Asa Makaplagi ang mga Tubag?

Mao kana ang pangutana sa daghan karon. Usa ka magtutudlo sa Novosibirsk, Rusya, mikomento nga dili sayon ang pagpangitag mga tubag sa mga pangutana nga isukna sa iyang mga estudyante bahin sa Diyos ug sa relihiyon. Siya mipatin-aw diha sa usa ka sulat:

“Pagpauli nako sa balay usa ka adlaw niana, akong nakita ang usa ka gamayng tract nga gibilin didto nga nag-ulohang ‘Kon Nganong Ikaw Makasalig sa Bibliya.’ Nagtudlo ako ug kasaysayan diha sa eskuylahan, ug kasagarang makighisgot ako uban sa mga estudyante ug mga ulohan sama sa relihiyon, Bibliya, ug Diyos. Usahay lisod kaayong mangitag mga tubag sa mga pangutana sa mga bata.

“Sa una, abi nakog moduol lang ang mga tawo sa Diyos kon duna silay mga problema. Apan karon segurado ako nga dili gayod kini tinuod. Ang usa ka tawo mangutana usab: ‘Ngano man nga nahitabo kini kanako? Kinsa ako? Diin ako gikan? Asa ako moadto sa dihang ako mamatay?’ Hinungdanon nga makaplagan ang mga tubag niining mga pangutanaha. Mopatim-aw nga ang Bibliya naghatag ug makapakombinsir nga mga pangatarongan.”

Ang magtutudlo mihinapos: “Misulat ako niini nga sulat tungod kay gusto kong mahibalo ug dugang bahin sa Bibliya ug sa Diyos.”

Ang mga Saksi ni Jehova nagtultol sa mga tawo ngadto sa Bibliya alang sa tubag sa ilang mga pangutana. Tagda ang librong Kahibalo nga Motultol sa Kinabuhing Walay Kataposan. Nalakip diha sa 19 ka kapitulo mao ang mga ulohan: “Kinsa ang Matuod nga Diyos?,” “Nganong Kita Matigulang ug Mamatay?,” ug “Nganong Gitugotan sa Diyos ang Pag-antos?” Makahangyo ka ug kopya niining 192-panid nga tabang sa pagtuon sa Bibliya pinaagi sa pagpil-ap sa nagaubang kupon ug pagpadala niini ngadto sa adres nga gilista sa panid 5 niining magasina.

□ Interesado ako nga makadawat ug kopya sa libro nga Kahibalo nga Motultol sa Kinabuhing Walay Kataposan.

□ Palihog kontaka ako mahitungod sa usa ka libreng pagtuon sa Bibliya sa balay.