siyang aktibo ug madasigon human siya makagawas sa bilanggoan mga napulo ka tuig ang milabay. Nalipay ang iyang asawa ug pamilya nga usa na siya karon ka ministeryal nga alagad ug di pa dugayng mihatag sa iyang unang pakigpulong publiko.

Pagkaplag sa Dalan

Nahimamat namo si Johnny sayo sa katuigang 1990. Ang iyang pamilya nakigduyog uban sa mga Saksi ni Jehova, apan walay mausa nga malig-on sa espirituwal sa panahong bata pa si Johnny, sa dihang gikinahanglan niya ang espirituwal ug moral nga giya. Si Johnny inanay nga nahimong kriminal. Nasentensiyahan siya nga mabilanggo sa kampo sa pederal nga bilanggoan haduol sa bilanggoan sa Atlanta. Sa panahon sa iyang pagkabilanggo sa kampo, nahibaloan niya ang among mga klase sa pagtuon sa Bibliya ug nakahukom nga motambong.

Sa sinugdan, halos dili makabasa si Johnny. Apan, maikagon kaayo siyang mokuhag dugang kahibalo mahitungod kang Jehova ug kang Jesu-Kristo mao nga determinado siyang makakat-on sa pagbasa ug maayo. (Juan 17:3) Ang among mga klase sa pagtuon sagad nakatabang sa mga binilanggo niining bahina, ilabina mahitungod sa pagsabot sa ginabasa ug publikong pagbasa. Naningkamot pag-ayo si Johnny sa iyang mga pagtuon mao nga gitahod ug gidayeg siya sa iyang kaubang mga estudyante isip panig-ingnan sa usa ka seryosong estudyante sa Bibliya.

Pipila ka bulan sa ulahi si Johnny gibalhin ngadto sa pederal nga bilanggoan sa Talladega, Alabama, aron motambong sa usa sa edukasyonal nga mga programa niini bahin sa droga. Sa iyang pag-abot, nakigbahin dayon siya sa Kristohanong mga tigom sa mga Saksi ni Jehova nga gihimo didto. Nagpabilin siyang aktibo hangtod gipagawas siya sa kataposan. Sa dihang miabot kanang makapalipayng adlaw, wala maglangay si Johnny sa pagpakigkita sa mga Saksi diha sa iyang gamayng lungsod. Mainiton siyang gidawat ug nagpadayon sa iyang pagtuon ug nagmauswagon sa espirituwal.

Ang kadasig ug gugma ni Johnny sa kamatuoran sa Bibliya nakadasig usab sa iyang inahan nga mas pang makigbahin sa mga kalihokan sa kongregasyon. Siya maoy usa ka dakong tinubdan sa kalig-on ug praktikal nga tabang alang sa iyang inahan. Di pa dugay nabawtismohan siya ingong simbolo sa iyang pahinungod kang Jehova nga Diyos, ug siya nagpadayon sa pagpakigbahin nga aktibo sa Kristohanong ministeryo.

Usa ka Dagayang Ani

Sulod sa milabayng duha ka dekada, kapin sa 40 ka binilanggo sa bilanggoan sa Atlanta ang natabangan nga mahimong bawtismadong mga ministro sa mga Saksi ni Jehova; kapin sa 90 ka uban pang mga binilanggo ang nakabenepisyo usab gikan sa senemanang mga pagtuon sa Bibliya. Ang ubang mga piniriso nabawtismohan human sila makagawas sa bilanggoan o nabalhin sa laing mga bilanggoan.

Kaming nagaduaw niining makasaysayanhong bilanggoan kada semana aron motabang sa tinuod nga naghinulsol nga mga binilanggo mapasalamaton nga makaalagad dinhi niining talagsaong Kristohanong ministeryo. (Buhat 3:19; 2 Corinto 7:8-13) Diha sa usa ka mangiob nga dapit nga gipalibotan sa guwardiyadong mga torre, mga guwardiya, dekoryenteng mga ganghaan, ug nagapangidlap nga binubod nga mga barbed wire, nahupngan kami sa kalipay ug kahingangha nga makita ang pederal nga mga kriminal nga nagbag-o sa ilang mga kinabuhi ug nahimong matinud-anong mga lungsoranon ug matinumanong mga magsisimba sa Diyos.​—1 Corinto 6:9-11.​—Tinampo.

[Mga footnote]

[Kahon/Mga hulagway sa panid 20, 21]

“Giabiabi Nimo ang Pipila sa Akong Labing Suod nga mga Higala”

SA Abril 1983, si Frederick W. Franz, kinsa niadtong panahona nag-alagad nga membro sa Nagamandong Lawas sa mga Saksi ni Jehova, miduaw sa bilanggoan sa T.B. sa Atlanta. Matinguhaon kaayo siyang moduaw niini nga bilanggoan. Sa pagsulod niya sa bilding, gisultihan niya sa kusog nga tingog ang guwardiya nga naglingkod diha sa dawatanan: “Buot kong mahibalo ka nga giabiabi nimo ang pipila sa akong labing suod nga mga higala dinhi!” Nalibog ang guwardiya. Unsay gipasabot ni Franz?

Saysentay-kuwatro ka tuig una pa niana nga si Joseph F. Rutherford ug pito niya ka kauban sayop nga gihukmang sad-an sa kasong panagkunsabo. Sa ulahi si Rutherford ug Franz nahimong suod nga managhigala ug magkauban sa trabaho. Karon, kapin sa 40 ka tuig human sa kamatayon ni Rutherford​—ug sa dihang siya mismo halos 90 anyos na ang edad​—si Franz nahimuot sa pagduaw sa lugar nga gibilanggoan sa iyang higala dugay na kanhi. Walay duhaduha nga naghunahuna siya mahitungod sa buluhaton nga gihimo ni Rutherford ug sa iyang mga kauban sulod sa maong bilanggoan. Unsa man kana?

Wala madugay human sa pag-abot ni Rutherford ug sa iyang mga kauban, ang luyoluyong opisyal sa bilanggoan miingon kanila: “Hatagan namo kamog trabaho. Nan, unsay inyong nakamaohan?”

“Deputy,” mitubag si A. H. Macmillan, usa sa walo, “wala gayod akoy gihimo sa tibuok kong kinabuhi gawas sa pagsangyaw. Aduna ba kamoy ingon niana nga trabaho dinhi?”

“Dili mahimo! Mao bitaw nay hinungdan kon nganong nia mo dinhi, ug sultihan ko kamo nga dili na kamo makasangyaw dinhi.”

Milabay ang pipila ka semana. Ang tanang binilanggo gikinahanglan nga motambong sa misa sa kapilya sa Dominggo, ug mahimong magpabilin ang gustong motambong sa Sunday school inigkahuman sa misa. Ang walo ka lalaki nakahukom nga mohimog kaugalingon nilang klase sa pagtuon sa Bibliya, diin nagpulihanay sila sa pagdumala. “Ang pipila ka maukit-ukiton nanambong, ug nagkadaghan ang nanambong,” matod ni Rutherford sa ulahi. Wala madugay ang gamayng grupo nga 8 midaghan ngadto sa 90 ka tawo!

Unsay sanong sa mga binilanggo sa klase sa pagtuon sa Bibliya? Usa ka binilanggo miingon: “Setentay-dos anyos na ang akong edad, ug kinahanglan pa akong mabilanggo aron makabati sa kamatuoran. Ako nalipay nga alang niining katuyoana ako nabilanggo.” Ang lain pa miingon: “Hapit nang mahuman ang akong sentensiya; gikasubo ko nga ako mobiya na . . . Mahimo ba ninyo akong tug-anan kon asa nako makaplagan ang mga tawong sama kaninyo iniggawas nako?”

Sa gabii una pa buhii ang walo ka lalaki, nakadawat sila ug usa ka makapatandog nga sulat gikan sa usa ka batan-ong lalaki nga nakatambong sa ilang klase. Siya misulat: “Buot ko nga inyong mahibaloan nga nahatagan ninyo akog usa ka tinguha nga mahimong usa ka mas maayo, mas mapuslanon nga tawo, kon motungha pa kana gikan sa usa ka talamayon nga naduhigan nag lapok ug nadaot na nga kinabuhi nga sama sa akoa. . . . Mahuyang ako, mahuyang kaayo, walay mas nahibalo niini gawas kanako, apan sulayan ko ug makigbisog ako sa akong kaugalingon kon gikinahanglan, aron maani ang mga bunga niining binhi nga inyong gitisok, aron katabangan ko dili lang ang akong kaugalingon kondili silang ania palibot kanako. Dili tingali katuohan kining pamation nga gikan sa usa ka tawong sama nako, apan sinsero ko kining gisulti gikan sa sulod, sa kinasuloran gayod sa akong kasingkasing.”

Karon, kapin sa 80 ka tuig sa ulahi, ang mga binhi sa kamatuoran sa Bibliya padayong ginapugas sa mga Saksi ni Jehova sa bilanggoan sa Atlanta​—maingon man sa uban pang mga bilanggoan.​—1 Corinto 3:​6, 7.