Ang Hunahuna sa Bibliya

Ang “Fêng Shui”—Alang ba Kini sa mga Kristohanon?

SA ASIA, ang mga lubnganan pilion sumala niini. Ang mga tinukod disenyohan ug adornohan sumala niini. Ang mga kabtangan paliton ug ibaligya pinasukad niini. Sa Ininsek nailhan kini ingong fêng shui, usa ka matang sa geomancy o augury (pagpanag-an pinasukad sa tilimad-on). Bisag ang fêng shui napopular sa Asia sulod sa kasiglohan, sa di pa dugayng katuigan mikaylap kini ngadto sa mga nasod sa Kasadpan. Ang pipila ka arkitekto naggamit niini sa pagdisenyo sa habog kaayong mga tinukod, mga opisina, ug mga balay. Ang pipila ka ginang sa panimalay naggamit niini sa pag-adorno sa ilang mga panimalay. Daghang basahon ug mga Web site sa Internet ang nagapasiugda ug nagatudlo niini.

Ang hinungdan niining nagatubong popularidad? Matod sa usa ka tigpaluyo niini, ang fêng shui makahatag ug “kauswagan sa kinabuhi, maayong panglawas, mas maayong kaminyoon o panag-ubanay, mas dakong bahandi, ug personal nga kalinaw sa hunahuna.” Bisan tuod kanang tanan makapadaning pamation, unsa ba gayod kining maong kostumbre, ug unsay angayng panglantaw sa mga Kristohanon niini?

Unsa ba Kini?

Ang Ininsek nga mga pulong fêng shui sa literal nagkahulogang “hangin-tubig.” Ang mga sinugdanan sa fêng shui masubay libolibo ka tuig kanhi sa panahon nga daghang pilosopo sa Sidlakan ang naugmad. Lakip niini nila mao ang pagtuo diha sa gitawag pagkatimbang sa yin ug yang (kangitngit ug kahayag, kainit ug kabugnaw, negatibo ug positibo). Ang ideya sa yin ug yang gihiusa sa ideya sa chʼi, nga sa literal nagkahulogang “hangin” o “gininhawa.” Ang yin, yang, ug chʼi, lakip sa gitawag nga lima ka elemento, ang kahoy, yuta, tubig, kalayo, ug puthaw, naglangkob sa hinungdanong mga bahin sa teoriya sa fêng shui. Ang mga deboto sa fêng shui nagtuo nga ang gamhanang mga linya sa enerhiya nagtadlas sa matag dagway sa yuta. Ang tumong mao ang pagtudlo sa mga lokasyon diin ang mga enerhiya, o chʼi, sa yuta ug langit balansehon. Kini mapalampos pinaagi sa pag-usab sa dagway sa yuta mismo o pinaagi sa paghimog mga kausaban sulod sa usa ka tinukod diha sa usa ka partikular nga dapit. Ang pagbalanse niini gituohan nga magdalag suwerte niadtong nagtrabaho o nagpuyo didto.

Kasagaran, ang mga hawod sa fêng shui mokonsulta sa usa ka geomantic nga kompas. * Kini maoy usa ka gamayng magnetikong kompas nga gibutang sa tunga sa yanong astrolohikanhong tsart. Ang kompas dunay mga sirkulo nga may komon nga sentro, nga gibahin pinaagig mga badlis. Ang geomantic nga kompas nasudlag mga kasayoran bahin sa mga butang sama sa mga konstelasyon, mga panahon, ug mga hugna sa mga siklo sa adlaw. Sa dihang mag-analisar sa usa ka dapit o tinukod, makadaghang tinoon ang direksiyon sa kompas. Bantayan sa hawod sa fêng shui kon asang dapita mokuros ang dagom sa kompas diha sa mga badlis ug mga sirkulo nga dapit sa gawas, ug gikan niini iyang matino kon unsay gikinahanglan aron “maayo” ang usa ka dapit.

Ang anaa sa duol nga dagway sa yuta, mga agianan sa tubig, mga imburnal, ug bisan ang pagpahiluna sa mga bentana ug mga pultahan diha sa usa ka tinukod mahimong konsiderahon ang tanan sa paghukom kon unsaon pagbalanse ang usa ka dapit. Pananglitan, sa Canada usa ka tag-iyag tindahan nagbitay ug espeho diha sa pultahan sa luyong bahin sa iyang tindahan aron “matul-id” ang pagkapuwesto sa mga pultahan niini. Ang usang  nagbuhat sa geomancy mahimong mosugyot usab nga magbalhin ug mga tanom o muwebles, mag-ilis ug hulagway, magtaod ug mga lingganay sa hangin, o magbutang ug usa ka akuwaryum aron mabalanse ang usa ka tinukod o lawak.

Ang Kristohanong Panglantaw

Takos tagdon nga kadaghanang librarya nagklasipikar sa mga basahon bahin sa fêng shui uban sa mga sinulat bahin sa astrolohiya ug pagtagna sa kapalaran. Sa pagkatinuod, ang Webster’s Ninth New Collegiate Dictionary naghubit sa geomancy ingong “pagpanag-an pinaagi sa mga numero o mga badlis o mga dagway sa yuta.” (Italiko amoa.) Busa, kaylap nga gidawat nga ang fêng shui ug ubang matang sa geomancy maoy mga matang sa pagtagna sa kapalaran. Kining matanga sa geomancy naglakip sa pagpanag-an ug sa espiritistikanhong mga buhat, nga dili bag-o sa mga tawo.

Sa dihang ang mga Israelinhon mibiya sa Ehipto ug sa kataposan misulod sa yuta sa Canaan sa ika-15ng siglo W.K.P., ang tanang matang sa pagpanag-an kaylap nianang duha ka nasod. Pinaagi kang Moises, ang Diyos miingon, sumala sa natala sa Deuteronomio 18:14: “Kining mga nasod nga imong papahawaon nagpatalinghog sa mga salamangkero ug sa mga mananag-an; apan alang kanimo, wala ka hatagi ni Jehova nga imong Diyos ug bisan unsa nga sama niini.” Ang daghang matang sa pagpanag-an sa Ehipto ug Canaan naggikan sa karaang Babilonya. Sa dihang gilahugay ni Jehova ang pinulongan sa katawhan sa Babilonya, sila nakatag sa laing mga dapit, nga nagdala uban kanila sa mga buhat nga nalangkit sa pagpanag-an ug espiritismo sa Babilonya.​—Genesis 11:1-9.

Si Jehova nga Diyos hugot ug sublisubli nga nagpasidaan sa Israel nga dili mosunod sa mga buhat sa pagpanag-an sa ubang mga nasod, nga nag-ingon: “Walay makaplagan diha kanimo nga bisan kinsang . . . nagapanag-an, usa ka salamangkero o bisan kinsa nga nagapangitag mga tilimad-on . . . Kay bisan kinsa nga nagabuhat niining mga butanga dulumtanan kang Jehova, ug tungod niining dulumtanan nga mga butang si Jehova nga imong Diyos nagahingilin kanila gikan sa imong atubangan.” (Deuteronomio 18:9-12; Levitico 19:​26, 31) Ang mga mananag-an pagapatyon gayod.​—Exodo 22:18; Levitico 20:27.

Nganong puwersadong gihukman ang pagpanag-an? Ang Buhat 16:16-19 naghisgot bahin sa usa ka babaye nga dihay “usa ka demonyo sa pagpanag-an.” Oo, ang pagpanag-an nalambigit gayod sa demonismo. Busa ang pagbuhat sa bisan unsang matang sa pagpanag-an magpalangkit sa usa kang Satanas ug sa iyang mga demonyo! Kana moresulta sa espirituwal nga kadaot.​—2 Corinto 4:4.

Ang pipila ka estilo sa pag-adorno ug pagpananom sa palibot, sa Sidlakan man o sa Kasadpan, mahimong sa sinugdan naimpluwensiyahan sa bakak nga relihiyosong mga kostumbre sama sa fêng shui. Hinuon, kasagaran ang maong mga estilo bug-os nang nawad-an sa relihiyosong kahulogan niini. Bisan pa niana, klarong paglapas sa balaod sa Diyos kon gamiton ang fêng shui sa pagtag-an sa ugma-damlag o sa pagdalag suwerte o maayong panglawas. Ang paghimo sa ingon maoy paglapas sa tin-awng sugo sa Bibliya nga maglikay sa paghikap ug bisan unsang butang nga “mahugaw.”​—2 Corinto 6:14-18.

[Footnote]

[Hulagway sa panid 23]

Usa ka geomantic nga kompas

[Credit Line]

Mga panid 2 ug 23: Hong Kong Tourism Board